ДÆ ЦÆСТ АХÆСС ДУНЕЙЫЛ

Болгайраг лидеры визит

Болгарийы президент Румен Радев дыууæбонон кусæгон визитимæ уыд Уæрæсейы. Йæ визит баст уыд осмайнаг цагъайрады бынæй бæстæйы ссæрибар кæныныл 140 азы кæй сæххæст, уыимæ. 22-æм майы Сочийы йæ уæрæсейаг коллегæ Владимир Путинимæ фембæлды рæстæджы фехъусын кодта, зæгъгæ, мæ визиты нысан у нæ бæстæты ‘хсæн иууыл бæрзонддæр æмвæзадыл диалог сæндидзын кæнын, бирæ азты дæргъы уыцы диалог æруромыны фæстæ. Уый размæ та болгайраг лидер Мæскуыйы фембæлд УФ-йы Хицауады Сæрдар Дмитрий Медведевимæ. Банысан кæнын хъæуы уый дæр, æмæ Болгарийы лидеры ацы визит кæй уыд фыццаг, фæстаг дæс азы дæргъы. Румен Радев интервью радта уæрæсейаг дзыллон информацийы фæрæзтæн, цыран уый фехъусын кодта, зæгъгæ, фæнд кæны фæндон бахæссын Сау денджызыл Уæрæсейæ Болгаримæ комкоммæ газуадзæн саразыны тыххæй æмæ йæ «Болгарский поток» схонын.

Хæцы Гуырдзыстоны суверенитеты æвварс

АИШ-ы æддагполитикон ведомствойы сæргълæууæг Майк Помпео æрсидт Уæрæсемæ Абхаз æмæ Хуссар Ирыстонæй йе ‘фсæдты ракæныны тыххæй, афтæ ма «нæ» зæгъа сæ хæдбардзинад банымайынæй. АИШ-ы президент Дональд Трампы администраци хæцы Гуырдзыстоны суверенитет æмæ территориалон æнæхъæндзинад бахъахъхъæныны æвварс, афтæ ма фæнд кæны ацы бæстæимæ стратегион партнерондзинады ахастытæ сфидардæр кæнын. Уый тыххæй фехъусын кодта Гуырдзыстоны премьер-министр Георги Квирикашвилиимæ йæ фембæлды рæстæджы, кæцы америкæйаг столицæмæ æрцыд кусæгон визитимæ.

Фембæлд Индийы премьер-министримæ

УФ-йы Президент Владимир Путин Сочийы йæхимæ райста Индийы премьер-министр Нарендру Модийы. Уæрæсейы лидер банысан кодта дыууæ бæстæйы ‘хсæн партнерондзинады бæрзонд стратегион æмвæзад. «Уæрæсейаг-индиаг ахастыты нæ хъæуы цахæмдæр хицæн уавæры равдисын, уымæн æмæ сын ис арф уидæгтæ. Мах активонæй кусæм æддагполитикон фадыджы. Уыцы нымæцы дунеон къорд организацийы, уыдоны ‘хсæн сты ИНО, БРИКС æмæ ныр та Шанхайаг организацийы æмгуыстад. Махæн ис æнгом контакт, не ‘фсæддон министрадты ‘хсæн ис хорз æмахастытæ. Æмæ æппæт уыдæттæ та дзурæг сты нæ архайды тынг бæрзонд стратегион æмвæзадыл», – загъта Владимир Путин. «Уæрæсе у Индийы рагон хæлар, æмæ ды та дæ мæ сæрмагонд хæлар æмæ нæ бæстæйы хæлар. Мах сымахимæ хъуамæ сæрыстыр уæм уымæй, æмæ уæрæсейаг-индийаг ахастытæ кæй систы уæлдай стратегион партнерондзинад. Уый стыр æнтыст у», – загъта Моди. Дыууæ лидеры ма дзырдтой дунеон ахсджиагдæр проблемæты аскъуыддзаг кæныны фæдыл иумиаг куысты тыххæй.

 

Бартхъирæн сæм

 кодта санкцитæй

АИШ-ы паддзахадон секретарь Майкл Помпео фехъусын кодта, зæгъгæ, АИШ-ы администраци Иранмæ ахасты бакæндзæн иууыл серьезондæр санкцитæ. Уый загъта, зæгъгæ, Вашингтон сифтонг кæндзæн ахæм уавæртæ, кæцыты рæстæджы Тегеранæн никуы уыдзæн йæхи ядерон хæцæнгарз. Уыимæ Помпео фехъусын кодта, зæгъгæ, Иугонд Штаттæ цæттæ сты æппæт санкцитæ аивынмæ, Иранимæ базарадон æмæ дипломатон ахастытæ сæндидзын кæнынмæ, кæд æмæ Тегеран сæххæст кæна Вашнгтоны къорд домæны, уæд. АИШ-ы домæнты ‘хсæн ис ирайнаг объекттæм МАГАТЭ-йы экспертты бауадзын.

