Гемодиализы рынчынтæн медицинон æххуыс бæрæг фæхуыздæр

2019 азы Бирæпрофилон медицинон центры операцион-хирургион корпус арæзт куы æрцыд, уæд дзы бынат рахицæн кодтой гемодиализы хайадæн дæр. Цалынмæ нæхимæ нæ фæзынд гемодиализы хайад, уæдмæ æмбæлон медицинон æххуыс райсынмæ рынчынтæ цыдысты Цæгат Ирыстонмæ. Уыцы медицинон хæрдзтæ æмæ фæндаггаджы аргъ рынчынтæн лæвæрдта паддзахад.

Диализы процесс у тынг вазыгджын. Цы хостæ хъæуы, уыдон дæр сты зынаргъ. Гемодиализы хайадæн уыцы иурæстæджы йæ бон у 30 рынчынæн процедурæтæ саразын. Цалдæр азы размæ республикæйы ахæм рынчынтæ уыд 20 адæймаджы. Фæлæ, уыдон нымæц арæх фæивы. Рынчынты къуыри æртæ хатты хъæуы процедурæтæ аразын. Гемодиализы æххуыс кæй хъæуы, уыдонæй мын сæ иу радзырдта: «Цалынмæ нæхимæ нæ байгом хайад, уæдмæ-иу цыдтæн Цæгат Ирыстонмæ. Æппæт хæрдзтæ дæр фыста паддзахад. Нæхимæ кæй фæзынд, уый мын тынг æхсызгон уыд. Бирæ хатт-иу фæндагыл фæфыдæбон кодтон. Уæлдай тæссагдæр та уыд зымæгон бонты, фæндаг-иу куы сæхгæдта, уæд. Стыр бузныг дæн, ацы хъуыддагыл чи батыхст æмæ кæй фæрцы аскъуыддзаг, уыдонæй».

Гемодиализы хайады сæйраг дохтыр Джиоты Мадинæ дæр куыд зæгъы, афтæмæй нæ республи-кæйы ахæм хайад арæзт кæй æрцыд, уый стыр хæрзиуæгон хъуыддаг у. «Центр аразыныл дзæвгар финансон фæрæзтæ бахардз. Медицинон ифтонггæрзтæ сæхæдæг дæр зынаргъ сты. Бæстыхай аразгæйæ спайда кодтой сæрмагонд арæзтадон æрмæ-джытæй. Æрмæджыты ма хъуамæ уыдаид зианхæссæг буарадтæ. Науæд уыдон уæлдæфимæ иумæ æндæвтаиккой рынчынты æнæниздзинадыл. Процедурæтæ аразыны рæстæджы æддагон адæймагæн нæй хайадмæ бахизыны бар».

Дохтыры ныхæстæм гæсгæ, уыдон кæдфæнды дæр цæттæ сты рынчынтæ райсынмæ. Коронавирусы инфекци куы апарахат, уыцы рæстæджы хайад рахызт æндæр графикмæ: куыстой æртæ сменæйы, дыууæ сменæйы ист цыдысты коронавирусæй рынчын чи нæ уыд, ахæм пациенттæ. Æртыккаг сменæйы та – тæссаг инфекцион низ кæуыл бахæцыд, ахæмтæ. Процедурæтæ-иу куы фесты, уæд-иу бæстыхай сдезинфекци кодтой сæрмагонд фæрæзтæй. Йæ уыргтæ кæмæн нæ кусынц, уыдоны гемодиализ аразын хъæуы къуыри æртæ хатты, фæлæ-иу сæ хæцгæ низ кæуыл бахæцыд, уыдон та хъуыд æрвылбон дæр. Хъыгагæн, коронавирусы фæстиуæгæн, цалдæр адæймагæн бахъыгдард сты сæ уыргтæ, æмæ ныр уыдон дæр систы ацы хайады пациенттæ.

УАЗÆГТЫ Марфæ