Дӕ цӕст ахӕсс дунейыл

УРÆД ÆРЦЫД

Мæскуыйаг тæрхондон æрцахста адвокатты коллегийы сæрдар Сергей Юрьевы «Уæлдæфон змæлд организацийы фæдыл паддзахадон корпораци»-йæ иу миллиард сомы кæй адавдта, уый тыххæй. Фæдагуырды бæрæггæнæнтæм гæсгæ, 2008 азы Паддзахадон унитарон куыстуат «Государственная корпорация по организации воздушного движения» сарæзта контракт адвокатон коллегитæй сæ иуимæ юридикон лæггæдтæ сын бакæныны тыххæй. 2008 азæй 2018 азмæ адвокатон коллеги æнæбындурæй æхцайы фæрæзтæ райста иу миллиард сомæй фылдæр.

АДАВДÆУЫД 2 МИЛЛИАРД СОМЫ

УФ-йы Æдасдзинады нымæрдар Николай Патрушев куыд радзырдта, уымæ гæсгæ федералон нысанон программæ «Юг России» æмæ æндæр инфраструктурон проектты реализацийы рæстæджы  бюджетон фæрæзтæй адавдæуыд 2 миллиард сомæй фылдæр. «Коррупци, бюджетон фæрæзтæ давын, организацигонд фыдракæнддзинад тæссаг сты национ æдасдзинадæн. Коррупцийы уæлдай æмвæзад нысан цæуы цæрæнуатон-коммуналон хæдзарад, æнæниздзинад хъахъхъæныны æмæ арæзтадон комплексы», – банысан кодта Патрушев Дагъыстаны цæугæ рабадты.

БАНЫХÆСТÆ

УФ-йы вице-премьер Юрий Борисов æмæ Сирийы президент Башар Асадæн уыд баныхæстæ Сирийы экономикæ сæндидзын кæныны уæрæсейаг æххуысы фарстыты фæдыл. Сирийаг лидер куыд банысан кодта, уымæ гæсгæ йæ ныфс ис ацы фадыджы дыууæварсон бадзырдтæ æххæст кæй æрцæудзысты, уымæй.

ФÆЗЫНДЗЫСТЫ КУСÆГОН БЫНÆТТÆ

Ялтайы уагъдæрцæуæг дунеон экономикон форумы куысты рæстæджы къухтæ фыст æрцыдысты 102 сразыдзинадыл, кæцытæн сæ иумиаг аргъ у 215 миллиард сомы бæрц. «Республикæ Хъырымы Министрты Совет къухтæ æрфыста 8 миллиард сомы аргъ конкретон сразыдзинæдтыл. Уый фæстиуæгæн æрдæгсакъадахы арæзт æрцæудзысты 1700 кусæгон бынаты», – загъта республикæйы сæргълæууæг Сергей Аксенов. Йæ ныхæстæм гæсгæ, сразыдзинæдтæ арæзт æрцыдысты алыгъуызон здæхтыты.

РАЗВÆЛГЪАУ ЗОНÆНТÆ

21-æм апрелы Украинæйы уагъд æрцыдысты президентон æвзæрстытæ. Развæлгъау зонæнтæм гæсгæ Владимир Зеленский райста æвзарджыты хъæлæсты 73,2 проценты æмæ Петр Порошенко та – 24,5 проценты. Владимир Зеленскийæн ныридæгæн арфæ кæнынц дунейы бæстæты лидертæ. Æвзонг политикмæ фæдзырдта АИШ-ы президент Дональд Трамп дæр, афтæ ма йын раарфæ кодтой Франц, Австри, Польшæ æмæ æндæр бæстæты лидертæ.

СТЫР АРГЪ СКОДТА ФЕМБÆЛДÆН

Эстонийы президент Керсти Кальюлайд стыр аргъ скодта Мæскуыйы Уæрæсейы Президент Владимир Путинимæ фембæлдæн. «Уый уыд тынг хорз фембæлд. Бирæ дзырдтам вазыгджын фарстыты тыххæй æмæ уæлдай зындæр минутты та кæрæдзийæн кад кодтам», – загъта Кальюлайд Мæскуыйы Эстонийы минæварады пресс-конференцийы. Уый ма фехъусын кодта, зæгъгæ, Путины фæхуыдта финаг-угораг адæмты дунеон конгрессмæ, кæцы уагъд æрцæудзæн 2020 азы июны мæйы эстойнаг Тартуйы. Уый банысан кодта, зæгъгæ, ма уыдон дзырдтой дыууæварсон ахастытыл, Украинæйы æмæ дунейы уавæрыл, санкциты, дывæр хъалонтæ аивыны тыххæй бадзырдыл, газуадзæн «Северный поток-2»-йы, электронон базары тыххæй.

