Ленингоры районы администрацийы сӕргълӕууӕг Гулиты Владимир ӕмӕ Президенты администрацийы минӕвар Ленингоры районы сахъатджынты коляскæтӕ радтой Цъинагары зонæйы цӕрӕг дыууӕ бинонтӕн. Гъдулеты хъæуы цӕрӕг Мӕргъиты Георгийӕн ацӕугӕ азы дохтыртӕ сæвӕрдтой диагноз гангренæ, уымӕ гӕсгӕ бахъуыд нӕлгоймагӕн йӕ галиу къах ампутаци скӕнын. Йӕ чызг Маринæйы ныхӕстӕм гӕсгӕ, фыццаг коляскæ самал кӕнынӕн уыдонӕн баххуыс кодта республикӕйы ӕнӕниздзинад хъахъхъӕнынад ӕмӕ социалон райрӕзты министрад. Уыцы коляскæйӕ Мӕргъиты Георги пайда кодта аз ӕмӕ ӕрдӕгӕй фылдӕры рӕстӕджы, фӕлӕ йыл кӕрты цӕуын уыд тынг зын ӕмӕ йӕ хъуыд нырыккондӕр коляскæ самал кӕнын. Ахӕм коляскæйы сахъат адӕймагӕн йӕхицӕн ӕнӕ искӕйы ӕххуысӕй йӕ бон у, куыд бӕстыхайы мидӕг, афтӕ уынджы дӕр цӕуын. Бинонтӕн сӕхицӕн фадат нӕ уыд ахӕм коляскæ самал кӕнынӕн ӕмӕ уый фæдыл ацы аз январы мӕйы уыдон куырдиат балæвæрдтой Бибылты Анатолийы номыл. Сӕ куырдиатмӕ сын Президент йӕ хъусдард аздӕхта ӕвӕстиатӕй ӕмӕ цыбыр рӕстӕгмӕ Георгийӕн лӕвӕрд ӕрцыд сахъатджыны нырыккон коляскæ.
Ныр Мӕргъиты Георгийӕн фадат ис, ӕнӕ искӕйы ӕххуысӕй ног коляскæйыл цӕуынӕн.
«Фӕхъарм ис ӕмӕ ныр мӕ фыдӕн дӕр фадат уыдзӕн йӕ ног коляскæйыл ӕддæмӕ рахизынӕн ӕмæ сыгъдæг уӕлдӕф сулӕфынӕн. Бузынг нӕ Президент Бибылты Анатолийӕн йӕ хъусдарды тыххӕй. Ацы коляскӕ махӕн стыр ӕххуысс у, нӕхицӕн уыцы фадат нӕ уыд цӕмӕй йӕ балхӕдтаиккам, фыццаг коляскӕ балхӕныны хъуыддаджы нын стыр ӕххуыс бакодта Æнӕниздзинад ӕмӕ социалон райрӕзты министры хӕдивӕг Сиукъаты Наирæ. Стыр бузныг ма мӕ фӕнды зӕгъын нӕ районы сӕргълӕууæг Гулиты Владимирӕн дæр йӕ хъусдарды тыххӕй. Хӕдзармæ фӕххӕццӕ кодтой мӕ фыдӕн йӕ ног коляскӕ» – банысан кодта Георгийы чызг Мӕргъиты Маринӕ.
Ленингоры районы администрацийы сӕргълæууӕг Гулиты Владимир банысан кодта, зӕгъгӕ, дарддӕр кусдзысты цӕрджыты проблемӕтӕ аскъуыддзаг кӕныныл. Фыццаг рады хъусдард цӕудзӕн, ӕмбӕстӕгты ӕнӕниздзинады фӕдыл фарстытӕ аскъуыддзаг кӕнынмӕ.
«Бузныджы ныхӕстӕ мӕ фӕнды зӕгъын Бибылты Анатолийӕн ахæм æххуысы тыххæй. Мӕргъиты Георги у зӕххкусӕг лӕг, бирӕ йын бантыст йӕ 81 азы дæргъы саразын, фӕлӕ ныр йе ‘нӕниздзинад тынг фӕлӕмӕгъ, ацы æххуыс та йын йӕ уавӕртӕ бӕрӕг фӕрогдӕр кӕндзӕн.
Ахӕм коляскӕ ма Бибылты Анатоли балхӕдта нӕ районы Монастеры хъӕуы цӕрӕг Хатия Берианидзейӕн дӕр», – загъта Гулиты Владимир.
Хатия Берианидземӕ дӕр йӕ коляскӕ фӕххӕццӕ ӕвӕстиатӕй. Уымӕн йӕ чысылӕй фӕстӕмӕ ис сывӕллӕтты церебралон æндзыгниз ӕмӕ ӕнӕ коляскæйӕ йӕ бон цӕуын нӕу.
Президент Бибылты Анатоли сахъатджынтӕн ӕххуыс кӕны ӕппынӕдзухӕй. Марты мӕйы ма сахъатджыны нырыккон коляскæтӕ лӕвӕрд ӕрцыдысты Цхинвалы ӕмӕ Къуайсайы цӕрджытӕн дӕр.
Comments are closed, but trackbacks and pingbacks are open.