НÆ ФÆФЫЛДÆР РЫНЧЫНТЫ НЫМÆЦ

Æмбæстæгты хæрзиуæгад æмæ фæлхасгæнджыты бартæ хъахъхъæныны фадыгмæ хъусдард здахыны фæдыл комитеты сæргълæууæг Коцты Маринæ информацион фæрæзтæн куыд хъусын кæны, уымæ гæсгæ Хуссар Ирыстоны ПЦР лабораторийы цы иртасæнтæ арæзт æрцыд ног коронавирусон инфекци рабæрæг кæныны нысанæн, уыдонæй 40 тестæй фылдæрæн уыд æвæрццаг фæстиуæг. Банысан кæнын хъæуы уый, æмæ ног хуызы коронавирусы инфекци ныббиноныг уыдзæн гриппы хуызы æмæ йæм тыхст ахаст æвдисын нæ хъæуы. Фæлæ уый афтæ нæ нысан кæны, æмæ нæхи ма хизæм ацы тæссаг вирусæй.

Республикон медицинон центры «сырх зонæйы» цы рынчынтæ ис, уыдонмæ ис лæмбынæг хъусдард. 190 фылдæр рынчынæн хос цæуы амбулаторон уавæрты. Сæйраг санитарон дохтыры ныхæстæм гæсгæ, коронавирусон инфекцийæ рынчынты нымæц фæфылдæр ацы аз июлы мæйæ. Рынчынты фылдæр хай рабæрæг вæййы горæт Цхинвалы цæрджыты ‘хсæн. Рынчынтæ ис республикæйы районты дæр, иууыл къаддæр рынчынтæ хынцыд цæуы Ленингоры районы.

Бæстæйы санитарон дохтыры ныхæстæм гæсгæ, рынчынты кар у алыгъуызон – сабийæ суанг ацæргæ æмбæстæгтæм. Уый тыхстдзинад равдыста, зæгъгæ ног ахуыры азы къæсæрыл кæй стæм, уымæ гæсгæ коронавирусæй рынчынты нымæц, гæнæн ис, æмæ фæбæрзонддæр уа. Уый фæстиуæгæн сиды æмбæстæгтæм, цæмæй грипп кæнæ ОРВИ-йы симптомтæ чи банкъара, уыдон хæдзарæй æддæмæ ма хизой, бадзурой фадыгон дохтыртæм æмæ уыдон амындтытæ æххæст кæной. Ахсджиаг у, цæмæй рынчын хынца хисæрмагонд гигиенæйы фæткойтæ, пайда кæна хицæн мигæнæнтæй, æмæ уа хи-изоляцийы уавæрты.

Дохтырты амындтытæм хъуамæ хъусæм

Нæ республикæйы бирæпрофилон медицинон центры инфекцион хайады дохтыртæ хатынц цæрджытæм, цæмæй ног коронавирусон инфекци апарахат кæныны ныхмæ цæуой æппæт профилактикон мадзæлттæ. Рынчындонæй цы пациентты рафыссынц, уыдон амбулаторон уавæрты кæронмæ хъуамæ хос кæной сæхицæн, сæ хъус дарой дохтыры амындтытæм. Архайой, цæмæй æнæниз адæймаджы ма фæхайджын кæной ацы вирусæй, æмæ хиизоляци хъахъхъæд цæуа дыууæ къуырийы дæргъы, санитарон-эпидемиологон режим хъахъхъæной æмæ рæстæгыл хостæ нуазой.

Куыд зонæм, уымæ гæсгæ ацы вирус тæссаг у, тæссагдзинады къорды чи ис, уыцы æмбæстæгтæн. Уыдон сты ас æмбæстæгтæ, æдзух рынчын чи кæны, уыдон, сæкæр æмæ зæрдæдадзинты низтæй чи тыхсы æмæ æндæртæ. Уымæ гæсгæ Хуссар Ирыстоны санитарон уагдон сиды æмбæстæгтæм, цæмæй æхсæнадон бынæтты, инфекцион низæй бахи-зыны нысанæн, алы æмбæстаг дæр дара маскæ, йæхи æмæ йæ алфæмблай адæмы бахъахъхъæ-ныны нысанæн.

Сæйраг санитарон дохтыры ныхæстæм гæсгæ сæ уагдон информацион фыстæг арвыста ахуырады министрадмæ, цæмæй алы ахуырадон уагдоны дæр æрвылрайсом барой сывæллæтты буары температурæ æмæ рынчын рабæрæг кæныны нысанæн æххæст кæной æндæр мадзæлттæ.

Алы æмбæстаг дæр хъуамæ бæрнон ахаст равдиса ныры рæстæджы, уымæн æмæ ацы хæцгæ низ алы адæймаджы организммæ бахаугæйæ алыгъуызон равдисы йæхи. Фæлæ иууыл ахсджиаг у уый, æмæ низы æууæлтæ куы банкъара адæймаг йæхимæ, уæд æнæрхъæцæй хъуамæ бахата дохтыртæм. Науæд хæдзарон уавæрты хос кæнгæйæ низ йæ кæнон кæны, æмæ йын уый фæстæ нæ вæййы хорз фæстиуджытæ. Мах æвдисæн стæм ацы низы фæстиуæгæн куыд фæхъуыдысты не ‘ввахс хиуæттæ æмæ зонгæтæ. Уымæ гæсгæ махæй алчидæр хъуамæ уа цырддзаст æмæ аудгæ ахаст æвдисæм нæ кæрæдзимæ.

***

Æнцой боны бæрæггæнæнтæм гæсгæ, нæ горæты медицинон центры инфекцион хайады «сырх зонæйы» коронавирусон инфекцийæ авд рынчынæн цæуы хос. Республикон рынчындоны сæйраг дохтыр Быценты Индирæйы ныхæстæм гæсгæ, «сырх зонæйы» уавæр ныртæккæ стабилон у, аивгъуыйгæ къуырийы дæргъы нæ фæфылдæр рынчынты нымæц.

Рынчындон медицинон препараттæй куыд ифтонг у ацы æнæхайыры вирусы ныхмæ, уый тыххæй ныхасгæнæг афтæ радзырдта, зæгъгæ, ифтонг сты хъæуæг препараттæй.

Банысан кæнын хъæуы уый, æмæ Хуссар Ирыстоны республикон медицинон центры «сырх зонæ» ногæй байгом 10 августы, ПЦР-тестытæ саразыны фæстиуæгæн кæй рабæрæг инфекцион низæй рынчынтæ, уымæ гæсгæ.

Къæбулты Марина