ДÆ ЦÆСТ АХÆСС ДУНЕЙЫЛ

Ныхас кодтой телефоны

АИШ-ы президент Дональд Трамп телефоны фæдзырдта Уæрæсейы Президент Владимир Путинмæ æмæ йын раарфæ кодта бæстæйы президентон æвзæрстыты кæй фæуæлахиз, уый тыххæй. Дыууæ бæстæйы лидертæ æруынаффæ кодтой бирæнымæц ахсджиаг политикон фарстытыл: терроризмы ныхмæ тохы, хæцæнгæрзтæ уадзыныл арæнæвæрд скæныны тыххæй. Уымæй дарддæр ма Путин æмæ Трамп уынаффæ кодтой сирийаг кризис, Донбассы хæстон конфликт, Кореяйы æрдæгсакъадахы æндыгъддзинады деэскалацийы фарстытыл. Иумиагæй ныхасæн уыд конструктивон, хъуыддагон характер æмæ здæхт уыд уæрæсейаг-америкæйаг ахастыты æрæмбырдуæвæг проблемæтæ аскъуыддзаг кæнынмæ. Афтæ ма æруынаффæ кодтой уæлдæр æмвæзадыл фембæлд сорганизаци кæныны тыххæй дæр.

Раарфæ йын кодтой телефоны

Владимир Путин Уæрæсейы президентон æвзæрстыты кæй фæуæлахиз, уый тыххæй йæм телефоны фæдзырдтой æмæ йын раарфæ кодтой Азербайджаны президент Ильхам Алиев, Сомихстоны президент Серж Саргсян, Белорусийы президент Александр Лукашенко, Японы премьер-министр Синдзо Аэ, Туркы президент Реджеп Эрдоган, Индийы премьер-министр Нарендра Моди, Хуссар Ирыстоны президент Бибылты Анатоли æмæ бирæ æндæр паддзахадты сæргълæуджытæ.

Фембæлд йæ конкуренттимæ

Владимир Путин фембæлд йæ конкуренттимæ. Фембæлд ахаста дыууæ сахатæй фылдæр. Путин фæндон бахаста, цæмæй диалогы руаджы хынцыд æрцæуой æппæт позитивон моменттæ æмæ фидæны бæстæйы рæзты тыххæй æппæт тыхтæ дæр æрбаиу кæныны фæдыл. «Сæйраг у уый, цæмæй махæн фадат уа фидæны нæ тыхтæ æрбаиу кæнынæн нæ бæстæйы фæрныгады конструктивон куысты тыххæй», – загъта Путин.

                  Фæфылдæр сæ паддзахадон хæс

АИШ-ы национ хæсы бæрц историйы фыццаг хатт ахызт 21 триллион долларæй. 2018 азы 15-æм мартмæ АИШ-ы паддзахадон хæс у 21,031 триллион доллары. 2017 азы Дональд Трампы инаугурацийы рæстæджы АИШ-ы хæс уыд 19,947 триллион доллары. Афтæмæй иу азæй чысыл фылдæрмæ  йæ хæс фæфылдæр 1 триллион долларæй фылдæр. Ацы суммæйæ 5,674 триллион доллары сты АИШ-ы мидпаддзахадон хæстæ.

Æрцахстой Саркозийы

Францы экс-президент Николя Саркозийы æрцахста полици. Паддзахады раздæры сæргълæууæг урæд æрцыд 2007 азы йæ æвзæрстыты агъоммæйы кампанийы æнæзакъонон финанскæнынады тыххæй. Фæдагурæн органтæ æнхъæлынц, зæгъгæ, Саркози милуангай евротæ  райста ливийаг диктатор Муаммар Каддафийæ. Ливийаг æхцатимæ историйы тыххæй æхсæнад базыдта 2012 азы Каддафийы режим куы ныппырх, уый фæстæ. Францы президенты бынатмæ кандидаттæн закъонмæ гæсгæ бар нæй фæсарæйнаг паддзахадтæй финанстæ исынæн.

