Ленингоры районы таможнæйон уадзæн пункт «Раздæхæн» цы ногдзи-нæдтæ æрхаста, цас эффективон æмæ пайдаджын у нæ таможнæйы кусджытæн, уый тыххæй дзырдта «Спутник»-ы пресс-центры йæ æрвылкъуырион брифинджы РХИ-йы Информаци æмæ мыхуыры паддзахадон комитеты сæрдар Хъотайты Мария.
Ацы бынаты уадзæн пункт бакæныны уынаффæ ист æрцыд ивгъуыд аз 27 декабры хицауады уагæвæрды бындурыл. Мария куыд дзырдта, уымæ гæсгæ чысыл рæстæг ацыд ацы уадзæн пункт схæрзарæзт кæнын, кусæн бынæтты нымæц сбæлвырд кæныныл, æмæ уый фæстæ 17 январы æххæстбæрцæй скуыста. Уыцы таможнæйон пост бакæнгæйæ фæзынд дæс кусæн бынаты. Кусджыты нымæцы ис, Уæрæсейы Таможнæйон академи чи фæцис, ахæм цыппар адæймаджы æмæ тæлмацгæнæг, кæцы тæлмац кæны гуырдзиаг æвзагæй иронмæ. Уыдонæй дарддæр ма ацы посты кусы «Югоссельхознадзор»-ы минæвар.
Хъотайты Марияйы ныхæстæм гæсгæ, йæ райдианы бынæттон цæрджытæ ацы ногдзинадмæ хъавгæ ахаст дардтой, фæлæ куы æрцахуыр сты, уæд ницахæм хъæстытæ ис уыдоны ‘рдыгæй. Æрвылбон дæр ацы таможнæйон посты сæрты хизы 5 кæнæ 7 транспортон фæрæзы, иу кæнæ дыууæ тоннæйы уæзтимæ. РХИ-йы хицауады уынаффæмæ гæсгæ раздæр уадзæн пунктыл кæд уыд æрмæстдæр 50 килограммы уæз ласыны бар, уæд ныр та ис цас дæ бон у, уыйбæрц уæзтæ ласыны бар.
«Хæлцадон товарты таможнæйон фиддонты гуырахст у 1,5 проценты, акцизон товартæн та – 3 проценты бæрц, уыцы нымæцы Уæлæвæрд аргъы хъалон дæр. Хуссар Ирыстоны Таможнæйон службæйы информацимæ гæсгæ афæдз ацы таможнæйон пост паддзахады казнамæ хæсдзæн 9 милуан сомы бæрц. Кæй зæгъын æй хъæуы, Ручъы уадзæн пункты уавæр бирæ хуыздæр у æмæ фылдæр æндавы æфтиæгтыл», – дзырдта комитеты сæргълæууæг.
Таможнæйон пост «Раздæхæн»-ыл нæй æхсыр æмæ дзидзайы продукци афтæ алкоголон æмæ æнæалкоголон нозтытæ ласыны бар. Гуырдзыстонæй Ленингормæ цыхт ласыны бафæлвæрдтытæ дзы уыд, фæлæ сæ не ‘рбауагътой санитарон нормæтæм гæсгæ.
«Кæд æмæ нырма бюджетмæ æфтиæгты нымæц егъау нæу, уæддæр политикон цæстæнгасæй мах банысан кодтам нæ паддзахаддзинад, æмæ мæнмæ гæсгæ, Гуырдзыстон дæр цасдæрбæрцæй нымайы Хуссар Ирыстоны паддзахадон арæн»,- банысан кодта Хъотайты Мария.
Нæ уацх.
Comments are closed, but trackbacks and pingbacks are open.