ПРЕЗИДЕНТОН ÆВЗÆРСТЫТÆ – 2022

8 майы ауагъдæуыд Хуссар Ирыстоны Президенты æвзæрстыты дыккаг тур. Уый фæстиуæгæн Цхинвалы бакондæуыд Централон æвзарæн къамисы пресс-центр. Пресс-центр байгом кодта Централон æвзарæн къамисы сæрдар Гæджиты Эмилия. Уый информаци радта æвзарæн фадгуыты тыххæй.

«Æвзæрстытæ бацæттæ кæныны тыххæй арæзт æрцыд æхсæз æвзарæн къамисы горæттæ Цхинвалы æмæ  Къуайсайы, Дзауы, Знауыры, Ленингоры æмæ Цхинвалы районты территориты. Хъæлæсдæттыны тыххæй арæзт æрцыд 76 фадыджы, уыдонæй 72 сты Хуссар Ирыстоны территоийыл, цыппар та республикæйæн æддейæ. Æвзарæн фадгуытæ иууылдæр байгом сты райсомы 8 сахатыл. Хуссар Ирыстоны цæрæг æвзарджыты нымæц у 34500 адæймаджы», – банысан кодта Гæджиты Эмилия.

Уый куыд загъта, афтæмæй фылдæр хъæлæстæ чи райса, уыцы кандидат фæуæлахиз уыдзæн. Уыимæ иумæ ма банысан кодта, зæгъгæ, президентон æвзæрстыты дыккаг тур нымад æрцæудзæн, номхыгъдты чи ис, уыцы æвзарджыты 30 проценты хъæлæс куы радтой, уæд.

***

«Хуссар Ирыстоны Президентон æвзæрстыты дыккаг туры тыххæй информаци дæттын бафæндыд уæрæсейаг федералон информацийы фæрæзты, Цæгат Ирыстонæй æмæ хуссарирыстойнаг коллегæты. Æдæппæт акредитацитæ райстой 58 журналисты, уыдонæй 21 сты Хуссар Ирыстоны паддзахадон дзыллон-информацийы фæрæзты минæвæрттæ, 27 журналисты та – уæрæсейаг информацийы фæрæзты минæвæрттæ. Журналисттæн арæзт æрцыд æппæт уавæртæ дæр информаци адæттыны тыххæй», – фехъусын кодта Мыхуыр æмæ информацийы комитеты сæрдар Хъотайты Мария.

***

Æвзæрстыты процесс куыд цæуы, уый тыххæй рæстæгыл информаци адæттыны нысанæн пресс-центр рæстæгæй рæстæгмæ информаци иста æвзарæн фадгуытæй комкоммæ эфиры руаджы.

Кæд райсомæй æвзæрстытæм бирæ адæм нæ цыд, уæддæр Централон æвзарæн къамисы минæвар Джиоты Фатимæ куыд радзырдта, афтæмæй боны 2 сахатмæ  республикæйы æвзарджытæн сæ  40,4 проценты радтой хъæлæс, уый та ууыл дзурæг у, æмæ æвзæрстыты дыккаг тур нымад æрцыд.

Боны 2 сахатмæ Дзауы районы хъæлæс радтой æвзарджыты 46,9 проценты, Зна-уыры районы – 56,2 проценты, Ленингоры районы – 50,2 проценты, Цхинвалы районы – 41,7 проценты, Къуайсайы – 51,5 проценты, горæт Цхинвалы – 35,8 проценты.

20.00 сахатыл æвзарæн фадгуыты куы сæхгæдтой, уæд та хъæлæсæппæрсты фæстиуджытæ уыдысты ахæм: горæт Цхинвалы 66,6 проценты, Цхинвалы районы 61,5 проценты, Дзауы районы – 73,1 проценты, горæт Къуайсайы – 76,1 проценты, Знауыры районы – Ленингоры районы – 73,2 проценты. Республикæйы иумиагæй хъæлæс радтой æвзарджыты 68,2 проценты. Джиоты Фатимæйы ныхæстæм гæсгæ, республикæйæн æддейæ цы æвзарæн фадгуытæ ис, уыдон нæма бæрæг не сты.

23 сахатыл развæлгъау бæрæггæнæнты тыххæй информаци сарæзта Централон æвзарæн къамисы сæрдар Гæджиты Эмилия. Уый банысан кодта, зæгъгæ, «8 майы 23 сахаты бæрæггæнæнтæм гæсгæ. бакуыст æрцыдысты суагъæтæ.

***

23 сахаты бæрæггæнæнтæм гæсгæ, президентон æвзæрстыты лидер куы фæбæрæг, уæд Бибылты Анатоли фембæлд журналисттимæ æмæ банысан кодта, æвзæрстытæ нымад кæй æрцыдысты, уый.

«Фыццаджы фыццаг мæ бузныг зæгъын фæнды нæ республикæйы уыцы æмбæстæгтæн, кæцытæ сæххæст кодтой сæ æмбæстагон хæс, æрцыдысты æвзæрстытæм æмæ хъæлæс радтой. Фæлæ мæ сæрмагонд бузныг зæгъын фæнды, чи мæ æмбæрста æмæ ме вварс чи рахæцыд, уыцы æвзарджытæн. Стыр бузныг уын. Сымах æй зонут, æз дебатты дæр æмæ республикæйы цæрджытимæ фембæлдтыты рæстæджы дæр бирæ хæттыты дзырдтон, адæмы равзæрстыл кæй никуы бадызæрдыг кæндзынæн. Æз мæ дзырд,  куыд æрвылхатт, афтæ ныр дæр æххæст кæнын. Уый тыххæй зæгъын æвзæрстытæ нымад кæй æрцыдысты, йæ бæрæггæнæнтæ йын зонут. Гаглойты Аланæн мæ фæнды æнтыстджын куыст Хуссар Ирыстоны адæмы хæрзиуæгæн æмæ мæ ныфс ис, æппæт дæр ын кæй бантысдзæн», – загъта Президент.

