Республикæйы Хицауады Сæрдар Дзанайты Барис æххæстгæнæг хицауады æмæ районты разамонджытимæ цы æмбырд скодта, уым ныхас цыд, инвестицион программæтæ царды куыд æххæстгонд цæуынц, ууыл. Уыдон сты, бæстæйы Президент Владимир Путин цы хъуыддæгтæ бафæдзæхста, экономикон размæцыды æмæ раззагдæр проекттæ æххæст кæныны тыххæй, уыцы нысантыл. Уыдон сты «Мамысон»-ы, республикæ газæй сифтонг кæныны, социалон, ахуырадон æмæ медицинон объекттæ аразыны æмæ цалцæг кæныны, туризмы рæзты программæтимæ баст инвестицион проекттæ æххæст кæнын.
Дзанайы-фырт куыд бафиппайдта, афтæмæй хъуамæ Экономикон рæзты министрад æппæт инвестицион проекттæ сбæрæг кæна. «Алкæмæн дæр сæ ис экономикон æмæ социалон ахадындзинад. Царды куыд æнтысынц, уымæ хъуамæ уæ цæст дарат», – бафæдзæхста Хицауады Сæрдар.
Ныртæккæ Дзæуджыхъæуы æмæ районты аразынц социалон объекттæ, сты инвестицион проектты хæйттæ. Республикæйы разамынды домæнтæм гæсгæ, уæлдай лæмбынæг æркæсын хъæуы скъолаты арæзтад æмæ цалцæггæнæн куыстытæм.
Инвестицион проектты фæлгæтты ма куыст цæуы туристон кластеры программæтыл. Дарддæр æххæстгонд цæуынц Дзæуджыхъæу æмæ Беслæны райрæзты комплексон программæтæ, куыст цæуы хъæууонхæдзарадон, сæудæджерадон, цæрæнуатон-коммуналон ахадгæ проекттæ саразыныл. Республикæйы Хицауад ныридæгæн сбæлвырд кодта, 2023 – 2026 азты цы фыццаградон проекттæ æххæстгонд цæуыдзысты, уый.
ТУРИЗМ – ФÆРНЫГАДЫ НЫСАН
Афæдзы райдайæнæй нырмæ, кæд æдзух къæвдатæ у, уæддæр, Цæгат Ирыстоны, фаронимæ абаргæйæ, туризмы уылæн сырæзт 30 проценты. Июль æмæ августы мæйтæн ныридæгæн фысымуæтты фылдæр хай у ахст.
Ацы ахсджиаг фарста алыг кæныны фæдыл афæдзы кæронмæ фæнд кæнынц, 220 бынаты кæм уыдзæн, ахæм цалдæр модулон уазæгуаты байгом кæнын. Уыцы нысантæн дихгонд æрцæудзысты федералон субсидитæ 100 милуан сомы бæрц æмæ æрвыст æрцæудзысты инфраструктурæйы рæзтæн.
Уæрæсейы банчы аналитиктæ куыд фæнысан кодтой, афтæмæй, иннæ регионтимæ абаргæйæ, Цæгат Кавказ туристты йæхимæ тынгдæр æлвасы. Уый туризмы æмæ уазæгуарзыны, уæлдæфон æмæ æфсæнвæндаджы лæггæдтæ кæй фæхуыздæр сты, уый тыххæй.
«Фæстаг дæсгай азты туризмы къабаз уыд рохуаты. Политикон æмæ æндæр цауты аххосæй Цæгат Кавказмæ цæуынмæ туристтæ сæ ныфс нал хастой. Ныртæккæ уавæр аивта. Уазæгуаты нæм чи æрбацæуы, уыцы туристты нымæц кæны фылдæр, бынæттæ та сын фаг нæй. Фæндаггон сервис дæр бынтон зæрдæмæдзæугæ нæма у. Фæлæ туризмы къабаз Цæгат Кавказы рапарахат кæнын у Уæрæсейы Президенты уынаффæ, æмæ йæ хъæуы æххæст кæнын. Уымæ гæсгæ, цæттæ цæуынц ног туристон маршруттæ, Ирыстоны рæсугъддзинæдтыл, йæ историон цыртдзæвæнтыл сын чи дзурдзæн, ахæм специалисттæ», – фехъусын кодта республикæйы Сæргълæууæг Сергей Меняло.
Нæ уацх.
