Куыд зонæм, афтæмæй нæ горæты йæ цæрæнуатон уавæртæ фæхуыздæркæнинаг кæмæн сты, уыцы æмбæстæгтæ ногæй регистраци цæуынц. Горæты администрацийы пресс-секретарь Коцты Зæринæ нын куыд радзырдта, афтæмæй, рады чи лæууынц, уыдоны номхыгъды ис 2000 бинонтæй фылдæр æмæ сæ документтæ сног кодтой æрмæстдæр 700 адæймаджы бæрц. Афтæмæй та документтæ исыны æмгъуыд фæуд кæны. Уымæ гæсгæ сидынц рады лæуджытæм, цæмæй фæтагъддæр кæной æмæ сног кæной сæ документтæ. Ног номхыгъд арæзт цæуы уымæн, цæмæй бæлвырдæй сбæрæг уа, цал адæймаджы хъæуы æцæгæйдæр фæхуыздæр кæнын сæ цæрæнуатон уавæртæ. Зæронд номхыгъдмæ хаст чи æрцыдысты, уыдонæй иутæ ацыдысты цæрынмæ æндæр рæттæм, æндæр категорийы рады лæуджытæн та сæ нымæц фæфылдæр. Ис ма дзы æндæр ивындзинæдтæ дæр. Уымæ гæсгæ арæзт цæуы ног номхыгъд. Æмæ тагъдыл хъæуы рады лæуджыты ногæй срегистраци кæнын.
Администрацийы куыд зæгъынц, афтæмæй хи ногæй срегистраци кæныны тыххæй хъæуы бацæуын администрацимæ, цæрæнуат приватизаци кæныны, хыгъды æвæрын æмæ дих кæныны хайадмæ. Хъæуæг документты номхыгъд мыхуыр ис администрацийы официалон сайтыл. Фæлæ йæ райсæн ис хайадмæ бацæугæйæ дæр.
Хи ногæй срегистраци кæныны тыххæй æппæт документтæ дæр райсæн ис горæты администрацийы бæстыхайы. Уыцы документтæ сты: бинонты алы æххæст кары уæнгæн дæр адресон бæлвырдгæнæн; бинонты алы куыстхъом уæнгæн дæр куысты бынатæй бæлвырдгæнæн кæнæ кæй нæ кусы, уый тыххæй бæлвырдгæнæн; бинонты алы æххæст кары уæнгæн дæр, зæххы фадыг ын кæй нæй, уый тыххæй бæлвырдгæнæн; бинонты алы æххæст кары адæймагæн дæр ирон паспорты ксерокопи, алы æнæххæст кары адæймаджы райгуырды тыххæй бæлвырдгæнæны халдих, бинонты алы æххæст кары адæймагæн та къайады тыххæй бæлвырдгæнæны халдих кæнæ къайады кæй нæй, уый тыххæй бæлвырдгæнæн; хæдзарон чиныджы кæнæ ордеры халдих, æнæзмæлгæ исадыл бары тыххæй æвдисæндары халдих, техпаспорты халдих.
Уæдæ фæтагъддæр кæнут цæрæнуатон уавæртæ фæ-хуыздæр кæнынмæ, рады лæу-джытæ. Уый у уæхи хæрзиуæгæн.
БЕСТАУТЫ Валя
Comments are closed, but trackbacks and pingbacks are open.