Республикон бирæпрофилон медицинон центры цы гемодиализы хайад ис, уый рæстæгмæ æрурæдта йæ куыст.
Республикон рынчындоны сæйраг дохтыр Быценты Индирæ куыд зæгъы, афтæмæй гемодиализы хайады æрцыд чысыл авари. Уый фæдыл УФ-йæ хуынд æрцыд инженер-техник, кæцы ацы бонты æрæвналдзæн аппарат цалцæг кæнынмæ. «Ныртæккæ нæ республикæйы ис 16 адæймаджы, кæцытæн æнæмæнгхъæуæг сты гемодиализы процедурæтæ. Уыдонæй авд ивгъуыд къуыри æрвыст æрцыдысты Цæгат Ирыстон-Аланимæ, иннæ фараст адæймаджы та арвыстам къуырисæры», – загъта Быценты Индирæ.
Пациенттæ райсынмæ форс-мажорон цауты рæстæджы алы хатт дæр цæттæ сты Цæгат Ирыстоны медицинон уагдæттæ. Уый тыххæй бадзырд арæзт æрцыд цалдæр азы размæ дыууæ министрады ‘хсæн.
2019 азы Бирæпрофилон медицинон центры операцион-хирургион корпус арæзт куы æрцыд, уæд уым бынат рахицæн кодтой гемодиализы хайадæн дæр. Уæд нæ горæты уыд 20 пациенты, кæцытæн хъуыд гемодиализы процедурæтæ аразын. Цалынмæ нæхимæ фæзынд гемодиализы хайад, уæдмæ дæр-иу æмбæлон медицинон æххуыс райсынмæ цыдысты Цæгат Ирыстонмæ. Уыцы медицинон хæрдзтæ æмæ фæндаггаджы аргъ рынчынтæн лæвæрдта паддзахад. Ныр нæхимæ уыцыиу рæстæджы гемодиализ саразæн ис цыппар пациентæн. Аппараттæй сæ иу та у резервон, уымæй пайда цæуы æрмæстдæр экстренон цауты рæстæджы. Диализы процесс у тынг вазыгджын. Цы хостæ хъæуы, уыдон та сты зынаргъ.
Республикон рынчындоны сæйраг дохтыр ма куыд загъта, афтæмæй хицауад рагæй архайдта гемодиализы центр саразыныл. Аппараттæ сæхæдæг дæр сты зынаргъ. Центр аразгæйæ, цы арæзтадон æрмæджытæй пайда цыд, уыдон уыдысты гъæдджын, цæмæй зианхæссæг буарадтæ рынчынты æнæниздзинадыл мæгуырауæрдæм ма æндæвтаиккой.
УАЗÆГТЫ Марфа
Comments are closed, but trackbacks and pingbacks are open.