Уæрæсейы Федерациимæ арæныл фæндаг куы байгом, уæдæй фæстæмæ вирусы тæфаг рабæрæг 277 адæймагыл. Иумæйагæй сисгæйæ та, дунейы пандемийы рапарахатæй фæстæмæ ацы æнæхайыры низæй фæрынчын сты Хуссар Ирыстоны 367æмбæстаджы.
Уымæ гæсгæ республикæйы сæйраг санитарон дохтыр Коцты Маринæ сиды æмбæстæгтæм, цæмæй сæхиуыл фæхæцой æмæ ма æмбырд кæной къордгæйттæй, уымæйдæр æнæмæнг хъахъхъæд хъуамæ цæуа социалон дистанци. Æмæ кæд адæймаг банкъара карз респираторон инфекцийы æууæлтæ, уæд йæхи хъуамæ сизоляци кæна æмæ дохтырмæ бадзура.
Нæ республикæйы коронавирус, грипп кæнæ ОРВИ-йæ рынчыны цаутæ кæй фæфылдæр сты, уымæ гæсгæ дыууæ къуырийы æмгъуыдмæ æхгæд æрцыдысты иумиагахуырадон скъолатæ æмæ уагдæттæ.
Республикæйы куыстуæттæ æмæ уагдæттæн бахæс æрцыд, цæмæй 65 азы æмæ уымæй уæлæмæ кæуыл цæуы, уыдон хиизоляцийы арвитой. Къуырисæрæй дæрддзæг куысты режиммæ конд æрцыдысты президенты администраци æмæ хицауады кусджытæ, уымæн æмæ уым дæр рабæрæг коронавирусæй рынчын адæймæгтæ.
Æрвылбон дæр, бæстæйы сæйраг санитарон дохтыры хъусынгæнинагмæ гæсгæ ацы вирусæй рынчынты нымæц фылдæр кæны. Стационарон рынчынтæн цæуы æмбæлон медицинон хос. Рог рынчынтæ та хос кæнынц амбулаторон æгъдауæй, фадыгон дохтыры рекомендацитæ хынцгæйæ.
Тагъд æххуысы станцы кусджытæ ныртæккæйы рæстæджы кусынц æнæулæфтæй. Уымæн æмæ рынчынты нымæц, стæй грипп æмæ ОРВИ-йы респираторон низтæ дæр сытынг сты. Æнæрынцой куыст кæнынц «сырх зонæйы» цы хъæбатыр медицинон персонал кусы, уыдон. Уымæ гæсгæ алы æмбæстаг дæр хъуамæ æмбара нæ æнæниздзинад хъахъхъæныны фадыджы удуæлдай куыст æмæ архайд алы рынчын æмбæстаджы уд фервæзын кæныныл.
Ныртæккæ Хуссар Ирыстоны ацы инфекцион низы ныхмæ тох цæуы Республикæйы бирæпрофилон медицинон центры Инфекцион хайады. Коронавирус апарахат кæнынæй тæссаг кæй у, уымæ гæсгæ ацы хайад кусы сæрмагонд режимы æмæ хайадмæ бацæуыны бар нæй хуымæтæг æмбæстæгтæн. Стационары кусæг медперсоналы нымæц фæфылдæр хайады. Кæд раздæр рад иу дохтыр хаста, уæд ныртæккæ рынчынты нымæц кæй фылдæр кæны, уый тыххæй фæфылдæр медицинон персонал
Юго-Осетпотребнадзоры ПЦР лабораторийы апрелæй фæстæмæ коронавирус рабæрæг кæныны тыххæй уагъд æрцыд 6 мин тестæй фылдæр.
Эпидемиологон уавæр кæй карз кæны, уымæ гæсгæ Æнæниздзинад хъахъхъæныны министрад инфекцион хайадæй дарддæр бацæттæ кодта рынчынтæ исынæн медицинон центры сывæллæтты рынчындон.
Республикæйы сæйраг санитарон дохтыр Коцты Маринæ сиды не ‘мбæстæгтæм, цæмæй ныры сæвзæргæ уавæрты сæхæдæг ма хос кæной сæхицæн, фæлæ фыццаг симптомтæ банкъаргæйæ, дохтырты æххуысмæ сидой. Уымæн æмæ вирус хуымæтæг нæу, уадид æндавы рæуджытыл, стæй ма, рынчын кæнæ лæмæгъ цы орган у, уыдоныл. Алы æмбæстаг дæр хъуамæ бæрнон ахаст дара йе ‘нæниз-дзинадмæ, стæй йæ алфæмблай адæммæ дæр. Ныртæккæ махæй бирæ аразгæ у, цæмæй бынтон ма пырх кæна ацы æнæхайыры вирус æмæ бахъахъхъæнæм нæ нацийы æнæниздзинад.
КЪÆБУЛТЫ Маринæ
Comments are closed, but trackbacks and pingbacks are open.