12-æм февралы цытджын æгъдауæй байгом Чиаты Иосифы уынгыл сабиты ногарæзт рæвдауæндон.
«Æфсир» – афтæ хуындзæнис ныр №1-æм сабидон. Райдзаст æмæ уæрæх агъуыст, кæрты алы къордæн дæр хицæн хъазæн фæзуæттæ, спортивон зал тренажертæй ифтонг, ног модулон кухни… Къордтæ се ‘ппæт дæр ифтонг сты телевизортæ, планшеттæ, магнитофонтæ, интерактивон фæйнæджытæй, спортæй архайынæн сын ис хицæн хатæнтæ. Æппæт хатæнты дæр æвæрд сты уæлдæф сыгъдæггæнæнтæ.
Рæвдауæндон арæзт у 160 сабийæн. Уыдонæй 120 сывæллон ныридæгæн цæуынц ардæм. Директорæй йын нысан æрцыд Гасситы Фатимæ.
Сабиты рæвдауæндон цытджын æгъдауæй байгом кæныны церемонийы хайад райстой РХИ-йы Президент Бибылты Анатоли, Ахуырад æмæ зонады министр Гасситы Натали, Хицауады Сæрдар Пухаты Эрик, УФ-йы минæвар Хуссар Ирыстоны Мурат Кулахметов, Парламенты спикер Тадтаты Алан æмæ æндæртæ.
Уыдон азылдысты уагдоны хатæнты. «Тынг æхсызгон мын у ацы рæвдауæндон гом кæнын, уымæн æмæ æз мæхæдæг дæр сабийæ цыдтæн ардæм. 2008 азы хæсты фæстæ ам цы пырхæнтæ уыд, уыдоны бынаты кæй сырæзт ахæм рæсугъд бæстыхай, уымæй мæ зæрдæ райы», – дзырдта РХИ-йы Президент Бибылты Анатоли.
Уый ма загъта, зæгъгæ, ацы рæвдауæн-доны фæзынд уæлдай æхсызгондзинад хæссы, йæ физикон æнæниздзинад лæмæгъ кæмæн у, уыцы сывæллæттæн. Уыдонæн дзы конд æрцыд коррекцион къорд дæр. Уырдæм кусынмæ ист æрцыд æцæг профессионалтæ, кæцытæ сабитимæ кусдзысты физикон æмæ моралон æгъдауæй дæр. Ныр ахæм сабиты ныййарджытæ æдыхст уыдзысты сæ сывæллæтты тыххæй.
Сабидоны алы къорды дæр конд æрцыд видеоцæстдарæнтæ.
Церемонийы рæстæджы ма Бибылты Анатоли куыд загъта, афтæмæй 2020 азы Цхинвалы ноджы бакæндзысты иу сабидон. Уый та уыдзæн Гуыбаты æфсымæрты уынгыл.
УАЗÆГТЫ Марфа
Comments are closed, but trackbacks and pingbacks are open.