Нæ горæты Джыгкайы фырты уынгыл ацы бонты æмызмæлд кæнынц кусджытæ. Ам уал фыццаградон куыстытæ цæсгомджынæй бакодтой «Водоканал»-ы кусджытæ. Коммуникацион хæххытæ, кæй базæронд сты, уымæ гæсгæ сæ ногтæй баивтой. Хæдзæрттæм уагъд æрцыдысты канализацион æмæ донуадзæн хæххытæ дæр. Ныр та дарддæр хæрзарæзтадон куыстытæм æрывнæлдтой «Дорэкспострой»-ы кусджытæ. Систой фæндагæн йæ уæлцъар, стæй дзы ныккалдтой хуыр, ныннадтой йæ, саив кодтой тротуартæ, æвæрд сыл æрцыдис тротуарон плиткæ. Ныр та æрæвнæлдтой фæндаг асфальт кæнынмæ. Сæвæрдтой йыл асфальты фыццаг фæлтæр. Æртæ – цыппар боны фæстæ та йыл сæвæрдзысты дыккаг фæлтæр. Зæгъын хъæуы уый, æмæ ам цырд кæй кусынц цы 10 кусæджы дзы ис, канд уыдон нæ, фæлæ æмызмæлд кæнынц 10 уæзласæн машинæйы дæр. Уыдонæй иутæ æрбаласынц хуыр, иннæтæ та – асфальт. Цæрдæг æвналынц кусджытæ сæ куыстмæ. Иутæ архайынц змис алæгъз кæныныл, ныннæмынц æй, уый фæстæ та йыл æркалынц асфальт æмæ йæ алæгъз кæнынц, тулджытыл цы цыппар кусæджы кусынц, уыдон.
«Дорэкспострой»-ы генералон директор Лалыты Мурат куыд загъта, афтæмæй бонраздæр та асфальты фыццаг фæлтæр æвæрд æрцыд Дмитровы уынгыл. Ныр та ахиздзысты Аланты, стæй Нарты, Руставелийы æмæ Чиаты Иосифы номыл уынгтæм.
Мурат ма куыд банысан кодта, афтæмæй Коцты Грийы, Тæболты Сергей æмæ Коцойты Арсены уынгтыл нырма цæуынц асфальтмæ цæттæгæнæн куыстытæ.
«Дорэкспострой»-ы генералон директоры хъуыдымæ гæсгæ, уыдон æппæт уынгты дæр цалцæггæнæн куыстытæ бакæндзысты рæстæгыл, цалынмæ боныгъæдтæ амонынц, уæдмæ. Уымæн æмæ «Дорэкспострой»-ы кусджытæ хорз æмбарынц, къæвда рæстæджыты, стæй сæлын куы райдайа, уæд цы асфальт саразой, уый бирæйы фаг не скомдзæн, фехæлдзæн. Афтæ у йæ технологи.
Æппæт куыстытæ дæр баконд æрцæудзысты 2018-2019 азты Инвестпрограммæйы фæлгæтты.
Бестауты Валя
Comments are closed, but trackbacks and pingbacks are open.