Информаци æмæ мыхуыры паддзахадон комитеты сæрдар Хъотайты Мария «Спутник – Хуссар Ирыстон»-ы пресс-центры йæ æрвылкъуырион брифингы рæстæджы æрдзырдта къуырийы дæргъы æрцæугæ нысаниуæгджын цауты фæдыл.
Фыццаджыдæр, уый дзырдта, ныртæккæ республикæйы амалиуæггæнджытæ Уæрæсеимæ арæны сæрты сæ товартæ раласыны тыххæй цы проблемæтыл сæмбæлдысты, уый фæдыл. Уыдон ‘хсæн ис ахæмтæ, кæцытæн ныридæгæн фесæфтой сæ товарты гъæд, уымæн æмæ аивгъуыдта сæ пайда кæныны рæстæг, науæд та фесæфтысты уазалы.
«Ацы проблемæ абон нæ фæзынд, уый æххæссы суанг 2011 азæй, æмæ та ацы аз ногæй сæвзæрд. Амалиуæггæнджытæ сæхæдæг уæрæсейаг таможнæйы домæнтæ хынцынц. Уымæн æмæ Уæрæсе æмæ Хуссар Ирыстоны таможнæйон органты æхсæн цы бадзырд ис интеграцийы фæдыл, уымæ гæсгæ Хуссар Ирыстоны таможнæйон органтæ 2020 азы хизынц Евразиаг экономикон цæдисы таможнæйон бæстонкæнынады фадыгмæ. Афтæ ма таможнæйон органты иу фарс, кæрæдзиæмбарынады бындурыл куы нымайой, товартæ таможнæйон басгæрсты фæстиуæгæн æмæ арæныл цы транспортон фæрæзтæ хизынц, уыдон, уæд сæ хъуамæ нымайой иннæ фарс дæр. Уымæ гæсгæ таможнæйон органтæн цы домæнтæ ис, уыдон сты закъонон.
Кæй зæгъын æй хъæуы, æппæт ацы серьезон проблемæтæ канд амалиуæггæнджыты проблемæтæ не сты, фæлæ сты Хицауады æдзух хъусдарды бын. Нырттæккæ нæ республикæйы Хицауады Сæрдары хæдивæг Бекъойты Геннади æмæ Таможнæйон комитеты сæргълæууæг Цхуырбаты Мурат сты кусæгон балцы Уæрæсейы. Уыдон æппæтдæр аразынц, цæмæй ацы фарст æввахс рæстæджы бæстон æрцæуа», – банысан кодта Хъотайты Мария.
Йæ ныхæстæм гæсгæ, нæ республикæйы амалиуæггæнджыты иу къорды сæхимæ райстой закъондæттынадон органы депутаттæ Парламенты Сæрдар Тадтаты Аланы сæргълæудæй. Уыдон лæмбынæг байхъуыстой, амалиуæггæнджытæ цы проблемæтыл æмбæлынц, уыдонмæ æмæ сын ныфс бавæрдтой, æввахс рæстæджы ацы фарст оперативонæй бæстон кæй æрцæудзæн, уымæй.
Ацы хъуыддаджы фæдыл ныхасгæнæг банысан кодта, паддзахадон резерв саразыны фарсты актуалондзинад, зæгъгæ, уый æнæ-мæнгхъæуæг у канд абоны сæвзæргæ уавæры тыххæй нæ, фæлæ цахæмфæнды уæлвæткон уавæрты дæр. Инвестпрограммæйы фæлгæтты ацы аз уалдзæджы æрæвналдзысты æфтауцдæттæ аразынмæ. Стратегион нысаниуæджы объектты арæзтады бынат нырма бæлвырд нæу. Бæлвырд у уый, æмæ цардæн ахсджиаг продукттæ, медикаменттæ хъуамæ фаг кæной дæс боны æмгъуыдмæ.
Культурон цаутыл дзургæйæ
Паддзахадон ансамбль «Симд» ног кæны йæ репертуар. Ныртæккæ ацы коллектив зæрдæбын куыст кæнынц хореографи фæхуыздæр кæныныл. Æппæт уыцы деталтыл коллективимæ кусынц Мæскуыйæ æрхонгæ дæсны хореографтæ. Ахæм зынгæ хореографтæ хуынд цæудзысты дарддæр дæр, цæмæй сæ дæсныйад амоной ансамблы коллективæн. Уымæ гæсгæ нæ паддзахадон ансамблы репертуары фæзындзæнис Кавказы адæмты националон кæфтыты бирæ хуызтæ. Æмæ уымæ гæсгæ «Симд»-æн табугæнджытæм æнхъæлмæ кæсы цымыдисон концерттæ.
Ирыстоны арæзт сæнтæ хайад исынц дунеон равдыстыты
«Продекспо» у Уæрæсейы хæлцадон æмæ нозты продуктты дунеон равдыстыты егъау фæзуат. Ацы ран æвдыст цæуынц Уæрæсейы иууыл егъаудæр нозтыты продукци 30 бæстæйæ – Аргентинæ, Китай, Испани, Бразили, Португали, Азербайджан æмæ æндæр бæстæтæй. Ацы равдыст ахъаз у клиентты базæ фæуæрæхдæр кæнынæн, фылдæр кæны уæййæгты гуырахст. Хуссар Ирыстон стыр аргъ кæны ацы фæзуатæн æмæ дзы хайад исынц ныр дыууæ азы дæргъы.
«Нæ националон экспозици «Ирон сæн»-æн ацы хъуыддаг уыд раст, эффективон къахдзæф, нæ къухты бафтыд хорз æнтыстытæ, къухтæ фыст æрцыдысты уæрæсейаг нымад компанитимæ, казахстайнаг дистрибьюторон æмæ федералон хызæгтимæ. Ацы бизнес рауæрæх кæныны фарс сты нæ республикæйы къухдариуæгад дæр. Ацы фæзуаты руаджы сæнуадзæны минæвæрттæ равдысты рæстæджы æрдзырдтой нæ хъæздыг зæххы тыххæй, сæнæй пайда кæныны культурæйыл.
Ацы аз ма уым æвдыст æрцыд Хуссар Ирыстоны уагъд коньяктæ æмæ минæралон дон.
План ма цæуы фидæн аз ацы равдысты хайад райсын æмæ базармæ адджын сæнтæ ласын дæр. Банысан кæнын хъæуы уый, æмæ хуссарирыстойнаг продукцийæн ис фæлхас-гæнджытæ, куыд сæнтæн, афтæ минералон дæттæн дæр.
Нæ уацх.
Comments are closed, but trackbacks and pingbacks are open.