Зынгæ нейрохирург Дзукъаты Дмитри РЦИ-Аланийы Сæргълæууæг Сергей Меняйлойы барамындæй хорзæхджын æрцыд республикæйы уæлдæр паддзахадон хорзæх «Слава Осетии»-йы орденæй. Хорзæх ын цытджын æгъдауæй радта УФ-йы президенты цур республикæйы æххæстбарджын минæвар Игорь Барсков.
Дзукъаты Дмитрийы ном хорз зындгонд у куыд Уæрæсейы, Ирыстоны, афтæ фæсарæнты дæр. Уый сарæзта бирæнымæц вазыгджын операцитæ. Бакуыста ног хирургион методтæ рагъыстæджы фæкарздæргонд травмæйы рæстæджы æмæ алыгъуызон дегенеративон низты тыххæй. Арæх йæ пациенттæ свæййынц профессионалон спортсментæ дæр.
2009 азы Дзукъайы фыртæн саккаг кодтой сæйраг медицинон хорзæх – преми «Призвание»-йы «Уникалон операци саразыны тыххæй» номинацийы. 2012 азы ссис æнæниздзинад хъахъхъæныны къабазы номинаци «Азы дохтыр-нейрохирург»-ы мæскуыйаг фестиваль «Формула жизни»-йы. 2014 азы слæууыд дегенеративон низтæ æмæ рагъыстæджы карз травмæйæ рынчынтæн хирургион æххуыс бакæныны фæдыл мæскуыйаг горæтон центры сæргъ, кæцы арæзт æрцыд горæт Мæскуыйы æнæниздзинад хъахъхъæныны департаменты бардзырдæй.
1979 азы каст фæцис Цæгат Ирыстоны паддзахадон медицинон институт. 1993 азæй у Мæскуыйы карзæй хъыгдард рагъыстæгæй рынчынтæн æххуыс бакæныны фæдыл Мæскуыйы нейрохирургийы сæргълæууæг. Стажировкæтæ рацыд Францы, (Лилль), Швейцари (Базель), Австрийы (Инсбрук) хуыздæр клиникæты. Цалдæр азы дæргъы у Давосы (Швейцари) остеосинтезы Ассоциацийы ахуырадон курсыты хайадисæг. 2004 азы уæрæсейаг хайадисджытæй фыццаг ралæууыд ацы форумы рагъыстæджы хирургийы фæдыл лекциимæ. Дзукъаты Димитры арæх фæхонынц Европæ, Латинаг Америкæмæ. Операцитæ саразы куыд Уæрæсейы, афтæ Европæйы дæр, ауадзы сын мастер-кълæстæ.
Дзукъаты Димитр нæ рох кæны æмæ арæх æрцæуы йæ райгуырæн Цхинвалмæ. 1991 азы æрхъулагонд Цхинвалмæ æрласта медикаментты стыр парти. Æмбæлд уæззау цæфтимæ поездтæ, хæдтæхджытыл æмæ сæ ласта йæ клиникæмæ, схуыссын-иу сæ кодта æндæр клиникæты дæр Мæскуы æмæ Мæскуыйы цур. 2008 азы августы хæсты рæстæджы дæр уайтагъд фæдзырдта æмæ фехъусын кодта, зæгъгæ, цæттæ у цæфтæн баххуыс кæнынмæ йæ рынчындоны.
Нæ уацх.
