Хуссар Ирыстонмæ рæстæгыл æххуысмæ æрхæццæ Уæрæсейы Федерацийы Хъахъхъæнынады министрады ныгуылæн æфсæддон зылды бирæпрофилон æфсæддон-быдырон госпиталь. Уæрæсейаг салдат – ирвæзынгæнæг салдат – æххуысмæ нæм фæзындысты нæ сыхæгтæ нæ сыгъдæг быдыр аразынмæ куы хъавыдысты, уӕд. Ныр дæр нæ бæстæйы эпидемиологон уавæр уæззауæй-уæззаудæр кæй кæны, уымæ гæсгæ бæстæйы сæргълæууæджы бахæсмæ гæсгæ Хуссар Ирыстоны Хъахъхъæнынады министрад бахатыд, цæмæй нӕм сæвзæргæ уавæр æрбæстон кæнынмæ се ‘ххуысы къух фæдарой Уæрæсейы æфсæддон медицинæйы кусджытæ.

Уæрæсейы Хъахъхъæнынады министрады æфсæддон госпиталь рацыд Мæскуыйы цур Алабинойæ, цалдæр боны фæндагыл фӕлладӕй, фæлæ ӕнӕкъуылымпыйӕ æрхæццæ сты Хуссар Ирыстонмæ. Ирон адæм уазæгыл кадимæ æмбæлынц, æмæ каджын уавæрты райстой ацы хатт дæр уæрæсейаг ирвæзынгæнæг госпиталы кусджыты. Æртæ уæлибых æмæ бæгæныйы куысимæ Дзауы районы администрацийы минæвæрттæ арфæ ракодтой Уæрæсейы Хъахъхъæнынады министрады службæгæнджытæн.

Æмæ та ногæй: бузныг, Уæрæсе!..

Материалон-техникон ифтонгады фæдыл фыццæгæм гвардион тамайнаг æфсады командæгæнæджы хæдивæг, булкъон Олег Бузаев банысан кодта, зæгъгæ, куыддæр æрбæстон уой, афтæ æрæвналдзысты сæ æвæджиаг хæс æххæст кæнынмæ. Йæ ныхæстæм гæсгæ уыдон цыппар боны фæндагыл рацыдысты Алабинойæ. Уырдыгæй бирæфункционалон госпиталь марш сарæзта Воронеж – Тихорецк – Владикавказ – Хуссар Ирыстон. Куыд банысан кодта, уымæ гæсгæ фæндагыл ницы зындзинæдтыл сæмбæлд колоннæ, службæгæнджытæ сæхи æнкъарынц ныфсджынæй æмæ æввахс рæстæджы æрæвналдзысты адæмæн æххуыскæнынмæ.

150 бынатон бирæпрофилон æфсæддон-быдырон госпиталь райтынг æрцыд нæ горæты стадионы. Йе сконды сты 150 æфсæддон службæгæнæджы, хосгæнæн – диагностикон мадзæлттæ уадзынæн сæрмагонд медицинон техникæ: рæуджыты вентиляцигæнæн аппараттæ, рынчынтæм хъусдарыны фæдыл монитортæ, рентгенографион аппараттæ æмæ æндæртæ.

Æмæ та ногæй: бузныг, Уæрæсе!..

Медицинон службæйы дæлбулкъон, мобилон госпиталы къухдариуæггæнæг Расул Муртазалиев нын куыд радзырдта, уымæ гæсгæ госпиталы тыхтæ æмæ ифтонгад фадат дæттынц йæ разылæууæг хæстæ æнтыстджынæй æххæст кæнынæн. Уый дæр дзырдта колоннæйы дард балцыл, госпиталь ифтонг кæй у дохтыртæй æмæ æввахс рæстæджы цæттæ кæй уыдзысты фыццаг пациентты райсынмæ.

 Банысан ма кодта, зæгъгæ, тестытæ арæзт цæудзæн алы пациентæн дæр.

Уæрæсейы Федерацийы æфсæддон медиктæ Хуссар Ирыстоны территорийыл коронавирусон инфекцийæ рынчынтæн æххуыс кæндзысты, цалынмæдæриддæр рынчынты нымæц нæ фæкъаддæр уа, уæдмæ.

Къæбулты Марина

Comments are closed, but trackbacks and pingbacks are open.