Дӕ цӕст ахӕсс дунейыл

АУАГЪТА ÆМБЫРД

УФ-йы Президент Владимир Путин Сочийы æмбырд ауагъта хъахъхъæнынады министрады æмæ хъахъхъæнынадон-сæудæджерадон куыстуæтты къухдариуæггæнджытимæ. Путин банысан кодта, зæгъгæ, фидар æрцыд 2030 азы онг УФ-йы     уæлдæфон-космикон хъахъхъæнынады рæзты концепци. «Стратегион ядерон тыхты нырыккон хæцæнгæрзты æмвæзад схызт 82 проценты онг. Уыимæ хынцын хъæуы дунейы æфсæддон-политикон уавæры ивындзинæдтæ, кæцытæ негативонæй æндавынц регионалон æмæ глобалон æдасдзинадыл, сæрмагондæй, астæуккаг æмæ къаддæр дæрддзæджы ракетæтæ сликвидаци кæныны тыххæй Бадзырдæй АИШ-ы рахызт, афтæ ма къорд æндæр факторы дæр. Æппæт уыдæттæ махæй домынц хæцæнгæрзты перспективон системæты рæзт. Ахæм хæцæнгæрзтæ махæн ныридæгæн абон фадат дæттынц тыхты стратегион баланс ифтонг кæнынæн», – банысан кодта Путин.

ЛАВРОВ ÆМÆ ПОМПЕОЙЫ ФЕМБÆЛД

УФ-йы Фæсарæйнаг хъуыддæгты министр Сергей Лавров фембæлд АИШ-ы паддзахадон секретарь Майк Помпеоимæ. Уыдон æруынаффæ кодтой стратегион стабилондзинад æмæ хæцæнгæрзтыл контроль кæныны фарстытыл. Дипломаттæ ма æруынаффæ кодтой дунеон проблемæты уæрæх спектрыл. Иуæй-иу позициты фæдыл Уæрæсе æмæ АИШ-ы цæстæнгас у æввахс, фæлæ æндæр позициты фæдыл иугъуызон цæстæнгас нæй, куыд, зæгъæм, Венесуэлæйы кризис аскъуыддзаг кæныны. Иугъуызон цæстæнгас сын ис Афганистан æмæ Сирийы терроризм скуынæг кæныны, афтæ ма Кореяйы æрдæгсакъадахы денуклеаризацийы проблемæ æрбæстон кæныны.

НЫХАС КОДТОЙ ТЕЛЕФОНЫ

Туркаг фарсы инициативæмæ гæсгæ УФ-йы Президент Владимир Путин телефоны ныхас кодта Турчы президент Реджеп Тайип Эрдоганимæ. Уыдон æруынаффæ кодтой Сирийы кризисон уавæры сæйрагдæр аспекттыл, сæрмагондæй, Идлибы деэскалацийы зонæйы уавæрыл, цыран радикалон террористон къордтæ халынц æхстытæ æруромыны режим. Афтæ ма дыууæ лидеры уынаффæ кодтой бæстæты ‘хсæн æмахастыты, уыцы нымæцы базарадон-экономикон фадыджы тыххæй дæр. Уыдон ма æрныхас кодтой æндæр регионалон æмæ дунеон проблемæтыл дæр.

РАЙДЫДТА ЕВРОПАРЛАМЕНТМÆ ÆВЗÆРСТЫТЫ КАМПАНИ

13-æм майы Францы райдыдта Европарламентмæ æвзæрстыты фæдыл кампани, цыран хайад исынц 34 партийы, кæцы  рекордон у республикæйæн. Фæстаг æрфарстытæ куыд фенын кодтой, уымæ гæсгæ æвзæрстыты уæлахизы сæйраг претенденттæ сты президентон парти «Республика на марше» æмæ Марин Ле Пены парти «Национальное объединение». Европарламентмæ æвзæрстытæ уагъд æрцæудзысты ацы аз 23-26 майы, кæцыты хайад райсдзысты европæйаг партитæ, национ партитæ æмæ хæдбар кандидаттæ. Æвзæрстыты фæстиуджытæм гæсгæ æвзæрст æрцæудзысты 751 депутаты.

СНОГ КÆНДЗÆН ФÆДÆВЗАРÆН ПРОЦЕСС

Швецийы прокуратурæ сног кæндзæн 2010 азы тыхми бакæныны тыххæй уголовон хъуыддаджы фæдыл Джулиан Ассанжы ныхмæ фæдæвзарæн процесс. Иугонд Штаттæ план кæнынц 2019 азы 14-æм июнмæ официалонæй австралиаг журналисты экстрадицийы тыххæй æрдомын. Швецийы прокуратурæ гæнæн ис Ассанжæн видеобастдзинадæй æрфарст ауадза Стырбританийы территорийыл.

