15-æм октябры Хетæгкаты Къостайы райгуырæн боны цытæн Къостайыхъæуы уагъдцæуæг бæрæгбонон мадзæлттæ ноджы тынгдæр барæсугъд кодтой спортивон ерыстæ. Уыдоны хайад райстой 7 командæйы, кæцытæ сæ тыхтæ фæлвæрдтой 6 дисциплинæйы. Уыдон уыдысты, йæ уæз 60 кг кæмæн уыд, ахæм голлаг хæрдмæ исынæй, æфсæйнаг къори æппарын, æрдынæй милмæ æхсынæй, армрестлинг, цалх нысанмæ баласын æмæ бæндæн ивазынæй. Уæлдай тынгдæр рахицæн кæнын хъæуы армрестлингæй ерыстæ, цыран финалы фембæлдысты Дыргуис æмæ Фæсивæдон политикæ æмæ спорты фæдыл комитеты минæвæрттæ – Бететы Алан æмæ Хæбæлаты Арсен. Уыдон дыууæ дæр сты спорты дæснытæ. Сæ тохты фæстиуæгмæ гæсгæ галиу къухæй фæуæлахиз Бететы Алан, рахиз къухæй та – Хæбæлаты Арсен. Афтæмæй сæ командæтæн æрхастой бирæ баллтæ. Иумæйагæй сисгæйæ, иууыл фылдæр баллтæ та æрæмбырд кодта Хъахъхъæныны паддзахадон службæйы командæ æмæ ссис ерысты уæлахиздзау. Уымæн йæ хайадисджытæ иууыл хуыздæр бæрæггæнæнтæ равдыстой цыппар дисциплинæйы дæр. Дык-каг бынат бацахста Фæсивæдон политикæ æмæ спорты фæдыл комитеты командæ æмæ æртыккаг бынат та адих кодтой Дыргуисы командæ æмæ Хъахъхъæнынады министрады дыккаг командæ, кæцытæ æрæмбырд кодтой æмхуызон баллтæ.
Æрæмбырдуæвджытæм ма стыр цымыдисдзинад сæвзæрын кодтой бæхты дугътæ. Ам фæ-уæлахиз Плиты Азæмæт, дыккаг ссис Зæгъойты Сослан æмæ æртыккаг бынат та бацахста Плиты Аслан.
Спортивон мадзæлтты хайадисджытæн раарфæ кодта президент Гаглойты Алан.
«Бузныг зæгъын мæ фæнды, бæрæгбонон мадзæлттæм чи æрбацыд, хайад сæ чи райста æмæ сæ чи бацæттæ кодта, уыдонæн. Бадзырд нын ис Уæрæсейы бирæ регионтимæ æмæ нæм иннæ аз æрцæудзысты, нæ къордтæ дæр сæхи ноджы хуыздæр бацæттæ кæндзысты æмæ ацы фæзуаты стыр ерыстæ сараздзыстæм», – загъта президент.
Паддзахады сæргълæууæг ма æхцайы премитæ, кукбоктæ æмæ майдантæй схорзæхджын кодта уæлахиздзауты. Бæрæгбонон ерысты фыццаг бынат бацахсæг командæ хорзæхджын æрцыд 100 мин сомæй, дыккаг бынатæн лæвæрд æрцыд 50 мин сомы æмæ æртыккаг бынат та чи адих кодта, уыцы командæтæ та райстой фæйнæ 15 мин сомы.
Бæхты дугъты уæлахиздзау æмæ призертæ та хорзæхджын æрцыдысты – 80, 40 æмæ 20 мин сомæй.
Республикон фестиваль «Традициты фæдонтæ – Аланиадæ»-йы фæлгæтты ма уый размæ дыууæ къуырийы дæргъы уагъд цыдысты спорты æндæр æмæ æндæр хуызтæй турниртæ.
ХУРИТЫ Батрадз
