Февралы мæйы 23-æм бонмæ нæ республикæйы скъолаты уагъд æрцæуы Уæлахизы боны цытæн гом уроктæ. Уыцы бон Цхинвалы районы Сатихъары скъоламæ фæуазæг ацы хъæуы администрацийы сæргълæууæг – йæхæдæг дæр Фыдыбæстæ хъахъхъæнæг Дыгъуызты Мераб. Уый ахуыргæнинæгты базонгæ кодта ацы  бæрæгбоны нысаниуæгимæ.

«Абон нæ хъæууон администрацимæ цы хъæутæ хауы, уыдоны, хъыгагæн, нал ис Стыр Фыдыбæстæйон хæсты ветерантæ. Цалдæр азы размæ  дæр ма-иу Уæлахизы бæрæгбонмæ алы скъола дæр архайдта уыдон сбуц кæныныл æмæ семæ фембæлыныл. Уыдон-иу радзырдтой сæ хæстон фæндæгты тыххæй.

Абон нæ бæстæйы æдасдзинады гарант сты Хъахъхъæнынады министрад æмæ Уæрæсейы 4-æм базайы службæгæнджытæ. Фæлæ, сæрбахъуыды рæстæджы  уыдонмæ баиу вæййынц æппæт тыхон структурæтæ, æмæ ма бархионтæй цы къордтæ сæвзæры, уыдон. Афтæ уыд 1989-90 азты дæр. Уыцы азты уæ фыдтæ æмæ дадатæ равдыстой сæхи æцæг хъахъхъæнджытæй. Сæ къухы æхсæнгарз дæр нæ уыд, афтæмæй æхсæвæй-бонæй хъахъхъæдтой нæ зæхх, нæ къуым. Сымах рæсугъд сомбон æмæ æдасдзинады нысанæн, уыдонæй бирæтæ бабын сты. Уе скъолайы къулы фæйнæгыл ис, чи фæмард, уыдон портреттæ. Удæгас чи баззад æмæ абон не ‘хсæн чи цæры, уыдонæн та алыхатт дæр хъуамæ бузныг зæгъынхъом уæм сæ фæразондзинады тыххæй», – загъта йæ раныхасы Дыгъуызы фырт.

Дыгъуызты Мераб ма ахуыргæнинæгтæн лæмбынæг радзырдта, ныр цалдæр аз нæ республикæйы скъолаты рауагъдонтæн фадат кæй вæййы Уæрæсейы уæлдæр æфсæддон ахуыргæнæндæттæм ацæуынæн. Уыдон ахуыры фæстæ æрцæуынц æмæ свæййынц æфсæддон службæгæнджытæ, иу хай та уæрæсейаг æфсадмæ бацæуынц службæ кæнынмæ.

Мераб ма куыд загъта, афтæмæй Фыдыбæстæ хъахъхъæнæджы бон æрмæст нæлгоймæгты бæрæгбон нæу. Немæ иумæ æрвылхатт дæр вæййынц сылгоймæгтæ. Уыдонæй дæр бирæтæ свæййынц хъахъхъæнджытæ. Мах дæр уыдон фæхъахъхъæнæм знагæй. Нæ чызджытæ, нæ мæдтæ, нæ хотæ, æмæ цардæмбæлттæ нæм куынæ æнхъæлмæ кæсиккой, уæд-иу афтæ хъазуатон нæ уаиккам, знагимæ тохгæнгæйæ. Мæ зæрдæ зæгъы, цæмæй канд Ирыстоны нæ, фæлæ æгас дунейы дæр уа сабырдзинад».

Кæронбæттæны Фыдыбæстæхъахъхъæнæджы боны цытæн ахуыргæнинæгтæ равдыстой бæрæгбонон концерт. Зарджытæ, æмдзæвгæтæ, чысыл инсценировкæтæ бацæттæ кæнынæн сывæллæттæн  баххуыс кодта ацы скъолайы культмассон мадзæлтты къухдариуæггæнæг Нукърадзе Гуло.

УАЗÆГТЫ Марфа

 

Ацы æрмæджытæ дæр бакæс:

Ис ахæм дæсныйад – фыдыбæстæ хъахъхъæнын Историйы урок — сывæллæтты республикон библиотекæйы Default ThumbnailБАНЫСАН КОДТОЙ ФЫДЫБÆСТÆ ХЪАХЪХЪÆНÆДЖЫ БОН МАДЗАЛ – БÆРÆГБОНЫ ЦЫТÆН КАД – ФЫДЫБÆСТÆ ХЪАХЪХЪÆНДЖЫТÆН

Comments are closed, but trackbacks and pingbacks are open.