Æрæджы горæты централон библиотекæйы кусджытæн уыд бæрæгбонон изæр Фыдыбæстæ хъахъхъæнæджы боны цытæн. Хайад дзы райстой библиотекæйы коллектив, чиныгкæсджытæ, уыцы нымæцы горæты скъолаты ахуырдзаутæ дæр.
Мадзалы раныхас кодта библиотекæйы директор Прокопенко Иринæ. Уый куыд радзырдта, афтæмæй Фыдыбæстæ хъахъхъæнæджы бон Хуссар Ирыстонæн уæлдай ахсджиагдæр бæрæгбон у. Уымæн æмæ нæ республикæйы иунæг хæдзар дæр нæй, куыд Стыр Фыдыбæстæйон хæсты рæстæджы, афтæ 1989 азæй 2008 азмæ хæстыты дæр йæ Райгуырæн бæстæ бахъахъхъæныны иувæрсты чи ахызт. 1989 азæй 2008 азмæ гуырдзиаг агрессоры ныхмæ лæууыны рæстæджы Фыдыбæстæйы хъахъхъæнджытæй бирæтæ радтой сæ цард Хуссар Ирыстоны сабырад æмæ паддзахадон хæдбардзинады, кæстæр фæлтæрты рухс фидæны тыххæй. Уæрæсейаг æфсæддонтæй дæр бирæтæ фæмард сты Хуссар Ирыстоны сæрыл тохы.
Фыдыбæстæ хъахъхъæнын алы адæймагæн дæр йæ уаз хæс у. Райгуырæн бæстæ тæссаг уавæры куы вæййы, уæд слæууынц йæ фырттæ æмæ сæ риуæй бахъахъ-хъæнынц сæ адæмы, сæ фыды зæхх.
«Уыцы бон мах фæарфæ кæнæм, Гарзджын тыхты сконды чи службæ кодта æмæ кæны, уыдонæн се ‘ппæтæн дæр, йæ Райгуырæн бæстæйыл æнувыд чи у, паддзахады, æхсæнады æмæ республикæйы алы æмбæстаджы æдасдзинад дæр чи хъахъхъæны, уыдонæн. Мах сæрыстыр стæм не ‘фсадæй æмæ бархионтæй, Республикæ Хуссар Ирыстоны хæдбардзинад чи бахъахъхъæдта, æппæт уыдонæн», – банысан кодта Прокопенко.
Уый фæстæ раныхас кодтой мадзалы иннæ хайадисджытæ.
Сланты Наташæ радзырдта ацы бæрæгбоны нысаниуæджы, кæд æй райдыдтой нысан кæнын, æппæт уыдæтты тыххæй.
«Фыдыбæстæ хъахъхъæнæджы бон нысан кæнынц 1918 азæй. Бирæ рæстæг рацыд æмæ бирæ бæрæгбонтæ сæ нысаниуæг кæй фесæфтой, уый тыххæй сæ нал нысан кæнынц, фæлæ цасфæнды рæстæг ма рацæуа, уæддæр ахæм хъысмæт нæ уыдзæн Фыдыбæстæ хъахъхъæнæджы бæрæгбонæн. Уымæн æмæ ацы бæрæгбон у адæмон бæрæгбон. Ацы бæрæгбон бирæ фæлтæртæн нысан кæны сæ Фыдыбæстæмæ уарзондзинад æмæ иузæрдиондзинад. Алы бинонтæ дæр кад кæнынц, уæззау рæстæджыты хъæбатырæй йæ Райгуырæн бæстæ чи хъахъхъæдта, уыдонæн. Фыдыбæстæ хъахъхъæнджытæн стыр кад кæны Ирыстон. Ацы бæрæгбон мах дæр арфæ кæнæм, ацы бæрæгбон комкоммæ кæмæ хауы, уыдонæн се ‘ппæтæн дæр, Стыр Фыдыбæстæйон хæсты ветерантæй райдайгæйæ фæсивæды онг, кæцытæ æрæджы скодтой æфсæддон дарæс æмæ кæцытæ дарддæр кæнынц сæ фыдæлты хæстон традици», – банысан кодта Сланты Наташæ æмæ бакаст Зассеты Мерабы фыст æмдзæвгæ.
Хъæцмæзты Вандæ та радзырдта Стыр Фыдыбæстæйон хæсты ирæтты хъазуатон хайадисты тыххæй. Банысан кодта Советон Цæдисы ирыстойнаг хъайтарты нæмттæ.
«Ирыстоны алы фæндзæм адæймаг тох кодта Стыр Фыдыбæстæйон хæсты фронтты. Æнустæм никуы ферох уыдзысты Гæздæнты авд æфсымæры, Дзугаты æхсæз æфсымæры, афтæ ноджы мингай ироны, кæцытæ сæ цард снывонд кодтой Райгуырæн бæстæйы уæлахизæн», – радзырдта ныхасгæнæг.
Радзырдта Мамсыраты Хаджи-Умары хъæба-тырдзинады тыххæй. Банысан кодта, хайад кæй иста цыппар хæсты. Уимæ иумæ ма радзырдта, Матросовы хъæбатырдзинад чи сфæлхатт кодта, цæгатирыстойнаг уыцы цыппар хæстоны тыххæй. Уыдон уыдысты: Дзотты Лазарь, Калоты Александр, Хъайтыхъты Азæмæт, Калаты Семен.
Битарты Нелли бакаст Галуанты Людæйы фыст æмдзæвгæ «Иры хъахъхъæнджытæ».
Раныхас кодтой мадзалы иннæ хайадисджытæ дæр. Уыдон зæрдиаг арфæйы ныхæстæ загътой Фыдыбæстæ хъахъхъæнджыты адресыл. Ахуырдзаутæ Гаглойты Виктория, Джиоты Мария, Бежанты Давид та бакастысты фыдыбæстæ хъахъхъæнæджы тыххæй фыст æмдзæвгæтæ.
Нæ уацх.
Comments are closed, but trackbacks and pingbacks are open.