Анахарсисы номыл республикон библиотекæйы фоейы уагъд æрцыд Стыр Фыдыбæстæйон хæсты Уæлахизы боны цытæн равдыст, цыран æвæрд æрцыдысты, нывгæнæн ахуыргæнæндон каст чи фесты, уыдоны дипломон куыстытæ. Мадзал сорганизаци кодта Республикæйы Культурæйы министрад. Равдыстмæ фæуазæг сты нæ Республикæйы Культурæйы министр Зассеты Жаннæ, Нывгæнджыты цæдисы сæргълæууæг  Цхуырбаты Тамерлан, нывгæнæн ахуыргæнæндоны директор Зассеты Сæрмæт æмæ ацы уагдоны ахуыргæнджытæ.

Культурæйы министр Зассеты Жаннæйы ныхæстæм гæсгæ ацы равдыст организаци æрцыд Стыр Фыдыбæстæйон хæсты советон адæмы Стыр уæлахиздзинæдты цытæн. «Алкæцы нывыл  дæр зыны, зæрдæйæ конд кæй сты. Нæ адæммæ уыйбæрц курдиатджын нывгæнджытæ кæй ис, уымæй мах хъæздыг стæм. Мæн фæнды стыр бузныг зæгъын нывгæнæн ахуыргæнæндоны ахуыргæнджытæн, кæцытæ цæттæ кæнынц фидæны нывгæнджыты. 

Махæн нæ зæрды ис нæ нывгæнджыты куыстытæ Уæрæсейы алы горæттæм ласын, цæмæй сæ зонгæ кæнæм не ‘взонг нывгæнджыты сфæлдыстадимæ»,- банысан кодта Зассеты Жаннæ. Уый нывгæнæн ахуыр-гæнæндонæн бакодта зæрдылдарæн лæвар – змисæй кусынæн сæрмагонд стол.   

Нывгæнджыты цæдисы сæрдар Цхуырбаты Тамерлан дæр бузныджы ныхæстæ загъта ацы равдыст сорганизацигæнджытæн æмæ æрдзырдта нæ республикæйы нывгæнæн ахуыргæнæндоны сырæзты историйыл. Уый банысан кодта, зæгъгæ, уыцы     хъуыддагыл стыр куыст бакодта зынгæ ирон нывгæнæг Тугъанты Махарбег. «Хуссар Ирыстоны нывгæнæн ахуыргæнæндон аивады дæснытæ дзæвгар схъомыл кодта æмæ мæ стыр бузныг фæнды зæгъын ацы ахуыргæнæндоны курдиатджын ахуыргæнджытæн. Ацы уагдон кæддæриддæр зындгонд уыд йæ хорз традицитæ æмæ коллективæй, цыран ныры онг дæр кусынц бæрзондквалификациджын ахуыргæнджытæ. Стыр бузныг мæ зæгъын фæнды ацы нывгæнæндоны директор Зассеты Сæрмæт æмæ æппæт уыдонæн, кæцытæ егъау хайбавæрд бахастой Хуссар Ирыстоны хуызфыссынады аивады  рæзтмæ. 

Равдысты сæйраг нысан уыд адæймаджы миддунейы рæсугъддзинад æмæ хъæздыгдзинад равдисын. Куыстытæ сты хицæн æмæ хицæн темæтыл. Нывгæнджытæ райгуырæн бæстæйы æрдзы рæсугъддзинад равдыстой алыварсонæй. Мадзалмæ æрбацæуджытæ зылдысты нывтыл,  зонгæ кодтой  нæ курдиатджын æрыгон нывгæнджыты куыстытимæ. Сæ цæстæнгасæй бæрæг уыд, равдыст сæ зæрдæмæ кæй фæцыд, æмæ дзы æхцондзинад кæй истой, уый. КОКАЙТЫ Заринæ

Comments are closed, but trackbacks and pingbacks are open.