Хицауады Сæрдар Бекъойты Геннади ауагъта кусæгон æмбырд, кæцыйы хайад райстой финансты министры хæстæ æххæстгæнæг Тыбылты Фатимæ, физикон культурæ æмæ спорты фæдыл комитеты сæрдар Зассеты Сергей, спорты фарстыты фæдыл Президенты уынаффæгæнæг Джиоты Руфин, фæсивæды, спорты æмæ туризмы хъуыддæгты фæдыл Парламенты комитеты сæрдар Гæбæраты Инал, спортивон уагдæтты къухдариуæггæнджытæ, афтæ ма сæйрагдæр тренертæ.

Боны фæткы уыдис дыууæ фарсты, кæцытæ хаудысты спорты къабазы проблемæтæм æмæ физкультурон – спортивон организациты, спортивон здæхты уæлæмхас ахуырады уагдæтты кусджыты куыст разæнгард кæнынмæ.

Æмбырды хайадисджытæ æркастысты физикон культурæ æмæ спорты фæдыл Комитеты бавдисгæ Уагæвæрды проектмæ, кæцыйы бæлвырд цæуынц спортивон уагдæтты кусджытæн-разамонджытæн, методисттæ, тренертæ, тренертæ-ахуыргæнджытæн æхцайы бафыстыты бæрцтæ, фæтк æмæ уавæртæ.

«Тренерты куыстмыздты фæдыл ситуацимæ хъæуы ногæй æркæсын, уымæн æмæ уыдон абоны домæнтæн дзуапп нал дæттынц. Нæ сывæллæттæн нын чемпионтæ суæвынæн чи æххуыс кæнынц, уыдонæн се ‘нтыстытæм гæсгæ хъуамæ аккаг аргъ цæуа», – загъта Зассеты Сергей.

Бекъойты Геннади банысан кодта, зæгъгæ, Президент бахæс кодта Хицауадæн, цæмæй бакуыстæуа физикон культурæ æмæ спорты къабазы кусджыты куыст разæнгард кæныны фарстытыл.

«Фарстытæ сты актуалон, скъуыддзаг кæнын кæй хъæуы, ахæмтæ. Спортивон уагдæтты кус-джыты æппæт категориты куыстæн, уæлдайдæр та тренерты-ахуыргæнджыты, кæцыты хъомылгæнинæгтæн вæййы стыр фæстиуджытæ, хъæуы æмбæлон аргъ кæнын», – банысан кодта Хицауады сæргълæууæг.

Бекъойты Геннади физкультурæ æмæ спорты фæдыл комитетæн бахæс кодта, цæмæй финансты министрадимæ бакусой кусджыты категоритæ, разæнгардгæнæн уæлæмхас бæрцтæ сбæлвырд кæныныл, æмæ сæ æввахсдæр рæстæджы бавдисой Хицауадмæ.

Дарддæр æмбырды хайадисджытæ æруынаффæ кодтой алыгъуызон æмвæзадыл ерысты хуссарирыстойнаг спортсменты хайадисты фæдыл Цæгат Ирыстонимæ æмархайды фарстытыл.

Comments are closed, but trackbacks and pingbacks are open.