10 апрелы Хуссар Ирыстоны президентон æвзæрстыты нæ республикæйы æмбæстæгтæ равдыстой стыр активондзинад.
Централон æвзарæн къамисы минæвар куыд фехъусын кодта, афтæмæй боны 2 сахатмæ æвзæрстыты хайад райстой республикæйы æвзарджыты 31,20 проценты, уыцы нымæцы Цхинвалы – 44,02 проценты, Цхинвалы районы – 54,74 проценты, Дзауы районы – 55,08 проценты, горæт Къуайсайы – 55,92 проценты, Знауыры районы – 73,03 проценты, Ленингоры районы – 62,03 проценты. Æдæппæт республикæйы æвзарджытæй хъæлæс радтой 49 проценты.
Бæрæг куыд у, афтæмæй Цæгат Ирыстоны территорийыл цы дыууæ æвзарæн фадыджы бакондæуыд, уым дæр адæм равдыстой стыр активондзинад, боны 2 сахатмæ хъæлæс радтой: фыццаг æвзарæн фадыджы 1150 адæймаджы, дыккаджы та – 1155 адæймаджы.
ЦÆК-ы минæвар куыд банысан кодта, афтæмæй уыцы бæрæггæнæнтæм гæсгæ, ныридæ-гæн зæгъæн ис, республикæйы территорийыл æвзæрстытæ нымад кæй æрцыдысты.
Изæры 8 сахаты бæрæггæнæнтæм гæсгæ Цхинвалы хъæлæс радтой æвзарджыты 81,46 проценты, Цхинвалы районы 84,55 проценты, Дзауы районы – 84,37 проценты, Къуайсайы – 80,5 проценты, Знауыры районы – 80,23 проценты, Ленингоры районы – 77,67 проценты. Хуссар Ирыстоны æдæппæтæй хъæлæс радтой æвзарджыты 82,07 проценты.
Цæгат Ирыстоны территориалон æвзарæн фадгуыты та хъæлæс радтой 4377 æвзарæджы, Мæскуыйы – 387 адæймаджы, Сухумы та – 22 адæймаджы.
Банысан кæнын хъæуы уый дæр, æмæ рæстæгæй-рæстæгмæ, видеобастдзинады руаджы ЦÆК-ы пресс-центр территориалон æвзарæн фадгуытæй кæй иста зонæнтæ.
Изæры 8 сахалыл æвзарæн фадгуытæ æхгæд æрцыдысты æмæ райдыдтой æвзарæн бюллетентæ нымайын .
ЦÆК-ы бæрæггæнæнтæ куыд фенын кодтой, афтæмæй Къуайсайы территориалон æвзарæн фадгуыты бюллетенты 68 проценты банымады фæстæ Президент Бибылты Анатоли райста 42,2 проценты, парти «Ныхас»-ы лидер Гаг-лойты Алан – 43,51 проценты, Мулдарты Гарри – 4,94 проценты, Плиты Александр – 3,06 проценты, Тасойты Димитр – 1,35 проценты.
***
11 апрелы Централон Ææвзарæн къамисы сæргълæууæг Гæджиты Эмилия куыд банысан кодта, афтæмæй æвзæрстыты рæстæджы хъæлæс радтой 28 976 адæймаджы, уый у æвзарджыты иумиаг нымæцы 74,26 проценты.
ЦÆК-ы бæрæггæнæнтæм гæсгæ, бюллетенты 95 проценты банымады фæстæ Гаглойты Аланæн хъæлæс радтой æвзарджыты 36,9 проценты (10 705 адæймаджы), Бибылты Анатолийæн – 33,5 проценты (9 706 адæймаджы), Мулдарты Гарри – 8,9 проценты (2 592 адæй-маджы), Плиты Александр – 11,9 проценты (3 334 адæймаджы) Тасойты Димитр – 2,8 проценты (822 адæймаджы), алкæйы ныхмæ – 1,8 проценты (528 адæймаджы).
Гæджиты Эмилия куыд загъта, афтæмæй кандидаттæй сæ иу дæр 50 проценты хъæлæстæ кæй нæ райста, уый фæстиуæгæн республикæйы ауагъдæуыдзæн æвзæрстыты дыккаг тур, кæцы развæлгъау бæрæггæнæн-тæм гæсгæ, уыдзæн дыууæ къуырийы фæстæ, ома 24 апрелы.
***
Централон æвзарæн къамисы пресс-центры раныхас кодтой, РХИ-йы президентон æвзæрс-тытæм республикæйæн æддейæ цæстдарджыты хуызы чи æрцыд, уыцы делагациты ми-нæвæрттæ.
Уæрæсейы Федерацийы Федералон Æмбырдæй делегацийы сæргълæууæг Цеков Сергей банысан кодта, зæгъгæ: «Мах знон æрцыдыстæм Хуссар Ирыстонмæ, базонгæ стæм æвзæрстыты хъæлæс дæттыны процедурæимæ. Фембæлдыстæм республикæйы къухдариуæгадимæ. Абон та уыдыстæм цалдæр æвзарæн фадыджы. Уыдыстæм Ленингоры районы æвзарæн фадгуыты. Федтам, æвзæрстыты тыххæй Хуссар Ирыстоны закъондæттынад æххæст кæй цæуы, уый. Æвзарæн къамисты уæнгтæ куыстой РХИ-йы закъонмæ гæсгæ. Ницы фæткхалæн цаутæ дзы федтам, æппæт дæр уыд нывыл. Æвзарæн процесс цыд бæрзонд æмвæзадыл, æвзæрстыты фæткойтæ æххæст кæнгæйæ. Нæ зæрдæмæ тынг фæцыд, кандидатты æууæнчы адæймæгтæ алы бюллетеныл дæр сæ къухтæ кæй фыссынц, уый дæр æмæ паспорттыл мыхуыры нысан кæй æвæрдтой, уый дæр. Уыцы фæтк ууыл дзурæг у, æмæ æвзæрстыты процессы фальсификацитæн гæнæн нæ уыдзæн. Нæ зæрдæмæ фæцыд адæмы активондзинад дæр. Æвзарæн фадгуытæм адæм цыдысты райзæрдæйы уагимæ. Ленингоры фæстагмæ цы æвзарæн фадыгмæ бацыдыстæм, уым хъæлæс радтой æвзарджыты 40 проценты.
