Фæсивæды бæрæгбон – Цхинвалы

Рагон хъазт, адæмон инструменттæ æмæ нырыккон зарджытæй Цхинвалы банысан кодтой Фæсивæды бон.

Хуыцаубоны Цхинвалы банысан кодтой Фæсивæды бон. Бæрæгбоны официалон бон у 27 июнь, фæлæ бæрæгбонон мадзал аразджытæ-Фæсивæдон политикæ, спорт æмæ туризмы фæдыл комитет аскъуыддзаг кодта, цæмæй республикæйы фæсивæдæн лæвар саразой, Цæгат Ирыстонæй популярон сфæлдыстадон къордты æрхонгæйæ, æмæ бæрæгбон хаст æрцыд уазджыты графикмæ гæсгæ.

Æвзæр  боныгъæд  дæр  нæ бахъыгдардта æцæг бæрæгбоны зæрдæйы уагæн, кæцыйæн йæ фыццаг хай уыд хъазт.

Рагон хъазт фæстаг азты æн-дидзын райдыдта. Хорз атмосферæ сарæзтой æрхонгæ цæгатирыстойнаг къордтæ – «Уацамонгæ», кæцы ссис бирæ дунеон фестивалты лауреат æмæ Адæмон инструменты ансамбль. Райдианы фæсивæд, цыма æфсæрмы кодтой, фæлæ фæстæдæр хъазты бацыдысты, æмæ уымæй банысан кодтой, царды нырыккон реалитæм нæ кæсгæйæ, республикæйы ног фæлтæр кæй нæ рох кæнынц традицитæ, кæцытæ нын ныууагътой нæ фыдæлтæ.

Уыцы изæр ма Хуссар Ирыстоны фæсивæдæн уагъд æрцыд, цымыдисон концерт.

Сывæллæтты сфæлдыстадон хæдзары гом сценæйыл уазджытимæ зарыдысты хуссарирыстойнаг эстрадæйы зарæггæнджытæ. Сценæмæкæсджыты зæрдæмæ тынг фæцыд æвзонг зарæггæнджытæ, уыдоны нымæцы  конкурс «Окно в Европу»-йы уæлахиздзау Плиты Олег, вокалон конкурс «Зарæг»-ы Гран-при йы æмæ рæсугъддзинад, модæ æмæ курдиаты фестиваль «Russian Beauty»-йы уæлахиздзау Харебаты Мартæ, курдиатджын зарæггæнæг æмæ журналист Бететы Алим æмæ æндæртæ.

Мадзалы организатор, Фæсивæдон политикæ, спорт æмæ туризмы фæдыл комитеты сæргълæууæджы хæдивæг Гатыгкоты Валентинæ раарфæ кодта республикæйы цæрджытæн Фæсивæды боны цытæн æмæ сын йæ цæст бауарзта амонд, фæрныгад æмæ æнтыстытæ.

Студенткæ Хъабанты Динæ бузныджы ныхæстæ загъта изæры организатортæн, банысан кодта, национ инструменты ансамблы ралæуд йæ зæрдæмæ тынг кæй фæцыд, уый.

Æвзонгад у алы адæймаджы царды дæр иууыл ахсджиагдæр æмæ хуыздæр рæстæг. Уый у бæллицты, ныфсдзинады, уарзондзинады æмæ адæймаг, куыд гоймаг, афтæ суæвыны рæстæг.

Хуссар Ирыстоны ис курдиатджын фæсивæд, кæцы хицæн кæны патриотизм, хъомылдзинад, хорздзинад, æхсæнады мидæг сæхи æвдисын æй, сфæлдыстады, спорты æнтыстытæй. Республикæйæ æддæмæ ацæугæйæ, конкурсты, фестивалты, форумты, балцыты, конференциты хайад исгæйæ нæ æвзонг минæвæрттæ алыхаттдæр сæхи равдисынц аккагæй, сæ æфсармдзинад, зонындзинæдтæ æмæ хæлардзинадæй хицæн кæн-гæйæ. Ног фæлтæр хъахъхъæны, фыдæлтæй нын цы баззад, уыдæттæ æмæ размæ цæуы – ахæм девизимæ зæгъæн ис, ацыдис ацы бæрæгбон.