Кæнынц арæзтадон-цалцæггæнæн куыстытæ

Ӕрвылбон дӕр ахсджиаг куыстытӕ бакӕнинаг вӕййы Цхинвалы горӕты цӕрӕнуатон-коммуналон хӕдзарады управленийӕн ӕмӕ архайынц уыдон рӕстӕгыл ӕмӕ гъӕдджынӕй ахицӕн кӕныныл. Уыцы куыстытӕ та конд цӕуынц куыд горӕты бюджет, афтӕ Инвестпрограммӕйы ӕхцайы фӕрӕзтӕй. Хӕдзарады управленийы хистӕры хӕдивӕг Джиоты Юри куыд банысан кодта, афтӕмӕй куыстыты гуырахсты фылдӕр хай ис Коцойы фырты уынджы ӕмӕ дзы ӕрвылбон дӕр кусджытӕ ӕххӕст кӕнынц арӕзтадон-цалцӕггӕнӕн куыстытӕ.

Ӕрӕджы Сталины уынджы 115-ӕм, 117-ӕм ӕмӕ 119-ӕм хӕдзӕртты ӕнтысгӕйӕ ахицӕн сты нуазыны доны коммуникацион хызӕджы куыстытӕ. Уыцы хӕдзӕртты кӕртытӕ ӕмбӕлон фӕткмӕ ӕркӕныныл ныр та зӕрдиагӕй архайынц горӕты администрацийы арӕзтадон-цалцӕггӕнӕн управленийы кусджытӕ, уыдон сын хӕрзарӕзт кӕнынц сӕ территоритӕ ӕмӕ уал сын бантыст иу хӕдзары раз банывыл кӕнын. Зӕрдиагӕй куыстӕуы, Остъайы фырты уынджы цы дыууӕ цӕрӕн корпусы ис, уым тротуартӕ схӕрзарӕзт кӕныныл, бакуыстой дзы асфальты цъар сӕвӕрыныл дӕр. Уымӕй дарддӕр ма горӕты уынгты ӕвӕрд цӕуынц машинӕты цыд фӕсындӕгдӕр кӕныны тыххӕй обӕуттӕ. Уыдон тынгдӕр хъӕуынц сывӕллӕтты рӕвдауӕндӕттӕ ӕмӕ скъолатӕм ӕввахс бынӕтты, стӕй ма транспорт, фылдӕр кӕм змӕлы, уыцы рæтты, цӕмӕй адӕм уой ӕдас.

Хорз архайы йӕ хӕстӕ ӕххӕст кӕныныл горӕты цӕрӕнуатон-эксплуатацион канторӕйы коллектив дӕр. Уыдон ӕдзухдӕр сты сӕ куысты уӕлхъус ӕмӕ зӕрдиагӕй кусынц сӕ разылӕууӕг хӕстӕ ӕххӕст кӕныныл. Кусджытӕ сӕ хайбавӕрд хӕссынц хӕдзӕртты хӕрзарӕзтадмӕ, номхуындӕй та бирӕуӕладзыгон цӕрӕн хӕдзӕртты бакӕнынц арӕзтадон-цалцӕггӕнӕн куыстытӕ, раивынц зӕронд дуӕртты ногтӕй, афтӕ ма рудзгуыты дӕр. Бахизӕнты къултӕ фӕхуыздӕр кӕнынц, схизӕнты цъӕл асинты сцалцӕг кӕнынц, байсӕрдынц къултӕ ӕмӕ афтӕ дарддӕр. Мӕгуырау нӕ кусы горӕты хӕрзарӕзтады управленийы иннӕ организаци «Ир-дизайн» дӕр. Уый та йӕ хъус дары ӕмӕ светофортӕ чи фехӕлынц, уыдон сцалцӕг кӕнынц, кӕнӕ та сӕ раивынц ногтӕй. Архайынц ӕмӕ сӕ хъус дарынц, уынгты ӕхсӕвыгон цы рухсытӕ ис, уыдон цалцӕг кӕнӕ баххӕст кӕнынмӕ. Республикӕйы бӕрӕг-бонон мадзӕлттӕм горӕт сфӕлындзынц алыгъуызон плакаттӕ ӕмӕ ӕндӕр ахӕмтӕй. Бӕрӕг куыд у, афтӕмӕй нӕ горӕты уынгты бирӕтæн фыст нӕ уыдысты сӕ нӕмттӕ ӕмӕ хæдзæртты номыртӕ дӕр, фӕлӕ ныр уыцы згъуыдӕн йӕ фылдӕр хай ӕрбӕстон. Ацы куыст кӕронмӕ бакӕныныл организаци кусы дарддӕр дӕр.

Хуыбиаты Никъала