Уымæй дарддæр ма Бибылты Анатоли банысан кодта, зæгъгæ, 9 май Хуссар Ирыстон нысан кæнынц Стыр Фыдыбæстæйон хæсты советон адæмы Уæлахизы 77 азон бæрæгбон.

«Цхинвалы ауагъдæуыдзæн серьезон мадзæлттæ: уыдзæн Уæлахизы æфсæддон парад, рацæудзæн «Æнæмæлгæ полк», – уый республикæйы алы цæрæгæн дæр, алы иронæн дæр тынг ахсджиаг, уаз хъуыддаг у. Райсом мах хъуамæ æрымысæм æмæ нæ хæс сæххæст кæнæм,  цы хъæбатырдзинæдтæм гæстæ схъомыл стæм, цæвиттон нын кæй хъайтардзинæдтæ уыдысты, уыдоны раз».

***

ЦÆК-ы пресс-цертры журналисттимæ фембæлдысты Республикæ Цæгат Ирыстоны Парламенты депутат, Парламенты Нымайæн къамисы сæрдар Гæбæраты Юрийы сæргълæудæй делегаци, кæцыйы сконды сты РЦИ-Аланийы Парламенты депутаттæ Челдыты Витали æмæ Моурауты Алан.

Президентон æвзæрстыты тыххæй йæ хъуыдытæ загъта Челдыты Витали.

«Мах зонгæ стæм президентон æвзæрстыты фыццаг туры фæстиуджытимæ дæр. Кæй зæгъын æй хъæуы, фыццаг тур хуыздæр организацигонд уыд. Æвзæрстытæ цыдысти динамикондæрæй.

Абон мах уыдыстæм фараст æвзарæн фадыджы. Æвзарджыты активондзинад уыд рæстæмбис – 30-40 проценты. Æмбарæм æй, æвзарджытæ изæрырдæм кæй фæактивондæр вæййынц.

Мах ныхас кодтам, æрмæст  фадыгон къамисты сæрдæрттимæ нæ, фæлæ къа-мисты æппæт уæнгтимæ дæр. Хорз æй зонут, фадыгон æвзарæн къамисты сконды æндæр партиты минæвæрттæ дæр кæй вæййынц, уыцы нымæцы, дыккаг турмæ цы кандидаттæ нæ ахызтысты, уыдон минæвæрттæ дæр. Хъусдарджытæ дзырдтой, фæткхалыны цæутæн бынат кæй уыд, уый тыххæй. Фæлæ сæ куы бафарстон цахæм фæткхалæнтæ сæм уыд, уæд загътой, зæгъгæ, уал арæзт æрцæудзысты суагъæтæ, уый фæстæ сæ базонгæ кæндзысты фæткхалыны цаутимæ. Раст зæгъгæйæ, дзы мах серьезон фæткхалыны цаутæ нæ рахатыдыстæм», – загъта Челдыты Витали æмæ æвзæрстыты цытæн раарфæ кодта Хуссар Ирыстоны адæмæн.

Уый банысан кодта, президентон æвзæрстыты Хуссар Ирыстоны стыр фæлтæрддзинад.

«Куыд æй бахъуыды кодтам, афтæмæй Хуссар Ирыстон ныр фæндзæм Президенты æвзары. Уый ууыл дзурæг у, æмæ республикæ равзæрста размæдзыды демократон фæндаг. Уæрæсе хъуамæ сахуыр кæнид, æвзæрстыты кампани куыд уадзын хъæуы, уый тыххæй  Хуссар Ирыстоны президентон æвзæрстыты фæлтæрддзинад. Кандидатты минæвæртты къухфыстытимæ цы модель равзæрста Хуссар Ирыстон, ахæм Уæрæсейы нæй. Зæгъдзынæн уый дæр, æмæ куыд парламентон, афтæ президентон æвзæрстытæм дæр Хуссар Ирыстонмæ хъусдарджытæ алы бæстæтæй, уыцы нымæцы Луганскы, Донецкы Адæмон республикæтæй кæй æрцæуынц, уый нысан кæны, куыд паддзахад, афтæ Хуссар Ирыстоны геополитикæ дунеон аренæйы йæ позици кæй фидар кæны», – загъта цæгатирыстойнаг парламентари æмæ банысан кодта, ныфс æй кæй ис, æвзæрстытæ нормалонæй кæй ацæудзысты, уымæй.

Радзырдта ма, хайад кæй райста Советон Цæдисы хуссарирыстойнаг хъайтарты цыртыты раз дидинджыты æвæрыны церемонийы æмæ банысан кодта, йæ зæрдæмæ кæй фæцыдысты уыцы церемонийы Президент Бибылты Анатолийы ахæм ныхæстæ: «Куыдфæндыйæ дæр æвзæрстыты кампанийы уæлахизуæвæг адæмы фæндон хъуамæ уа».

«Нæхицæн мæ фæнды ахæм фæндиæгтæ, цæмæй Цæгат Ирыстоны дæр уагъд цæуой ахæм æвзæрстытæ. Сымах махæн цæвиттойнаг стут», – йæ ныхасы кæрон банысан кодта Челдыты Витали.

ЦÆК-ы пресс-центры раныхас кодтой иннæ хъусдарджытæ дæр.

ОСИАТЫ Индирæ