Хуссар Ирыстоны Сæйраг санитарон дохтыр Коцты Маринæ куыд хъусын кæны, уымæ гæсгæ коронавирус сбæрæг кæныны фæдыл дарддæр уагъд æрцыд 133 иртасæн куысты. Уыдонæй 47 тесты равдыстой æвæрццаг фæстиуджытæ, ома та иу боны дæргъы рабæрæг уал рынчыны. Иумæйагæй сисгæйæ, республикæйы территорийыл зноны бонмæ ацы æнæхайыры вирусæй рынчынты нымæц у 670.
Бæстæйы сæйраг санитарон дохтыры ныхæстæм гæсгæ ныртæккæйы рæстæджы, ома вирусы пандеми нæ республикæйы кæй апарахат, уымæ гæсгæ цæрджытæ, æнæмæнгдæр, хъуамæ дарой маскæтæ æмæ кæд сæхи лæмæгъ фæхатой, кæнæ ацы вирусы симптомтæ банкъарой, уæд сæхæдæг ма хос кæной, фæлæ дохтырмæ фæдзурой.
КУЫД У УАВÆР ЛЕНИНГОРЫ РАЙОНЫ ТА
Ацы район кæд республикæйы столицæмæ дæрддзæф у, уæддæр ис бæстæйы Æнæниздзинад хъахъхъæнынады министрады хъусдарды бын. Ленингоры районон рынчындоны сæйраг дохтыр Гобозты Зурабы ныхæстæм гæсгæ ацы районы нæй коронавирусон инфекцийæ рынчынтæ. Йæ ныхæстæм гæсгæ Уæрæсейы Федерациимæ арæн байгомæй районы дæр уыд иу рынчын бахынцыны цау. Уый госпитализаци æрцыд инфекцион хайадмæ æмæ йын уым æмбæлон хос скондæуыд.
ЦХИНВАЛЫ РАЙОНЫ
Уавæрæй раппæлæн нæй ацы районы. Уым ацы вирусы иуæг ныридæгæн рабæрæг 14 адæймагмæ. Уыдонæн се ‘ппæтæн дæр хос цæуы амбулаторон æгъдауæй, уымæн æмæ низ рогæй хæссынц. Уыйхыгъд хиизоляцийы сты бæрæг фылдæр адæм. Уыдонæн, кæй зæгъын æй хъæуы, арæзт æрцыд тестытæ.
Дменисы амбулаторийы сæргълæууæг Тыбылты Татьянæйы ныхæстæм гæсгæ рынчынты нымæц кæм къаддæр кæндзæн, кæм – фылдæр. Дохтыртæ дæр кæй рынчын кæнынц, уымæ гæсгæ сæм æвзæры проблемæ медицинон персоналы хъуыддаджы, кæд нырма æххæсынц сæ куыстыл, уæддæр.
Куыд ма банысан кодта, уымæ гæсгæ сæм уыд æртæ уæззау рынчыны дæр æмæ сæ аластой республикон бирæпрофилон медицинон центры инфекцион хайадмæ.
Йæ ныхæстæм гæсгæ ныртæккæ кусынц фарстыл, цæмæй сæхæдæг бынаты аразой тестытæ. Науæд æмбæстæгты уый тыххæй хъæуы цæуын горæты поликлиникæмæ.
Вирусон инфекцион низ æгæр парахат кæны нæ республикæйы алы къуымты. Уымæ гæсгæ алы æмбæстаг дæр хъуамæ хъахъхъæна йæхи æмæ йе ввахс адæмы, уымæн æмæ тæссаг у ас адæмæн æмæ алыгъуызон уæззау низтæй чи тыхсы, ахæмтæн.
Нæ уацх.
Comments are closed, but trackbacks and pingbacks are open.