Хуссар Ирыстоны Централон æвзарæн къамис ныртæккæ уæхскуæзæй кусы Республикæ Хуссар Ирыстоны президентон æвзæрстытæм бацæттæ кæныныл. Бæрæг куыд у, уымæ гæсгæ ивгъуыд аз бæстæйы Парламент сфидар кодта Централон æвзарæн къамисы уæнгтæ. Уый фæстæ Æвзарæн къамис ауагъта цалдæр æмбырды, цыран, фыццаджыдæр, уыдон æмбæлон уагмæ æркодтой закъондæттынады нормæтæ – Президенты бынатмæ æвзæрстыты фæдыл конституцион закъон æмæ сæйраг гарантиты фæдыл конституцион закъон.

Ацы закъæттыл бакуыстой Æвзарæн къамисы юристтæ. Уый фæстæ æрвыст æрцыдысты æркæсынмæ Хуссар Ирыстоны Парламентмæ, фæлæ, хъыгагæн, абоны онг дæр уыдоныл куыст нæма ‘рцыд.

Централон æвзарæн къамисы уæнг Цоциты Игорь нын куыд фехъусын кодта, уымæ гæсгæ Æвзарæн къамисы ныридæгæн уагъд æрцыд къорд рабадты, кæронмæ бæстон æрцыдысты сæйраг фарстытæ. Куыст æрцыд политикон партитæ сæ кандидатты куыд раразмæ кæной æмæ инициативон къордтæн инструкцитыл.

Уый нын куыд загъта, уымæ гæсгæ зноны бонмæ Централон æвзарæн къамисмæ бахатыдысты 15 инициативон къорды æмæ 4 политикон партийы, кæцытæ раразмæ кодтой сæ кандидатты Президенты бынатмæ æвзæрстыты хайад райсынмæ.

«Куыд зонæм, афтæмæй ацы 15 инициативон къордæй дыууæйæ – Годжыцаты Нелли æмæ Хуссар Ирыстоны адæмы 1989-2008 азты Фыдыбæстæйон хæсты ветеранты инициативон къордтæ нæм дыккаг хатт нал фехъусын кодтой кандидаттæ раразмæ кæныны тыххæй инициативон къорды радон æмбырдтæ ауадзыны фæдыл. Уымæ гæсгæ ныртæккæ сты 13 инициативон къорд æмæ цыппар политикон партийы. Уыдон 18 февралмæ хъуамæ ауадзой æмбырдтæ æмæ съездтæ», – банысан кодта Игорь.

Централон æвзарæн къамисы уæнгтæ ныртæккæ уавæртæм гæсгæ архайынц, цæмæй алкæцы инициативон къордты æмбырдты æмæ партиты съездты хайад райсой. Уый фæстæ уыдон æвзарæн къамисы сæргълæууæджы номыл бадæттынц æмбæлон информаци радон æмбырд куыд ацыд, уый тыххæй, æвзарæн къамис цы инструкцитыл бакуыста, уыдон хынцгæйæ. Уымæ гæсгæ бæрæг цæуы, радон æмбырды барадон бындуртæ хынцыд цæуынц æви нæ, уый.

Æвзæрстыты фæдыл закъонмæ гæсгæ инициативон къордтæ æмæ партитæн фадат ис, цæмæй 20 февралы изæры 18:00 сахатмæ фехъусын кæной Централон æвзарæн къамисмæ, кандидат раразмæ кæныны фæдыл инициативон къордты æмбырдтæ æмæ съездтæ ауадзыны тыххæй. Уыцы бонæй фæстæмæ Хуссар Ирыстоны Централон къамис æрæвналдзæн куысты дарддæры этапмæ – регистрацимæ.

«Инициативон къордтæ æмæ политикон партитæй раразмæгонд кандидаттæ Централон æвзарæн къамисмæ хъуамæ æрбарвитой сæ æххæстбарджын минæвæртты æмæ цæуой регистраци. Уый фæстæ сын Æвзарæн къамисы уынаффæмæ гæсгæ бар ис къухфыстытæ тымбыл кæнынæн», – дзырдта Æвзарæн къамисы уæнг.

Президентон æвзæрстыты хайад райсынмæ цы кандидаттæ цæуынц, уыдон æмбæлон документты пакет æвзарæн къамисмæ куы æрбавдисой, уæд къамисы уæнгтæ фондз боны æмгъуыдмæ хъуамæ æркæсой æмæ уынаффæ рахæссой, регистраци æрцæуа радон кандидат, æви нæ. Уый фæстæ кандидаттæн лæвæрд цæуы мæйы æмгъуыд. Уыцы рæстæджы уыдонæн фадат ис агитацион куыст кæнынæн – æвзарджытимæ æмбырдтæ уадзын, дебаттæ æмæ æндæр агитацион куыстæн.

 

Централон æвзарæн къамисы куыст здæхт у æргом æвзæрстытæ     ауадзынмæ

Цоциты Игорь нын куыд фехъусын кодта, уымæ гæсгæ ныртæккæ егъау куыст цæуы, цæмæй Централон æвзарæн къамисæн скуса йæ ног сайт. Архайæг сайтыл дæр мыхуыр цæуы æмбæлон информаци, фæлæ æввахс рæстæджы сайты уый размæ адресыл хъуамæ скуса ног сайт. Уым мыхуыр цæудзысты Централон æвзарæн къамисы уынаффæтæ æмæ уагæвæрдтæ, документтæ, æмбырдтæ æмæ фæстаг хабæрттæ. Республикæ Хуссар Ирыстоны президентон æвзæрстыты закъондæттынад æмæ процессмæ цымыдисгæнæг не ‘мбæстæгтæ æмæ бæстæйæн æддейæ цæрджытæн фадат уыдзæн æппæт информациимæ зонгæ кæнынæн.

Æвзарæн къамисы сайты руаджы æвзæрстыты хайад цы хъусдарджытæ исдзысты, уыдонæн дæр фадат уыдзæн, цæмæй æмбæлон документтæ саразой Хуссар Ирыстоны Централон æвзарæн къамисы сæрдары номыл.

 

Цæттæ цæуы Æвзарæн къамисы пресс-центр

Ныртæккæ егъау техникон куыст цæуы, цæмæй Æвзарæн къамисы информацион пресс-центр дзуапп дæтта нырыккон домæнтæн, не ‘мбæстæгтæн фадат уа æргом æвзæрстытæм кæсынæн. Республикæйы æвзарæн фадгуытæй сæ фылдæры æвзæрстытæ куыд уагъд цæуынц, уый фæдыл уагъд цæудзысты комкоммæ эфиртæ .

Нæ уацх.

Comments are closed, but trackbacks and pingbacks are open.