БАКÆНДЗÆН ФИДДОНТÆ

1-æм июнæй Китай бакæндзæн дзуаппон фиддонтæ Иугонд Штатты товартæм ахасты, кæцытæн сæ иумиаг аргъ уыдзæн 60 миллиард доллары, ома, фиддонтæ фæфылдæр уыдзысты 10 процентæй 25 проценты онг. Китайы Паддзахадон советы таможнæйон тарифты фæдыл комитеты хъусынгæнинаджы дзырдæуы, зæгъгæ, фиддонтæ фæфылдæр уыдзысты 2493 хуызы товартæм ахасты. Уый размæ Дональд Трамп бафæдзæхста Пекины, зæгъгæ, Китайы дзуаппон къахдзæфтæ уыдзысты тæссаг, уымæн æмæ, зæгъ, сæхицæн уыдзысты æрмæстдæр æв-зæрдæр.

САНКЦИТÆ «СЕВЕРНЫЙ ПОТОК-2»-йы НЫХМÆ

АИШ-ы сенатортæ бацæттæ кодтой закъоны проект, кæцыйы хынцыд цæуынц санкцитæ проект «Северный поток-2»-йы хайадисæг компанитæм ахасты. Фыццаг рады санкцитæ бахъыгдардзысты науты уæйгæнджыты, кæцытæй пайда кæнынц хæтæлтæ æвæрыны рæстæджы уæрæсейаг газы экспорты тыххæй. Афтæ ма уыдон фæнд кæнынц санкцитæ «Турецкий поток»-ы ныхмæ дæр бакæнын. Сенатортæ фæндон хæссынц, зæгъгæ, газ-уадзæнты маршруттæ саразыны тыххæй сын денджызон наутæ чи уæй кæны кæнæ арендæйы дæтты, уыдонæн АИШ-мæ бацæуыны бар нал уыдзæн. Афтæ ма санкцитæ баконд æрцæудзысты уыцы адæймæгты æмæ компанитæм ахасты, кæцытæ газуадзæнты арæзтадæн кæнынц финансон кæнæ техникон æххуыс.

АРВИТДЗЫСТЫ ÆФСÆДДОН СЛУЖБÆГÆНДЖЫТЫ

Иугонд Штаттæ гæнæн ис æмæ Æввахс Хурскæсæнмæ арвитой 120 мин æфсæддон службæгæнæджы. Ахæм архайдтытæ Пентагон райсдзæн, кæд æмæ Иран æрбабырса регионы америкæйаг тыхтæм кæнæ йæ куыст фæтыхджындæр кæна ядерон хæцæнгарз аразыныл, уæд. Ног хæстон планы хынцыд нæ цæуы сурзæххон операци ауадзын, уымæн æмæ уый тыххæй хъæуы ноджы фылдæр æфсæддонтæ. Ног планы фарсхæцджытæй иу у национ æдасдзинады фæдыл Трампы уынаффæгæнæг Джон Болтон. Уый размæ Пентагон фæаххосджын кодта Ираны, Æввахс Хурскæсæны америкæйаг æфсæддон службæгæнджыты сатакæ кæнынмæ сæхи кæй цæттæ кæнынц, уымæй.

НÆ СЫН УАДЗЫНЦ ХИСÆРМАГОНД ХÆЦÆНГАРЗ БАКУСЫН

АИШ бар нæ дæтты Европæйæн хисæрмагонд хæцæнгарз саразынæн. Вашингтон бафæдзæхста Брюсселы экономикон æмæ политикон фæстиуджытæй, кæд æмæ уый дарддæр дæр куса хисæрмагонд хъахъхъæнынадон проекттæ бакусыныл, уæд. Ахæм фыстæг Европæйаг дипломатийы сæргълæууæг Федерика Могеринимæ арвыста АИШ-ы паддзахадон секретары хæдивæг Эллен Лорд.

ФÆФЫЛДÆР КÆНДЗÆН ГАЗЫ АРГЪ

 Украинæйы национ акционерон компани «Нафтогаз» ас-къуыддзаг кодта 1-æм июнæй бæстæйы цæрджытæн газы аргъ ногæй фæфылдæр кæныны тыххæй. «Нафтогаз» бацæттæ кодта æмæ газдихгæнæн компанитæм арвыста проект, кæцымæ гæсгæ газы аргъ фæфылдæр уыдзæн 4,6 проценты.

Информацион агентадты хъусынгæнинæгтæм гæсгæ