Футбол

ФУТБОЛОН КЛУБ ИВД ÆРЦÆУДЗÆН ФУТБОЛЫ АКАДЕМИМÆ

Дзæуджыхъæуы футболон клуб «Спартак-Владикавказ» ивд æрцæудзæн футболы академи «Алани»-мæ. Ахæм уынаффæ райстæуыд РЦИ-Аланийы хицауады рабадты. Республикæйы физикон культурæ æмæ спорты министр Хуыгаты Алан куыд банысан кодта, афтæмæй уый арæзт цæуы, цæмæй  куса регионы курдиатджын футболистты агурыныл, сæ цæттæ кæнын æмæ  сын профессионалон спортмæ бацæуынæн баххуыс кæныныл, афтæ ма арæзт цæуы футболы размæцыды программæйы реализаци кæныны нысанæн.  

Ацы хъуыдыимæ сразы РЦИ-Аланийы Хицауады Сæрдар Тусхъаты Таймураз дæр. «Нæ республикæйы футболæн ис арф æмæ æнтыстджын традицитæ. Нæ сæйраг командæ хайад иста бæстæйы уæлдæр къорды чемпионатты, уыд УФ-йы чемпион, хайад иста Европæйаг кубокты. Нæ абоны уынаффæ у футболы размæцыдмæ даргъæмгъуыдон хайбавæрд бахæссыны сæраппонд, кæцы нæ командæйæн баххуыс кæндзæн футболон иерархийы аккаг бынат бацахсынæн», – загъта Тусхъаты Таймураз.

ИУУЫЛ ХЪÆЗДЫГДÆР ФУТБОЛИСТ

Дунейы футболисттæй миллиард доллары фыццаг чи бакуыста – уый у италиаг «Ювентус» æмæ Португалийы æмбырдгонд командæйы размæбырсæг Криштиану Роналду. Уый тыххæй хъусын кæны журнал Forbes. Роналдуйы профессионалон карьрерæ райдыдта 17 азы размæ. Æппæт ацы рæстæг уымæн куыстмызд лæвæрд æрцыд 650 милуан доллары. Иннæтæ та бакуыста рекламæйыл. Зæгъæм, уымæн цæргæ-цæрæнбонтæм контракт фыст ис компани Nike-имæ, кæцымæ гæсгæ йын æрвылаз дæр лæвæрд цæудзæн 24 милуан доллары. Карантины рæстæджы та социалон хызæг Инстаграммы йæ фарсыл дыууæ мæймæ сæвæрдта 4 рекламон посты æмæ æрмæст уыдон фæрцы фæхъæздыгдæр 2,1 милуан евройы. Афтæмæй спортсменты ‘хсæн Роналду ссис æртыккаг миллиардер. Раздæр ма миллиард доллары бакуыстой америкæйаг гольфист Тайгер Вудс æмæ боксер Флойд Мэйвейзер.

Фæлæ кæд ацы æртæ зындгонд адæймаджы миллиардгай доллартæ бакуыстой, уæддæр не сты иууыл бонджындæр спортсментæ. Иууыл бонджындæр разынд англисаг командæ «Лестер»-ы футболист Фаик Болкиах. Уый у Брунейы султаны æфсымæры лæппу. Йæ мулкы аргъ у 20 миллиард долларæй фылдæр.

Хуриты Батрадз