Президент Гаглойты Алан 12-æм октябры уыд кусæгон балцы Знауыры районы, æмæ фембæлдис райо-ны цæрджытимæ. Фембæлды рæстæджы фехъусын кодта, зæгъгæ, куыст хъуамæ нæ кæрæдзийыл баст уа, ма рох кæнæм, нæ Фыдыбæстæйы раз ныл цы хæс ис, уый. Æрмæстдæр уæд æрцæудзысты æххæст нæ разы лæууæг хæстæ.
Йæ ныхæстæм гæсгæ, ахæм фембæлдтыты рæстæджы фадат вæййы, куыд районты цæрджытæн, афтæ сæрмагондæй йæхицæн дæр, цæмæй базонгæ уа бынæттон цардуагон проблемæтимæ.
Сугы проблемæ
Знауыры районы цæрджытæ Президентмæ фарстатæ лæвæрдтой фæндæгты хæрзарæзт, донифтонгад, электроэнерги æмæ кадрты цухдзинады фæдыл. Президент йæ æххуысгæнджытæн бынаты радта къорд хæслæвæрды.
Знауырæгтæ Президентæн фехъусын кодтой, зæгъгæ зымæджы къæсæрыл районы цæрджытæй бирæтæ сугæй ифтонг не ‘рцыдысты абоны онг дæр. Районы æрдзон газ кæй нæй, уымæ гæсгæ адæм пайда кæнынц сугын пецтæй. Цæрджытæ куыд радзырдтой, афтæмæй раздæр суг ластой дæрддзæф ранæй æмæ сын суг фаг кодта. Знауыры районы ис егъау тобæгонд паддзахадон фæзуæттæ, нæй дзы хъæд калыны бар. Уымæ гæсгæ цæрджытæ домынц суг цæттæгæнæн бынат саразын, цæмæй сæ алыгъуызон инстанцитыл зилын мауал хъæуа. Гаглойты Алан районы разамынадмæ бахатыд, цæмæй районы цалдæр цæрæгимæ иумæ равзарой, суг ракалыны бар кæм уа, ахæм бынат. «Хъæд нæ адæмæн хъæуы. Кæй тыххæй хъуамæ хъахъхъæд цæуой хъæдтæ, нæ адæм зымæджы уазалы куы сийой, уæд. Равзарут, бæлас ралыг кæныны бар кæм уа, ахæм бынат. Республикæйы къухдариуæгад та æппæт дæр сараздзæн, ацы фарст æвæрццагæй аскъуыддзаг кæнынæн. Нæ хъæуы цæрджытæн уæлдай зындзинæдтæ аразын. Афтæ ма, зымæгон сугæй æнæаргъæй сифтонг кæнын хъæуы æвæгæсæг карджын цæрджыты», – загъта Гаглойты Алан.
Алыварсон фарстатæ
Цънелисы хъæуы цæрæг та цымыдис кодта телеуынынад, мобилон бастдзинад æмæ электроны рухсæй цухдзинад кæй æййафынц, уымæ.
Администрациты кусджытæ сæ куыст æмбæлонæй æххæст кæнынц, фæлæ нæ республикæйы хабæрттæ, оперативон æгъдауæй информаци цæрджытæм нæ хæццæ кæнынц.
Ацы фарстайы фæдыл «Энергоресурс»-ы сæргълæууæг Къæбысты Ацæмæз куыд загъта, афтæмæй Цънелис, Чъимас æмæ Малдайы хъæутæ электронон рухсæй æххæстæй ифтонг æрцæудзысты фидæн азы. «Нæ Президенты сæрмагонд хæслæвæрдмæ гæсгæ, ацы фарст скъуыддзаг æрцæудзæн. Ныртæккæ дæр ыл кусæм», – радзырдта Къæбысты Ацæмæз.
Фиддонтæ
Фембæлдмæ æрбацæуджыты ма бацымыдис кодта ныртæккæ Уæрæсейы Федерацийæ нæ республикæмæ æрласгæ продукцийы таможнæйон фиддонты фарст. Паддзахады сæргълæууæг радзырдта, зæгъгæ, фиддонты аргъ фæфылдæр бирæ хæлцадон продукттæм нæ хауы, фæлæ уымæ нæ кæсгæйæ, амалиуæггæнджытæй бирæтæй сæхæдæг продукты аргъыл схæцынц. «Ацы фарсты фæдыл ист æрцæудзæн æнæмæнгхъæуæг къахдзæфтæ. Мах бахатыдыстæм Уæрæсейы Федерацийы хицауадмæ, дыууæ фæндонимæ: цæмæй Уæрæсейы Федерацийы хицауад уагæвæрдмæ бахæсса ивындзинæдтæ, кæцымæ гæсгæ Хуссар Ирыстонмæ æрласгæ продукцийы таможнæйон фиддонтæ ма фæфылдæр уой»,- загъта Гаглойты Алан. Радзырдта ма æрæмбырдуæвджытæн «Дæллаг Зæрæмæдж»-ы реконструкцийы тыххæй, афтæ ма уым кæй фæфылдæр уыдзæн уадзæн пунктты нымæц дæр.
Гаглойты Алан фехъусын кодта, зæгъгæ, йын ис бадзырд хуыйæн фабрикæ БТК-4 разамынадимæ, цæмæй фæфылдæр кæной кондады продукци. Уымæ гæсгæ районты баконд æрцæудзæн хуыйæн фабрикæйы филиалтæ. Афтæ ма иннæ аз бакæндзысты консервон завод æмæ «Вибромашинæ»-йы кондад биноныг æрцæудзæн. Ацы егъау куыстуæтты фæзындзæн бирæ куысты бынæттæ.
Фембæлды рæстæджы Президентмæ лæвæрд æрцыд бирæ ахсджиаг фарстатæ. Æппæт фарстатæ хъусдардмæ райста Президент Гаглойты Алан, уыдон скъуыддзаг кæндзысты районы администраци æмæ республикæйы Хицауадимæ иумæ.
ТАНДЕЛАТЫ Виленæ