Евроцæдисы Советы рабадт

Солсберийы Скрипалы фæхъæстæ кæныны темæйыл уынаффæ кодтой Брюсселы Евроцæдисы Советы планон рабадты. Ацы фарст боны фæткмæ рахастæуыд рабадты кæрон Стырбританийы куырдиатмæ гæсгæ. Бритайнаг дипломатийы сæргълæууæг Борис Джонсон фехъусын кодта, зæгъгæ, уый æппæт тыхтæй дæр архайдзæн, цæмæй Евроцæдис максималонæй рахæца Лондоны æвварс. «Евроцæдис сиды Уæрæсемæ, цæмæй тагъдыл дзуапп радта Стырбритани æмæ дунеон æмæхæснадæн æмæ æрбавдиса æххæст информаци «Новичок»-ы программæйы тыххæй», – банысанчындæуыд рабадты райсгæ хъусынгæнинаджы. Фæлæ Евроцæдисы бæстæтæ сæ къухтæ не ‘рфыстой Мæскуыйы адресыл аххосты фæдыл. Уайы афтæ æмæ уыдон Стырбританийы ахасты равдыстой хуымæтæджы европæйаг æмзæрдæдзинад.

Æрæздæхтысты Уæрæсемæ

Экс-булкъон Сергей Скрипалы хъуыддаджы фæдыл Стырбританийæ æрвыст æрцыдысты 23 уæрæсейаг дипломаты. Дипломаттæ æмæ сæ бинонты уæнгтæ, æдæппæтæй 80 адæймаджы бæрц, 20-æм марты æртахтысты Мæскуымæ.

Токиойы дыууæ министры фембæлд

УФ-йы Фæсарæйнаг хъуыддæгты министр Сергей Лавров Токиойы фембæд йæ япойнаг коллегæ Таро Коноимæ. Лавровы ныхæстæм гæсгæ фембæлды рæстæджы цы темæтыл уынаффæ кодтой, уыдонæй иу уыд æнæвизæйон режим бакæнын, фыццаг рады Сахалин æмæ Хуссар Курилты раздæры цæрджытæ æмæ сæ сывæллæттæн. Уымæй дарддæр ма Лавров банысан кодта, футболæй уæрæсейаг æмæ япойнаг æмбырдгæндтæ кæй фембæлдзысты Уæрæсейы уагъдцæуæг футболæй дунеон чемпионаты. Афтæ ма япойнаг парламентаритæ майы мæйы æрцæудзысты Уæрæсемæ. План цæуы Владимир Путин æмя Японы премьер-министр Синдзо Абэйы фембæлд дæр.

80 мин адæймаджы

Скæсæйнаг Гутайæ фондз бонмæ ракодтой 80 мин адæймаджы. УФ-йы Хъахъхъæнынады министр Сергей Шойгуйы ныхæстæм гæсгæ, фæрсты фидыдады центры афицертæ цыбыр æмгъуыдмæ æмæ стыр гуырахсты ифтонг кæнынц лигъдæтты æппæт æнæмæнгхъæуæг гуманитарон æххуысæй террористы провокацитæм нæ кæсгæйæ. «Гæнæн ис æмæ боевиктæ спайда кæной хъæстæгæнæн буарадтæй, цæмæй сирийаг æфсæдты фæаххосджын кæной химион хæцæнгарзæй спайда кæныны», – банысан кодта министр. Террористтæ ракетæтæй æхстой Дамаск. Æхстыты фæстиуæгæн фæмард сты 35 адæймаджы, дæсгай цæрджытæ фæцæфтæ сты.

Гриппы ног уылæн

Уæрæсейы банысанчындæуыд гриппы ног уылæн. Уыцыиу рæстæджы цалдæр регионы æхгæд æрцыдысты скъолатæ æмæ сабидæттæ, куыд зæгъæм, Санкт-Петербуджы, Саратовы, Тверы областты, Карелийы æмæ Республикæ Комийы. Вазыгджын уавæр ис Тулайы областы дæр. Дохтыртæ фæдзæхсынц гриппы симптомтæ фæхатгæйæ, æвæстиатæй дохтырмæ бацæуын кæй хъæуы, уый тыххæй.

Информацион агентадты хъусынгæнинæгтæм гæсгæ