Кæд æмбæлон уавæртæ нæй, уæддæр

Хуссар Ирыстоны рæсугъддæр къуымтæй иу Къуыдаргом у. Кæд ацы комбæстыл æрдз рахæтыд зæххæнкъуысты хуызы, уæддæр къуыдаргоймæгтæ сæ къухтæ нæ ауагътой, фæлæ сæ бон куыд у, афтæ архайынц сæ райгуырæн къуымы размæцыдыл.

Ахæм адæймæгтæм хауы Кировы хъæуы Культурæйы хæдзары сæргълæууæг Танделаты Луизæ дæр. Уый ацы бынаты кусы 46 азы, 1988 азæй та хæссы Культурæйы сгуыхт кусæджы ном. Кæд ын кусынæн æмбæлон фадæттæ нæй, уæддæр йæ разылæууæг хæстæ æххæст кæны, йæ фадæттæ йæ куыд амонынц æмæ йæ бон цас у, уымæй. 

Культурæйы хæдзары ивгъуыд мæйты ауагъдæуыд ахæм бæрæгбонон мадзæлттæ, куыд концерт Фыдыбæстæ хъахъхъæнæджы боны цытæн, банысан кодтой Сылгоймæгты æппæтдунеон бон – 8-æм марты бæрæгбон дæр. Концерт ма  ауагътой 27 майы фæстаг дзæнгæрæджы сæраппонд. Сорганизаци кодтой равдыст-конкурс «Æвзонг нывгæнджытæ», цыран сæ бакæнгæ куыстытæ равдыстой бынæттон æвзонг нывгæнджытæ.

Кировы Культурæйы хæдзар хайад райста Цхинвалы «Ирон зарæг»-ы конкурсы æмæ Сывæллæтты галуаны равдыст «Цвети Осетия моя»-йы. Ацы равдысты Культурæйы хæдзар райста призон бынат. Культурæйы хæдзар комбæсты цæрджытæн равдыста ногазон концерт дæр.

Уыдæттæй дарддæр ма июлы мæйы культурæйы артдзæсты фембæлдтытæ уыд экономикон зонæдты доктор Æлборты Роланд æмæ Цæгат Ирыстоны культурæйы сгуыхт кусæг, музыкалон инструменттæ, уыцы нымæцы ирон фæндыр аразæг Æлборты Геннадиимæ. Уыдон сæ дыууæ дæр астæуккаг ахуыр фесты Кировы астæуккаг скъолайы.

Куыд ма загътам, афтæмæй Культурæйы хæдзары нормалон куыстæн нæй æмбæлон уавæртæ. Кæд уагдоны кусынц кафт, зард, драмон æмæ æвзонг нывгæнджыты кружоктæ, уæддæр сын кадртæ дæр æмæ штаттæ дæр кæй нæй, уый тыххæй семæ кусы Танделаты Луизæ йæхæдæг, фæндырыл дæр йæхæдæг цæгъды æмæ хормейстер дæр йæхæдæг у, уымæй дæр – æнæ мыздæй. Уыимæ ма сын нæй национ дарæс дæр, музыкалон инструменттæй та сын ис иу фæндыр æмæ иу гуымсæг. Музыкалон центр та Луизæ балхæдта, клубæн ын цы æхцайы фæрæзтæ лæвæрдтой, уыдонæй.

Культурæйы хæдзары ис дыууæ чысыл хатæны. Пец, суг æмæ дзы рухс кæй нæй, уый аххосæй дзы зымæг кусынæн æппындæр ницы уавæртæ ис. Къуындæг уавæртæм нæ кæсгæйæ, клубы ис рагон ирон мигæнæнты, бынæттон нывгæнджыты æмæ рагон хæрд-гæхуыдты равдыстытæ.

Танделаты Луизæйы уырны, республикæйы къухдариуæгады æххуысæй сæ куысты уавæртæ кæй фæхуыздæр уыдзысты, æмæ дзырд дæтты, уæд сæ куысты гъæд дæр кæй фæхуыздæр уыдзæн.

Нæ уацх.