Хуссар Ирыстоны социалон-экономикон райрæзты Инвестпрограммæ реализаци кæныны штабы радон рабадты дзырдтой, Зæронд хиды арæзтад къуылымпытимæ кæй цæуы, ууыл. Арæзтад æмæ архитектурæйы министр Елдзарты Константин зæгъы: «Бакъуылымпы нæ кодта æвзæр боныгъæд. Куыстыты кæцыдæр хуызтæм нæ уыди бавналæн. Зæгъæм, хиды быцæуты бетон кæнынмæ. Ныр боныгъæдтæ фæхуыздæр сты. Автомобилон фæндæгты арæзтад æмæ сæ эксплуатацимæ радтыны комитет уыцы куыстытæ кæронмæ бакæндзысты.
Штабы рабадты уынаффæ цыд Къуайсайы цæрджыты донæй сифтонг кæныныл дæр. Алы уалдзæг ам уыцы фарста вæййы актуалон. Дон фæкъаддæр вæййы, къæвдабонты кърантæй змæст дон цæуын райдайы. Уый фæдыл цæрджытæ равдисынц се ‘нæразыдзинад. Хатгай дон нæ фæхæццæ кæны бирæфатерон хæдзæртты уæладзгуытæм.
Ацы аз Къуайсайы сырæздзæнис ног альтернативон донæмбырдгæнæн. Уыцы куыстытæн Инвестпрограммæйы фæлгæтты хицæн æрцыд хъæуæг æхцайы фæрæзтæ. Куыстытæм бавналдзысты тагъд рæстæджы æмæ хъуамæ конд фæуой азы кæронмæ. Донæмбырдгæнæн арæзт æрцæудзæн капиталонæй, сæвæрдзысты йыл донфæрсудзæнтæ.
Æмбырды ма дзырдтой, Зонкъары донæм-бырдгæнæны цы гидротехникон арæзтадон куыстытæ хъуамæ æрцæуа, уыдоны фæдыл дæр. Цæмæй Тирипоны къанауыл дон ацæуа Гуырдзыстонмæ æмæ уырдыгæй та Цъинагары зонæйы цæрæн пункттæм, уый тыххæй бæстон сцалцæг кæнын хъæуы Зонкъары донæмбырдгæнæн. Специалисттæ куыд амонынц, уымæ гæсгæ плотинæ цалцæг куынæ æрцæуа, уæд доны гуырахст нæ фæфылдæр уыдзæн. Цæмæй Цъинагары ‘рдæм дон цæуа, уый тыххæй хатт бахъæуы механизм æнæхъæнæй разилын. Æххæстбæрцæй разилгæйæ та Зонкъары дон гæнæн ис æмæ басур уа. Ацы аз уыцы доны куыстытæ дæр бакæндзысты.
УАЗÆГТЫ Марфæ
