Ныртæккæ дзыллон информацийы фæрæзтæн, стæй адæмæн сæ сæйраг дзуринаг у, дунейыл цы вирус ахæлиу, уый. Цы нæ у, ууыл дæр бафтауынц къæхтæ æмæ къухтæ æмæ адæмы æнцойад фехæлд. Æцæг афтæ тæссаг у æмæ дзы ахæм уды зиæнттæ цæ-уы, коронавирус æви гриппы вирус у, уый бæлвырд ничи зоны, Ирыстоны дзы иунæг адæймагæн дæр йæ дард хион, гъе йæ дард зонгæ дæр нæ фæрынчын.
Фæлæ дæ цы фæнды, “уæле” цы зæгъой, уыдон æххæст кæнын хъæуы. Æмæ республикæйы разамынд дæр зæрдиагæй архайы низ ма ‘рбауадзыныл.
Ныртæккæ республикæйы, дохтырты бæрæггæнæнтæм гæсгæ, иунæг рынчын дæр нæй. Фæлæ ис, фæсарæнтæй чи æрцыд, ахæм 500 адæймаджы. Уыдонæн бæрæг цæуы се ‘нæниздзинад.
Ацы бонты куыст цæуы Тагъд æххуысы клиникон рынчындон ссæрибар кæныныл. Цы цалдæр хайады дзы ис, уыдоны рынчынты хъуамæ схуыссын кæной æндæр рынчындæтты, уымæй та саразой рæстæгмæ госпитал… мыййаг, искуы исчи коронавирусæй куы фæрынчын уа, уый тыххæй. Æнæниздзинад хъахъхъæнынады министр Годжыцаты Тамерлан куыд загъта, афтæмæй ацы рынчындон равзæрстой уый тыххæй, стырдæр кæй у, стæй дзы æппæт фадæттæ дæр кæй ис. Министр ма фæсидт, дардæй чи æрцæуы, уыцы адæммæ, цæмæй сæхи ма æмбæхсой æмæ дохтыртæм фехъусын кæной, стæй уал райдайæны сæхи адæмæй иуварс дарой. Карз режиммæ ахызт арæнтыл æрбахизын æмæ ахизыны фæтк дæр.
Скъолатæ æмæ сывæллæтты рæвдауæндæттæй уæлдай ма карантины уавæрмæ рахызтысты æппæт организацитæ æмæ ведомствотæ дæр, хицауад æмæ хойраджы дуканиты йедтæмæ. Кусынц мыхуыры фæрæзтæ дæр, цæмæй адæммæ хабæрттæ хæццæ кæной. Карантины æмгъуыд уал скодтой къуыри, стæй бæрæг уыдзæн.
Тыхст заманы иуварс нæ баззадысты волонтертæ дæр. Æппæтуæрæсейон адæмон фронты æххуысæй медицинон институты арæзт æрцыд хæдбар студентты штаб. Æрыгон медиктæ æххуыс кæнынц ацæргæ рынчын адæмæн, кæцыты, вирусæй сын тас кæй у, уымæ гæсгæ æхсæнадæй аиуварс кодтой.
Æхсызгон хабар у, æрыгон медикты штабы уæнгтыл алы бон дæр кæй æфты. Сæ тыхтæ баиу кодтой ахæм организацитæ, куыд: “Молодежка ОНФ”, Волонтеры-медики” æмæ “Добровольцы Кавказа”. Цыбыр рæстæгмæ йæ уæнгтæ ахызтысты сæдæйæ. Кусынц æнæхъæн суткæтæ. Кæйдæриддæр йæ адæмæн баххуыс кæнын фæнды, уыдо-нæн сæ бон у сæ рæнхъытæм бацæуын. Ахæм штабтæ рæхджы фæзындзæн республикæйы æппæт районты дæр.
Штабы уæнг Кæрдæнты Анзор куыд банысан кодта, афтæмæй бон райсынц цалдæр заявкæ æххуысхъуаг адæмæй. Волонтертæ семæ баныхас кæнынц, цы сæ хъæуы, цавæр продукттæ, хостæ, уый базонынц, балхæнынц, стæй сæм, хи бахъахъхъæнæн дзаумæттæ скæнгæйæ, бацæуынц.
Маскæтæ афтектæм кæд æрвитынц, уæддæр нæ фаг кæнынц, нæй се ссарæн. Уымæ гæсгæ, цалдæр чызджы (сæ нæмттæ æмбæхсынц) райдыдтой маскæтæ хуыйын æмæ бийын, æмæ сæ кæнынц… лæвар. Куыд фехъусын кодтой, афтæмæй сæ æхцайы мæт нæй, фæлæ сæ фæнды адæмæн баххуыс кæнын.
Республикæйы Сæргълæууæг Битарты Вячеслав фæсидт адæммæ, цæмæй паникæ ма кæной æмæ сæхи хъахъхъæной, мыхуыры фæрæзтæй та мæнг хабæрттæ чи парахат кæны, уыдон закъоны бындурыл æфхæрд цæуой.
Нæ уацх.
Comments are closed, but trackbacks and pingbacks are open.