Хуссар Ирыстоны æвзæрстыты æз нымайын демократоныл. Æз нæ дзурын æвзæрстыты агъоммæйы процессыл, фæлæ æвзæрстыты рæстæджы адæм сæрибарæй равдыстой сæ фæндон».
«Æз, цæстдарæджы хуызы бирæ бæстæты æвзæрстыты райстон хайад. Зæгъдзынæн уый, æмæ æвзæрстыты хъуыддаджы Хуссар Ирыс-тоны фæлтæрддзинад бирæ бæстæтæ хъуамæ сахуыр кæниккой æмæ йæ райсиккой. Ныхасы сæрибардзинад, сæрибарæй дæ фæндон зæгъын æмæ демократондзинады тыххæй сæхицæй цы бæстæтæ æппæлынц, уыдон хъуамæ сахуыр кæниккой Хуссар Ирыстоны фæлтæрддзинад. Нæ зæрдæмæ тынг фæцыд РХИ-йы æвзæрстыты процесс», – загъта уæрæсейаг делегацийы уæнг Крым Казаноков.
УФ-йы Паддзахадон Думæйы депутат Яна Лантратова: «Мах ницы фæткхалынад фæхатыдыстæм. Æвзарджыты активондзинад нæм сæвзæрын кодта тынг хорз тæлмæнтæ. Централон æвзарæн къамис æвзарæн кампанимæ йæхи хорз кæй бацæттæ кодта, уый дæр бæрæг уыд. Мах æй фæхатыдыстæм, Хуссар Ирыстоны æвзарджытæ æвзæрстытæм сæхи кæй бацæттæ кодтой æмæ сын æвзæрстытæ бæрæгбоны хуызæн кæй уыдысты, уый. Банысан ма кæндзынæн уый дæр, æмæ агитацион рæстæг дæр æмæ «сабыр бон» дæр æнæ фæткхалдæй ацыдысты».
Уæрæсейы Федерацийы æвзарæн къамисæй делагацийы сæрдар Константин Мазуревский: «Цы æвзарæн фадгуыты уыдыстæм, уым бирæ адæм цыд хъæлæсдæттынмæ. Мах æвдисæн уыдыстæм, æвзарæн фадгуытæ рæстæгыл кæй байгом сты, уымæн. Æвзарджытæ активæнæй цыдысты æмæ хъæлæс лæвæрдтой. Хъæлæсдæттыны рæстæджы ницы фæткхалынад фæхатыдыстæм», – загъта уый æмæ ма йæ ныхасмæ бафтыдта, зæгъгæ, тынг райгондæй баззадысты республикæйы æвзæрстыты процессæй.
Республикæ Венесуэлæйы Националон æвзарæн советы къухдариуæггæнæг Леонель Энрике Парикайы ныхæстæм гæсгæ, Хуссар Ирыстоны президентон æвзæрстыты легитимондзинадыл ничи дызæрдыг кæны. «Мах нæхи цæстæй федтам, æвзæрстыты процесс куыд цæуы, уый. Азылдыстæм æвзарæн фадгуытыл æмæ нæ зæрдæмæ фæцыд Хуссар Ирыстоны адæмы ахæм демократон фæндравдыст. Федтам, алы æвзарæн фадыджы дæр кæй ис алкæцы кандидаты æууæнчы адæймаг. Уыимæ ма паспортты мыхуыры нысан æвæрд кæй цæуы, уый дæр ахсджиаг хъуыддаг у. Уымæн æмæ уый бæрæг кæны, алкæцы адæйма-гæн дæр иу хъæлæсы бар кæй ис», – банысан кодта венесуэлаг цæстдарæг.
Австриаг цæстдарæг Патрик Поппель: «Æз куыд федтон, афтæмæй Хуссар Ирыстон куыд паддзахад, афтæ архайы æмæ рæзы нормалонæй, куыд Европæйы бæстæтæ, куыд Уæрæсе, афтæ, республикæйы дæр кусынц æппæт паддзахадон структурæтæ дæр, æмбæлон æгъдауæй цæуы æвзæрстыты процесс дæр. Мæхæдæг сæ кæй федтон æмæ сæ кæй базыдтон, уый мæнæн тынг ахсджиаг у. Уыдæтты тыххæй æз дзурдзынæн Европæйы».
Централон æвзарæн къамисы пресс-центры раныхас кодтой æндæр цæстдарджытæ дæр. Уыдон бузныг загътой РХИ-йы Централон æвзарæн къамисæн, хорз кæй бакуыста, уый тыххæй. Бузныджы ныхæстæ ма загътой Мидхъуыддæгты министрады кусджытæн дæр, æмбæлон æмвæзадыл фæтк кæй хъахъхъæнынц, уый тыххæй æмæ банысан кодтой, зæгъгæ, республикæйы æвзæрстытæ ацыдысты тынг раст æмæ цæсгомджынæй.
ОСИАТЫ Индирæ
Comments are closed, but trackbacks and pingbacks are open.