Зымæджы бонты нæ республикæ хатт аззайы æнæ электроэнергийæ. Аварийы рæстæджы республикæйы цæрджытæ зындзинæдтæ февзарынц. Цæмæй ахæм цаутæй хызт уæм, уый тыххæй ивгъуыд аз Уæрæсейы Федерацийы Æдасдзинады советы секретары хæдивæг Рашид Нургалиев йæ радон балцытæй сæ иуы ныфс бавæрдта Уæрæсейы энергетиктæм кæй бахатдзæнис, цæмæй электроадæттæн хахх Ручъы тъунелыл уагъд æрцæуа Хуссар Ирыстонмæ.
Уæрæсейы энергетикæйы министрады специалисттæ азы райдианы æрцыдысты нæ республикæмæ, цæмæй сахуыр кæной уæлæмхас электрохахх кæуылты æнцонвадатдæр уыдзæнис рауадзын, уыцы фарстатæ. Ручъы тъунелыл электрохахх ауадзынмæ хъуамæ æрæвнæлдтаиккой сæрды мæйты æмæ азы кæронмæ хъуамæ æппæт куыстытæ дæр уыдаиккой фæуд. Мах цымыдис кодтам, ныртæккæ куыстытæ цы стадийы сты, уымæ. Уый фæдыл нын республикæйы «Энергоресурс»-ы афтæ загътой: «Æрæджы æххæст æрцыдысты цæттæгæнæн куыстытæ, цæмæй Ручъы тъунелыл уагъд æрцæуа. Йæ арæзтадмæ æрæвналдзысты ацы мæй. Куыд зонæм, афтæмæй республикæ электроэнергийæ ифтонг цæуы Уæрæсейæ цæуæг иунæг хаххы руаджы, кæцы цæуы Зæрæмæг-Цæгаттаг портал – Дзауыл. Электроифтонгадæн ног резервон электроадæттæн хахх саразын кæй хъæуы, уыцы фарстыл уынаффæ цыд социалон-экономикон æмгуыстады фæдыл Æхсæнхицауадон къамисы рабадты дæр. Мах бакуыстам æхсæз проектыл, уыдонæй иууыл æнцонвадатдæр у тъунелыл кабель рауадзын. Уымæн æмæ йыл не ‘ндавдзæнис æвзæр боныгъæд. Боныгъæд, уæлдайдæр та зымæгон рæстæджы свæййы Хуссар Ирыстоны рухсы ахицæны иууыл арæхдæр аххосаг. Цæрджыты бахъæуы æнхъæлмæ кæсын суткæйы бæрц æмæ уымæй фылдæр дæр, цалынмæ цалцæггæнджытæ Цæгатæй кæнæ Хуссарæй фæхæццæ вæййынц аварийы бынатмæ æмæ йæ нæ аиуварс кæнынц, уæдмæ».
Ам ма куыд зæгъынц, афтæмæй зымæгон бонты, Дзомагъгоммæ æфцæгыл электрохаххмæ практикон æгъдауæй бафтæн нæ вæййы. Ацы бæрзонд хæххон бынат, дам, у зынвадат, тæссаг у зæйтæ æрцæуынæй дæр. Уырдæм афæдзы аст мæйы бацæуæнтæ нæ вæййы. Афтæ зæгъæн нæй, ома, электрохызæджы кусджытæ æвзæр кусынц æмæ уымæн аскъуыйынц электротелтæ дæр. Сæрдыгон бонты паддзахадон унитарон куыстуат «Энергоресурс»-ы кусджытæ бакæнынц профилактикон куыстытæ ранæйрæтты, бацæттæ йæ кæнынц, фæлæ уæззау, хуылыдз мит нæ бауромынц телтæ. Куыддæр ацы аз резервон электрохахх арæзт æрцæуа, афтæ цæрджытæ хатгæ дæр нал фæкæндзысты авари кæй æрцыд, уый.
Мах ма цымыдис кодта, ацы аз Æхсæнхицауадон къамисы рабадты дзырд цæудзæнис Зонкъары ГЭС-ы арæзтадыл æви нæ, уый. «ГЭС саразыны фарст раздæр дæр æмæ ныр дæр актуалон у.
Специалисттæ банымадтой æмæ сахуыр кодтой Зонкъары ГЭС-ы арæзтад республикæйæн цас слæудзæнис. Ныртæккæ махæн нæ бон нæу, уый бæрц фæрæзтæ ссарын. Уымæ гæсгæ фарст хаст æрцыд фæстæдæр æмгъуыдмæ», – загътой Паддзахадон унитарон куыстуат «Энергоресурс»-ы.
Нæ уацх.
Comments are closed, but trackbacks and pingbacks are open.