Арфæ ракодта Мадуройæн

УФ-йы Президент Владимир Путин арфæйы тел арвыста Николас Мадуромæ, Венесуэлæйы президентон æвзæрстыты кæй фæуæлахиз, уый сæраппонд. Уæрæсейаг лидеры Мадуройæн бафæндыд фидар æнæниздзинад æмæ социалон-экономикон хæстæ аскъуыддзаг кæныны æнтыстытæ. Афтæ ма Путин банысан кодта, зæгъгæ, йæ ныфс ис УФ æмæ Венесуэлæйы ‘хсæн стратегион партнерондзинады ахастыты дарддæры рæзтæй.

Раивдзæн губернаторты

Сомихстоны премьер-министр Никол Пашинян фехъусын кодта бæстæйы æппæт губернаторты раивыны тыххæй. Афтæ ма радзырдта, зæгъгæ, Сомихстоны ног хицауады сæйраг хæстæй иу у æмгъуыдæй раздæр парламентон æвзæрстытæ ауадзын. Уый тыххæй Пашинян уайтагъд фехъусын кодта республикæйы ног хицауады ард бахæрыны церемонийы фæстæ.

Раргом кодтой экстремистон къорды

Æдасдзинады федералон службæ Хъырымы раргом кодта экстремистон къорды, кæцыйы уæнгтæ 2018 азы январы мæйы бабырстой Хъырымы муфти Эмирали Абблаевы хæдзармæ. Спецслужбæйы куыд фехъусын кодтой, уымæ гæсгæ уыцы къорд разынд Украинæйы Уæлдæр Рада æмæ Æдасдзинады службæимæ баст. Экстремистон къорд арæзт æрцыд Уæлдæр Радайы депутат Мустафа Джемилевы æххуысгæнæг Эрола Велиевы бацамындмæ гæсгæ. Уæрæсейаг спецслужбæты зонæнтæм гæсгæ, къорд арæзт æрцыд Харьковы. Къорды нысан уыд Уæрæсейы æвварсхæцæг хъырымаг тæтæйрæгтыл атакæтæ аразын. Алкæцы саразгæ акцийы тыххæй сын ныфс бавæрдтой фæйнæ 500 доллары.

Ауагъта фыццаг рабадт

УФ-йы Хицауады Сæрдар Дмитри Медведев ауагъта фыццаг рабадт хицауады ног скондимæ. Хицауады ног сконды куысты стратегион приоритеттæй иу суыдзæн Президенты майы Барамындты сæххæст кæнын. 7-æм майы Владимир Путин йæ къух æрфыста документыл, кæцы сбæрæг кодта бæстæйы экономикон æмæ социалон стратеги бирæ азтæн. Сæйраг хæс у адæмы фæрныгады масштабон рæзт къухты бафтын кæнын. Премьер банысан кодта, зæгъгæ, куыст хъуамæ цæуа снысангонд æмгъуыдты. «Президенты Ныстуаны æмæ Барамынды цы нысæнттæ ис, уыдон сæххæст кæныны тыххæй бахъæудзæн бирæ кусын. Нæ иумиаг хæс у, адæмæн аккаг цард сифтонг кæнын. Уый та нысан кæны гъæдджын ахуырад æмæ гъæдджын æнæниздзинад хъахъхъæнын, паддзахадон æмæ муниципалон лæггæдтæ, социалон гарантитæ, æмæ, кæй зæгъын æй хъæуы, кусыны уавæртæ æмæ нормалон куыстмызд», – банысан кодта премьер.

Нæ райста журналистты номхыгъд

Кореяйы Адæмон Демократон Республикæ нæ райста Хуссар Кореяйы æурналистты номхыгъд, кæцытæ фæнд кодтой Пхунгерийы ядерон полигон сæхгæныны цермонимæ ацæуын. План цыд, зæгъгæ, журналисттæ райсдзысты визæтæ æмæ æмбæлон документтæ Китайы Цæгат Кореяйы минæварады, уымæн æмæ Цæгат æмæ Хуссар Кореяйы ‘хсæн нæй дипломатон ахастытæ. Ядерон полигон сæхгæныны церемони уыдзæн 23-25 майы, кæд хорз боныгъæдтæ уа, уæд.

Фæсыкк сын кодтой сæ план

Горловкайы цур размæ абырсынмæ бафæлварыны рæстæджы иу суткæмæ фæмард 20 украинаг хæстоны, – уый тыххæй хъусын кæны Донецкы Адæмон Республикæйы оперативон командæкæнынады командиры хæдивæг Эдуард Басурин. Йæ ныхæстæм гæсгæ, сæ къухты бафтыд Горловкамæ бацæуын æмæ стратегион бæрзæндты сæ позицитæ æрфидар кæныны фæдыл Киевы план фæсыкк кæнын. Басурин ма фехъусын кодта, зæгъгæ, бархионтæ скуынæг кодтой танк, БМП æмæ контрбатарейон тохы станц, кæцыйы руаджы украинаг хæстонтæ корректировкæ кодтой артиллерийы æхстытæ сабыр цæрджыты ‘рдæм.

Информацион агентадты хъусынгæнинæгтæм гæсгæ