Пандеми, коронавирус, социалон дистанци, индивидуалон бахъахъхъæныны фæрæзтæ – ацы ныхæстæ ныртæккæ ныббиноныг сты нæ ныхасы æмæ нын цæхгæр фæивтой нæ цард алыварсонæй, фæивта æхсæнад æмæ адæмы ахаст цардмæ. Æрвылбон дæр ацы низы фæстиуæг рабæрæг кæныны фæдыл уагъд цæуынц иртасæнтæ.
Фæстаг рæстæджы коронавирусон инфекци рабæрæг кæныны фæдыл цы иртасæнтæ арæзт æрцыд ПЦР лабораторийы, уыдонæй знон 63 тесты равдыстой æвæрццаг фæстиуæг. Бæстæйы сæйраг санитарон дохтыр Коцты Маринæйы ныхæстæм гæсгæ уыдон сты иу боны дæргъы бæрæггæнæнтæ.
Уый радзырдта, ацы хæцгæ низæй рынчынтæ кæм хос кæнынц, цал æмбæстагæн нысан æрцыд амбулаторон æгъдауæй хос кæнын æмæ æндæр хабæрттыл.
Ацы низы ныхмæ хъазуатон тох цæуы республикæйы иуæй-иу районты. 38 адæймаджы ацы диагнозимæ сты районон медицинон уагдæтты. Иумиагæй сисгæйæ, Хуссар Ирыстоны медицинон хосгæнæн уагдæтты низы ныхмæ хос цæуы 231 пациентæн. Медицинон хыгъды сты 968 æмбæстаджы, кæцытæ рынчын сты коронавирусæй æмæ амбулаторон æгъдауæй хос та цæуы 737 адæймагæн.
Сæйраг инфекционисты комментаритæ
Бæстæйы Югосетпотребнадзоры бæрæггæнæнтæм гæсгæ дунейыл пандеми рапарахатæй фæстæмæ Хуссар Ирыстоны ацы низæй фæрынчын иу мин адæймаджы бæрц. Хъыгагæн, йæ амæттаг баисты 14 адæймаджы.
Низ апарахат кæнынæн фадæттæ ма радтыны тыххæй æмбæлон организаци рекомендаци кæны маскæтæй пайда кæныны режим хынцын, уымæн æмæ уымæй хъахъхъæнæм нæхи æмæ нæ алыварс адæмы дæр.
Бæстæйы сæйраг инфекционист Джиоты Элеонорæйы ныхæстæм гæсгæ дыууæсæдæ адæймагæй фылдæрæн хос цæуы нæ республикæйы бирæпрофилон медицинон центры «сырх зонæйы». Уыдонæй фæндзайы бæрц хос кæнынц медицинон центры инфекцион корпусы, сывæллæтты рынчындоны бæстыхайы сæдæ фæндзайæ фылдæр. Сæ æнæниздзинад уæззау у иуæндæс пациентæн, хæдзарон уавæрты хос кæнынмæ афыстой дыууын адæймаджы бæрц. Цыппор адæймагæй фылдæр та уæрæсейаг æфсæддон госпиталы.
Æфсæддон медиктæ дæр хæссынц сæ хайбавæрд низ аиуварс кæныны хъуыддагмæ
Ныгуылæн æфсæддон зылды æфсæддон медиктæ мобилон бирæпрофилон госпиталы дæр дарддæр кусынц рынчын æмбæстæгтæ исын æмæ сын æмбæлон хосгæнæн-диагностикон мадзæлттæ уадзыныл. Ацы госпиталь ифтонг у нырыккон медицинон ифтонггæрзтæй, кæцыты руаджы тыхст рынчын æрцæуы æмбæлон сгæрст æмæ йын уый фæстæ цæуы æмбæлон хос ног коронавирусон инфекцийы ныхмæ.
КЪÆБУЛТЫ Марина
Comments are closed, but trackbacks and pingbacks are open.