Нымад бонтæ ма баззад Ног азы æрбалæудмæ. Уымæ гæсгæ Хуссар Ирыстоны паддзахадон унитарон кондад «Ир-дизайн»-ы кусджытæ ацы бонты æрæвнæлдтой Цхинвалы централон уынгтæ сфæлындзынмæ. Бæрæгбонон фæлындзыны куыстытæ «Ир-дизайн»-ы кусджытæ райдыдтой Сталины уынгæй. Ацы аз иннæ ацæугæ азтимæ абаргæйæ кæд уазалдæр у, уæддæр кусджытæ архайынц боныгъæдмæ æнæкæсгæйæ, сæ хъуыддаг кæронмæ бакæныныл. Уыдонæн сæ хæс у, цæмæй уынгты срæсугъд кæной алыгъуызон рæсугъд хъазæнтæ æмæ рухсгæнæнтæй, афтæ ма ног азы сæйраг атрибут – Республикон назбæлас сæвæрын æмæ йæ сфæлындзын, кæцы рæхджы æвæрд æрцæудзæн республикæйы сæйраг фæзуаты.
Ног азы бæрæгбон кæддæриддæр домы хъæлдзæгдзинад æмæ рæсугъддзинад æмæ цæмæй Ног азы бæрæгбоныл республикæйы æмбæстæгтæ æмæ йæ уазджытæ фæцин кæной, уый тыххæй развæлгъау йæхи бацæттæ кодта горæт Цхинвалы администраци æмæ уынгтæ рæстæгыл æрцæудзысты фæлындзыд. Республикæйы столицæйы администрацийы пресс-службæйæ нын куыд фехъусын кодтой, уымæ гæсгæ ацы къуырийы кæрæтты хъуамæ æвæрд æрцæуа сæйраг республикон назбæлас дæр. «Ног азы бæрæгбон у адæмы иууыл уарзондæр бæрæгбон æмæ йæм алыхатт дæр адæм сæхи фæцæттæ кæнынц. Традицимæ гæсгæ рæхджы «Ир-дизайн»-ы кусджытæ Театралон фæзуаты астæу сæвæрдзысты сæйраг назбæлас, уынгтæ дæр та цæхæр скалдзысты алыгъуызон æрттиваг хъазæнтæ æмæ рухсгæнæттæй. Сæйраг назбæласæн развæлгъау балхæдтам ног рæсугъд хъазæнтæ æмæ нын хъуамæ уа хуызджын æмæ хæрзвæлыст. Уыцы рæсугъддзинад та хорзæрдæм æндавы адæймаджы зæрдæйы равгыл, хæссынц позитив æмæ хъæлдзæгдзинад. Æмæ уый та у цасдæры аргъ», – загъта горæты администрацийы пресс-секретарь Коцты Зæринæ.
Цхинвалы администрацийы пресс-службæ ма нын куыд фехъусын кодта, афтæмæй ма горæты администрацийы культурæ, фæсивæд æмæ спорты хайад цæттæ кæнынц бæрæгбонон онлайн-концерт, кæцы æвдыст цæудзæнис социалон хызæгты руаджы онлайн-режимы.
Нæ уацх.
Comments are closed, but trackbacks and pingbacks are open.