Инциденттæ ма æруадзын æмæ сæм хъусдард здахыны фæдыл механизмты фæлгæтты фембæлды рæстæджы уынаффæ цыд ацы форматы фæстаг фембæлдæй фæстæмæ Республикæ Хуссар Ирыстон æмæ Гуырдзыстонимæ æмарæн территоритыл æрцæугæ цаутимæ баст фарстатыл. Механизмты фæлгæтты фембæлдтытæ уагъд цæуынц Хуссар Ирыстон, Гуырдзыстон, Уæрæсе, Евроцæдис æмæ ЕÆÆО-йы мисситы хъусдарджыты хайадистæй.
Куыд зонæм, уымæ гæсгæ ацы форматы фембæлдтытæ уагъд цæуынц æнæ информацион фæрæзты минæвæртты хайадистæй. Фембæлды боны, фæтк æмæ йын хатдзæгтæ аразгæйæ, Хуссар Ирыстонæй делегацийы сæргълæууæг, Постконфликтон фарстатæ бæстонкæнынады фæдыл РХИ-йы Президенты æххæстбарджын минæвары хæдивæг Коцты Егор афтæ радзырдта:
«Дзырд цыд, сæйраджыдæр, Хуссар Ирыстоны уæлдæфон тыгъдад кæй халынц æнæпилотон тæхæн аппараттæ. Ацы фарст комкоммæдæр здæхт у, паддзахадон арæнтæ халыны хъуыддаджы бæрнджын чи сты, уыцы полициæгты минæвæрттæм. Ахæм цаутæ вæййы Знауыры районы».
Ацы хатт та уыцы æнæпилотон тæхæн аппарат æртæ хатты фехæлдта Хуссар Ирыстоны уæлдæфон тыгъдад. Уый дæс минуты бæрц уыд республикæйы территорийы сæрмæ, ныллæджыты ратахт арæнхъахъхъæнджыты цурты, бæрæг сын кодта, сæ автомашинæйы гуыффæйы цы ис, уый, æмæ фæстæмæ атахт Гуырдзыстоны ‘рдæм.
Хуссарирыстойнаг фарс механизмты куысты кæд домдта дзуапп ацы тæхæн аппараты фæдыл, уæддæр æй нæ райста.
Бæрæг куыд у, уымæ гæсгæ ацы фембæлдтытæй иуæй иннæмæ хынцыд æрцæуы Паддзахадон арæнтæ æнæзакъонæй халыны цаутæ.
«Ахæм цау бæрæг æрцыд Знауыры районы Гуиргинайы хъæуы. Уыцы бынаты гуырдзиаг полицийæгты машинæ æрбацыд Хуссар Ирыстоны территоримæ, æрзылд паддзахадон арæны нысаны алфæмблай, æмæ фæстæмæ аздæхт», – дзырдта делегацийы сæргълæууæг.
Гуырдзиаг фарсæрдыгæй ма сæ полицийæгтæ сæ хæдтулгæ баурæтой Цънелисы хъæумæ хæстæг, æмæ Хуссар Ирыстоны территоримæ бацыдысты 150 метры бæрц. Уыцы цауы рæстæджы хуссарирыстойнаг фарс сархайдта тагъд, æмæ уæд ахызтысты фæстæмæ сæхи территоримæ.
Гуырдзиаг информацион фæрæзтæм цы информаци уыд, ома, уæрæсейаг вертолет дæр фехæлдта Гуырдзыстоны уæлдæфон тыгъдад, уый фæдыл хуссарирыстойнаг делегацийы сæргълæууæг банысан кодта: «Уый раст нæу, уæрæсейаг вертолеттæ тæхынц æрмæстдæр Хуссар Ирыстоны территорийыл æмæ æппындæр никуы атахтысты Гуырдзыстоны ‘рдæм. Кæд гуырдзиаг фарс скарз кодта ацы фарст, уæддæр сæм нæдæр видео, нæдæр ницыхуызон æрмæг разынд, кæцытæ сбæлвырд кодтаиккой ацы цау».
Паддзахадон арæнтæ снысан кæныны фарстыл уынаффæ ноджыдæр размæ кæны хуссарирыстойнаг фарс, уымæн æмæ уый руаджы иуварс æрцæуиккой къорд проблемæтæ, кæцытæ баст сты паддзахадон арæнтæ халынимæ, зæххытæ кусын, ставдкъах фос сæфын æмæ æнд. Демаркаци æмæ делимитацийы фарст вазыгджын фарст у. Уый политикон фарст у æмæ йыл кусынц æмбæлон органтæ.
Коцты Егор ма куыд банысан кодта, уымæ гæсгæ Хуссар Ирыстон æмæ Гуырдзыстоны ‘хсæн паддзахадон арæнтæ фехалыны тыххæй урæд æрцыдысты 11 адæймаджы.
Къӕбулты Марина
Comments are closed, but trackbacks and pingbacks are open.