ЧИ БАВЗÆРСТА – УЫЙ ХЪУЫДЫ КÆНЫ…

Президент Бибылты Анатоли хайад райста Хуссар Ирыстоны сгуыхт дохтыр Зæгъойты Никъалайы чиныг «Кто пережил, тот помнит…»-ы презентацийы. Мадзал уагъд æрцыд Цхинвалы Анахарсисы номыл Республикон библиотекæйы.

Чиныг мыхуыры рацыд Республикæ Хуссар Ирыстоны Информаци æмæ мыхуыры комитеты фæрцы. Чиныгмæ хаст æрцыдысты хæсты рæстæджы медицинон кусджыты  мысинæгтæ, кæцытæ æхстыты бын удуæлдайæ æххæст кодтой сæ куыст.

Арфæйы ныхæстимæ æрæмбырдуæвджыты раз раныхас кодта паддзахады сæргълæууæг.

«Абон мах æртымбыл стæм ахæм адæймаджы чиныджы презентацимæ, кæцыйы мах уарзæм, аргъ æмæ йын кад кæнæм. Зæгъойты Никъала Георгийы фырт у стыр дамгъæйæ адæймаг, кæцы æнувыд у йæ хъуыддагыл æмæ йæ Райгуырæн зæххыл!», – загъта Бибылты Анатоли.

Уый хъыгзæрдæйæ банысан кодта, Зæгъойты Никъала йæхæдæг кæй нæй презентацийы йе ‘нæниздзинады тыххæй æмæ йæ цæст бауарзта, тагъд цы сæнæниз уа, уый.

«Иууыл уæззаудæр азты дохтыртæ равдыстой хъæбатырдзинад, профессионализм æмæ æнувыддзинад. Уыдоны куыстæн дæр абарæн ис хæстон архайд-тыты быдыримæ, æрмæст палатæты æмæ операцион боксыты. Дохтыртæ æхсæвы фынæй нæ кодтой, зын уавæрты æххæст кодтой сæ куыст. Уыдонмæ хауы, нæхи Къоли дæр, мах æй куыд хонæм, афтæ », – загъта Президент.

Бибылты Анатоли банысан кодта чиныджы ахсджиагдзинад, зæгъгæ, бирæтæ дзурынц уый тыххæй, фæлæ йыл ничи фыссы.

«Чиныг йæ актуалондзинад никуы фесафдзæн. Уым фыст æрцыдысты, махæн зындгонд чи нæ уыд, ахæм факттæ ног историйы æмæ мах бузныг стæм Никъалайæ», – загъта паддзахады сæргълæууæг.

Информаци æмæ мыхуыры комитеты сæрдар Хъотайты Мария банысан кодта, зæгъгæ, чиныджы æрмæст мысинæгтæ нæй, фæлæ у цавæрдæр экскурс Хуссар Ирыстоны ног историйы, кæцы дзурæг у не ‘мбæстæгты æнгомдзинад æмæ хъайтардзинадыл, цы ран цинизмæн нæ уыд бынат.

Йæ ныхæстæм гæсгæ, чиныг уагъд æрцыд цъус тиражæй, фæлæ кæй бафæнда, уыдон тагъд рæстæджы базонгæ уыдзысты уæлæмхасæн «Ирон чиныг»-ы.

Зæгъойты Никъалайы къласæгтæ, коллегæтæ æмæ хæлæрттæ радзырдтой зынгæ хирургимæ баст цымыдисаг, стæй худæг историтæ.