Президенты бынатмæ кандидатты документты пакеттыл бакусыны фæстæ, Хуссар Ирыстоны Централон æвзарæн къамис радон рабадты уынаффæ рахаста, регистраци цы кандидаттæ æрцæудзысты, уыдон номхыгъд.
Централон æвзарæн къамисы уæнг Цоциты Игорь нын куыд фехъусын кодта, уымæ гæсгæ президентон æвзæрстыты хайад исдзысты бæстæйы архайæг Президент Бибылты Анатоли, парти «Ныхас»-ы лидер Гаглойты Алан, Парламенты раздæры депутат Тасойты Димитр, Парламенты депутат Мулдарты Гарри, Парламенты Сæрдары хæдивæг Плиты Александр.
Йæ ныхæстæм гæсгæ Централон æвзарæн къамисы регистраци не ‘рцыдысты: Хъахъхъæнынады министрады раздæры къухдариуæггæнæг Гассеты Ибрагим, ацы министрады раздæры кусæг Пухаты Владимир, нывгæнæг Кадзты Гено, Парламенты депутат Санахъоты Дауыт, «Мегафон-Южная Осетия»-ы раздæры Генералон директор Кутæрты Аслан, ХИПУ-йы ахуыргæнæг Тадтаты Таймураз, амалиуæггæнæг Уалыты Альберт, барадхъахъхъæнæг органты раздæры ‘мкусæг Хъазиты Зелим, амалиуæггæнæг Зæгъойты Рустам, Парламенты фыццаг сæвзæрсты депутат Плиты Алымбег.
Ныр знонæй фæстæмæ Президенты бынатмæ фондз кандидатæн фадат ис агитацийы рæстæгæн, æмбæлдзысты се ‘взарджытимæ æмæ хайад исдзысты дебатты, цыран алы кандидатæн дæр фадат уыдзæн йе ‘взæрстыты агъоммæйы программæимæ зонгæ кæнынæн.
Сæ куыстмæ æрæвнæлдтой районты территориалон æвзарæн фадгуытæ
Нæ республикæйы ныртæккæ сæйраг хъусдард здæхт у президентон æвзæрстытæм цæттæгæнæн куыстмæ. Æзæрстыты закъондæттынадмæ гæсгæ нæ республикæйы территорийыл байгом уыдзысты Территориалон æмæ Фадыгон æвзарæн фадгуытæ. Ныртæккæ уым цæуы æвзæрстытæм цæттæгæнæн куыстытæ, уый æмрæнхъ Фадыгон æвзарæн къамисты сконд æрбæстон кæнын.
Дзауы районы Территориалон æвзарæн къамисы сæрдар Хъуылымбегты Сослан нын куыд загъта, уымæ гæсгæ районы территорийыл куыст цæуы Фадыгон æвзарæн къамистæ æмæ се сконд сбæлвырд кæныныл.
Йæ ныхæстæм гæсгæ Территориалон æвзарæн къамисæн ныридæгæн æвзæрст æрцыд сæрдар, йæ хæдивæг æмæ нымæрдар. Ныртæккæ Фадыгон æвзарæн къамисы уæнгтæ кусынц районы æвзарджыты номыгъдтæ аразыныл æмæ æвзарæн фадгуыты æмбæлон уагмæ æркæныныл.
Сослан ма куыд фехъусын кодта, уымæ гæсгæ районы территорийыл ис 12 æвзарæн фадыджы. Иумиагæй сисгæйæ, Дзауы районы нымад цæуы 2 500 æвзарæджы бæрц.
Къуыдаргом дæр сæхи цæттæ кæнынц ахсджиаг æвзæрстытæм
Къуайсайы горæты Территориалон æвзарæн къамисы сæрдар Джиоты Роберт нын куыд загъта, уымæ гæсгæ горæт Къуайсайы территорийыл цæттæ цæуы æхсæз æвзарæн фадыджы: Синагур, Цъон, Замтарет, Киров æмæ Часавалы хъæуты æмæ Къуайсайы. Æвзæрстыты хайад цы æмбæстæгтæ исдзысты, уыдон номхыгъдыл ныртæккæ цæуы ахсджиаг куыст. Æвзæрстыты закъондæттынады домындзинадмæ гæсгæ æвзæрстытæм цæттæ цæуынц æвзарæн фадгуытæ.
Роберты ныхæстæм гæсгæ рабадтыты рæстæджы бæлвырд æрцыд Территориалон æвзарæн фадыджы сæрдар, йæ хæдивæг æмæ нымæрдар. Уымæй дарддæр ма бæлвырд æрцыдысты Территориалон æвзарæн къамисæй æвзæрстыты рæстæджы Фадыгон æвзарæн къамисты хайад чи исдзæн, уыцы минæвæрттæ дæр.
Comments are closed, but trackbacks and pingbacks are open.