Финансон зиан хæссы дунейы спорт

Коронавирусы пандемийы аххосæй дунейы бæстæты спорты æндæр æмæ æндæр хуызтæй чемпионаттæ æмæ турниртæ урæд кæй æрцыдысты, уый фæстиуæгæн стыр финансон зиан хæссы дунейы спорт. Уыимæ къаддæр кæнынц  спортивон клубты æфтиæгтæ. Кæд уавæр нæ фæива, уæд европæйаг футболон чемпионаттæ бахаудзысты историйы иууыл стырдæр кризисы æмæ фесафдзысты цалдæргай миллиард евройы. Уымæ гæсгæ клубты бахъæуы сæ спортсментимæ бадзурын сæ куыстмыздтæ сын æрæппарыны тыххæй. Зæгъæм, футболон клуб «Барселона» бадзырдта йæ хъазджытимæ, цæмæй сын сæ куыстмызд фæкъаддæр кæна 70% онг. Уымæ гæсгæ кæд ацы командæйы сæйраг стъалы Лионель Мессии иу къуыримæ иста 866 мин евройы, уæд ныр райсдзæн æрмæстдæр 260 мин евройы.

Дунейы иннæ зындгонд футболист Криштиану Роналду италиаг «Ювентус»-ы хъазгæйæ, иу къуыримæ иста 600 мин евройы, фæлæ италиаг дзыллон информацийы фæрæзты информацимæ гæсгæ йæ куыстмызд фæкъаддæр уыдзæн 33% æмæ  йын уыдзæн 400 мин евройы иу къуыримæ. 

Дунейы иууыл бонджындæр клубтæй сæ иу – французаг «ПСЖ»-йы размæбырсæг Неймары куыстмызд та 711 мин евройæ æрхаудзæн 355 мин евромæ иу къуыримæ. Уынаффæ цæуы цæмæй 50% онг æрæппарой Национ баскетболон ассоциацийы клубты хъазджыты куыстмыздтæ.

Ноджы уæззаудæр финансон уавæры сты спорты индивидуалон хуызтæ. Специалистты хъуыдымæ гæсгæ сын сæвзæргæ уавæры аххосæй  уыдзæн регресс. Зæгъæм, ихыл фигурон бырынæй спорты архайæг спортсментæ фылдæр финансон фæрæзтæ куыстой коммерцион шоуты. Фæлæ ныр ахæм шоутæ уагъд кæй нал цæуынц, уый аххосæй æмбæлынц финансон проблемæтыл. Зæгъæм, спортсменты фидын хъæуы ихын фæзуатæн, программæтæ чи фыссы, уыдонæн æмæ костюмты тыххæй дæр. Уыцы рæстæджы хуыздæр уавæры сты уæрæсейаг спортсментæ, кæцытæн уыцы хъуыддаджы нæ хъæуы финанстæ хардз кæнын, уымæн æмæ æппæт финансон хæрдзтæ дæр йæхимæ исы спорты ацы хуызы уæрæсейаг федераци. Уымæ гæсгæ, специалисттæ куыд зæгъынц, афтæмæй уæрæсейаг фигуристтæн фенцондæр уыдзæн æввахс азты дунеон ерысты.

ЙÆ ФАТЕРЫ АЛЫГЪД 100 КИЛОМЕТРЫ

21 апрелы Сахарайы змисджын быдырты хъуамæ уыдаид 250-ки-лометрон ультрамарафон. Уым хъуа-мæ хайад райстаид уæрæсейаг спортсмен Дмитрий Якухный. Фæлæ коронавирусы пандемийы аххосæй ацы ерыстæ уагъд кæй не ‘рцыдысты, уый тыххæй Якухный сфæнд кодта марафон алидзын йæ фатеры. Уый йæ сынтæджы  алыварс алыгъд 100 километры бæрц. Цæмæй йæ сæр ма разылдтаид, уый тыххæй-иу алы 10 километры ивта йæ лыгъды здæхт. Якухный 100 км алыгъд 10 сахат æмæ 19 минутмæ. Ацы хъуыддаджы йын баххуыс кодтой йæ бинонтæ. Уыдон ын æрцæттæ кодтой сæрмагонд рацион банантæ, джитъритæ æмæ апельсинтæй, кæцыты-иу Дмитрий ахордта лидзгæ-лидзын.

«Цалынмæ лыгъдтæн, уæдмæ банантæй дарддæр бахордтон дыууæ килойы бæрц, джитъритæ æмæ цалдæр апельсины, афтæ ма энергетикон батончиктæ. Куы-иу фæхатыдтæн мæ хæцъæфтæ æлхынцъ кæнын райдыдтой, уæд-иу мæ хъуыд цæхджын исты ахæрын æмæ-иу райстон чипстæ. 50 километры фæстæ æрлæууыдтæн 30 секунды бæрц, цæмæй ахæрон макаронтæ, стæй ма ноджы 30 секунды æрлæууыдтæн æмæ ахордтон бутерброд кæсагимæ (тунец)», – фехъусын кодта спортсмен.

Банысан кæнын хъæуы уый, æмæ Якухный фыццаг кæй нæу йæ фатеры марафон алидзынæй. Уый размæ та французаг спортсмен Элиш Ночомивоц  йæ балконы дыууæрдæм лидзгæйæ, алыгъд 42 км 195 метры дæрддзæгæн. Уый тыххæй йæ бахъуыд 6 сахат æмæ 48 минуты.

ХУРИТЫ Батрадз