Фæлхасгæнæджы бартæ хъахъхъæныны Æппæтдунеон боны цытæн агентад «Спутник»-мæ хуынд æрцыдысты РХИ-йы Сæйраг санитарон дохтыр æмæ Фæлхасгæнджыты бартæ хъахъхъæныны фæдыл комитеты сæрдар Коцты Маринæ æмæ хайады сæргълæууæг Санахъоты Жаннæ. Уыдон сæ дыууæ дæр дзырдтой, фæлхасгæнæджы бартыл æмæ сæ куыд хъахъхъæнын хъæуы, уыдæттыл.
«Магазины æлхæд фауддзаг хæлцадон продукттæ кæнæ хæлд техникæ куы балхæнай, уæд кæдæм бахъаст кæнай æмæ дын дæ бартæ чи бахъахъхъæна, уый у мах комитет. Фæлæ бирæтæ уый нæ зонынц, æмæ сын зын вæййы сæ бартыл дзурын», – загъта Коцты Маринæ.
Æвæццæгæн, нæй ахæм адæймаг, кæцыйы магазинмæ бацæуын æмæ хæлцадон продукттæ, стæй цардуагон техникæйы хуызтæ балхæныны сæр нæ бахъæуы. Фæлхасгæнджытæн фæзын вæййы уыцы стыр ассортиментæй равзарын. Хатт рауайы афтæ дæр, æмæ балхæнгæ товары гъæд нæ вæййы æмбæлон, фыдæнхъæл нæ фæкæны. Ахæм рæстæджы фæлхасгæнæг йæ бартæ куыд хъуамæ бахъахъхъæна, уый тыххæй Санахъоты Жаннæ афтæ зæгъы: «Товар æлхæнын хъæуы æрмæстдæр стационарон æмæ специализацигонд базарадон объектты, кæцытыл фыст ис магазины ном, йæ бынат æмæ куысты режим. Хуыздæр у, зонгæтæ æмæ сыхæгтæ кæцы маркæйы техникæйæ æппæлынц, ахæм товар балхæнын. Товар исын нæ хъæуы комкоммæ витринæйæ. Уый, гæнæн ис, æрцыд цалцæггонд. Бынаты базонын хъæуы, равзаргæ товар кусы æви нæ. Æлхæнæджы домæнтæм гæсгæ уæйгæнæг хæсджын у, цæмæй йæ базонгæ кæна, товар куыд иугæнгæ у æмæ куыд кусы, уыимæ. Æлхæнæг хъуамæ æрдома, цæмæй йын равдисой техникон паспорт, гарантион талон, эксплуатацийы фæдыл инструкци. Фæлхасгæнæг хъуамæ æрдома, цæмæй гарантион талон раст йедзаг æрцæуа – уæйгæнæг, гæнæн ис ма фæнысан кæна, товар йæ магазины æлхæд кæй æрцыд, æмæ фæстæдæр, гæнæн ис фæзыной зындзинæдтæ аххосджыны бæрндзинадмæ æркæныны фæдыл. Цы товар балхæдæуыд, уымæн æхца бафидгæйæ, уый магазинæй хъæуы уайтагъд рахæссын, цæмæй йæ, чи нæ кусы, ахæмæй ма фæивой».
Санахъоты Жаннæ ма куыд загъта, афтæмæй зонын хъæуы, техникон æгъдауæй алы ног товары дæр кæй ис аздахæн æмæ йын йæ аргъ æрдомæн йæ балхæнынæй 15 боны æмгъуыдмæ, кæд æмæ дзы раргом сты, æгæрыстæмæй, чысыл цухдзинæдтæ дæр, уæд. Дыккаджы та уый, æмæ æлхæнæгæн йæ бон у гарантион æмгъуыды фæудмæ æрдома ахæм кæнæ æнгæс товар, уæлæмхас ын бафидын кæд хъæуы, уæд æй бафидгæйæ. Уымæй дарддæр ма егъаугабаритон товар цалцæг кæнын, баивын кæнæ та фæстæмæ аздахыны тыххæй хæрдзтæ фиды уæйгæнæг.
«Товар баивыны тыххæй фæлхасгæнæджы домæн хъуамæ æххæст æрцæуа 7 бонмæ, æхцатæ раздахыны тыххæй домæн та – 10 бонмæ. Товар баивыны тыххæй гæнæн ис бахъæуа 7 бонæй фылдæр æмæ уæд, афтæ ма товары гарантион цалцæджы рæстæджы дæр фæлхасгæнæг хъуамæ æрдома, цæмæй йын рæстæгмæ пайда кæнынæн радта æнгæс товар. Ахæм товар лæвæрд цæуы æртæ боны æмгъуыдмæ», – загъта Санахъоты Жаннæ.
Ацы домæнтæ нæ хауынц ахæм товартæм, куыд автомобилтæ, мотоциклтæ, хъæдын дзаумæттæ, медицинон нысанæн кæмæй пайда кæнынц, ахæм электроприбортæ æмæ æндæр ахæмтæ.
Кæд æмæ техникон æгъдауæй вазыгджын товары цухдзинæдтæ разындысты 15 боны фæстæ, уæд æй баивæн æмæ ма йын йæ аргъ фæстæмæ раздахын ис товары зынгæ цухдзинад куы рабæрæг уа, ома, цалцæггæнæн кæмæн нæй, ахæм серьезон дефект, цалцæджы фæстæ ногæй чи фæзынди æмæ стыр хæрдзтæ чи домы. Уæд хъæуы акт саразын, цыран фæнысан хъæуы, товар уæй кæд æрцыд дефектимæ, афтæ ма йыл хъуамæ æвæрд уой фæлхасгæнæджы æмæ уæйгæнæджы къухфыстытæ дæр. Кæд æмæ быцæуаг уавæр сæвзæра, уæд гæнæн ис æмæ бахъæуа экспертизæ ауадзын. Гарантион æмгъуыды рæстæджы уый уагъд цæуы уæйгæнæджы хардзæй æмæ йæ уадзгæ та кæнынц специалисттæ. Кæд æмæ фæлхас-гæнæг разы нæ уа экспертон хатдзæгимæ, уæд ын бар ис бахата хæдбар экспертон организацимæ, кæннод та хъаст бадæтта тæрхондонмæ. Кæд æмæ уæй чи æрцыд, уыцы товарæн нæй гарантион æмгъуыд æмæ дзы цухдзинæдтæ разынд, уæд фæлхасгæнæг йæхæдæг уæйгæнæгæн сбæлвырд кæны, дефект йæ аххосæй кæй фæзынд. Уый гæнæн ис суа эксперты хатдзæг æмæ экспертизæ та уагъд цæуа фæлхасгæнæджы хыгъдæй. Кæд æмæ уæйгæнæг нæ разы кæна техникон æгъдауæй товары фæстæмæ раздахын, баивын кæнæ цухдзинæдтæ аиуварс кæныныл, уæд хъæуы домæн дыууæ экземплярæй саразын. Уым хъуамæ нысан уа, фæлхасгæнæг разы цæмæй нæу, афтæ ма сæ сæххæст кæныныл уæйгæнæг разы кæй нæу, уыцы факт дæр. Уыцы экземпляртæй иу лæвæрд цæуы уæйгæнæгмæ, иннæ та баззайы фæлхасгæнæгмæ. Домæнæн дзуапп нæ райсгæйæ, фæлхасгæнæг хъуамæ фехъусын кæна, кæй бахатдзæнис РХИ-йы Фæлхасгæнæджы бартæ æмæ адæймаджы æнæниздзинад хъахъхъæныны комитетмæ. Комитеты сымахæн кæддæриддæр бакæндзысты æнæаргъ æххуыс.
УАЗÆГТЫ Марфа
Comments are closed, but trackbacks and pingbacks are open.