«БУР ЖИЛЕТТЫ» РАДОН АКЦИ

Францы «бур жилетты» радон 23-æм акцийы хайад райстой 10 мин адæймаджы. Парижы протестгæнджыты нымæц уыд 6,7 мин адæймаджы. Францы столицæйы барадхъахъхъæнæг органты кусджытæ баурæдтой 200 адæймагæй фылдæр. Бæстæйы хицауады политикæйæ райгонд кæй не сты, уымæ гæсгæ акцийы хайадисджытæ рахизынц уынгтæм æппæт бæстæйы, Францы къухдариуæгад уавæр æрсабыр кæныны тыххæй мадзæлттæ кæй райста, уымæ нæкæсгæйæ. Протестгæнджытæ æмæ полицийы ‘хсæн уыд ныхмæлæудтытæ. Демонстранттæ басыгътой дæсгай машинæтæ.

 НЫХМÆЛÆУДТЫТÆ ПАНКИСЫ КОМЫ

21-æм апрелы Панкисы комы этникон цæцæйнæгтæ æрæмбырд сты Ахметайы районы хъæуы, цæмæй ма бауагътаиккой гидроэлектростанцы арæзтад райдайын. Барадхъахъхъæнæг органты кусджытимæ ныхмæлæудтыты рæстæджы хъыгдард баййæфтой 55 адæймаджы, уыдоны ‘хсæн сты 38 полициаджы æмæ 17 протестгæнæджы. Уыдонæй бирæтæ сты Телауы рынчындоны. Боны дæргъы полици цалдæр хатты спайда кодта цæссыгкалæн газ æмæ резинæйæ нæмгуытæй. Ныхмæлæудтыты фæстиуæгæн митинггæнджытæ басыгътой мидхъуыддæгты министрады машинæ, афтæ ма экскаватор дæр, кæцы куыста арæзтадон фæзуаты. Арæзтад урæд æрцыд.

ÆРБАЦЫД БАТУМЫ ПОРТМÆ

Иугонд Штатты эсминец æрбацыд Гуырдзыстоны Батумы портмæ. «Сау денджызы не ‘мцæдисонтæн дарддæр дæр ис сæйраг нысан Европæйы æдасдзинад бахъахъхъæныны хъуыддаджы», – загъта науы капитан Дейв Коулз. Куыд банысанчындæуыд, уымæ гæсгæ эсминецы ахæм визит æвдисы АИШ æмæ Гуырдзыстоны ‘хсæн æмгуыстад. Визиты фæлгæтты уыдзæн футболон матч донбылгæрон гуырдзиаг хъахъхъæнынады кусджытимæ, афтæ ма экипажы уæнгтæ баскетболæй ахъаздзысты Батумы денджызон академийы студенттимæ.

ТЕРАКТТÆ

21-æм апрелы Шри-Ланкайы уыцы иурæстæджы арæзт æрцыд аст теракты, кæцыйы фæстиуæгæн фæмард сты 290 адæймаджы, цæфтæ та фесты 500 адæймаджы.  Горæттæ Коччикаде, Негомбо æмæ Баттикалойы католикон аргъуанты æмæ бæстæйы столицæйы цалдæр отелы аст срæмыгъды саразыны тыххæй нырма бæрндзинад йæхимæ ничи райста. Фæмардуæвджыты ‘хсæн сты фæсарæйнаг бæстæты, уыцы нымæцы америкæйаг, бритайнаг æмæ голландиаг 35 æмбæстаджы. Шри-Ланкайы столицæйы æдасдзинады тыхты рейды рæстæджы урæд æрцыдысты 13 адæймаджы, кæцытæм зæрдæ фехсайдта теракттæ сорганизаци кæнынæй. Операцийы рæстæджы фæмард сты æртæ полициаджы.

ЗАГЪТА МÆСÆЛЛÆЙЫ НЫХÆСТÆ

УФ-йы Президент Владимир Путин мæсæллæйы ныхæстæ загъта Шри-Ланкайы президент Майтрипала Сирисенайæн терактты фæстиуæгæн бирæнымæц уды зиæнтты тыххæй.

БОЕВИКТЫ АТАКÆ

Афганистаны Кабулы боевиктæ сатакæ кодтой коммуникацион æмæ информацион технологиты министрадыл, кæцыйы фæстиуæгæн фæмард сты 10 адæймаджы, хъыгдард баййæфтой цалдæр адæймаджы. Атакæйы тыххæй йæхимæ бæндзинад райста «Пысылмон паддзахад»-ы террористон къорд.

Информацион агентадты хъусынгæнинæгтæм гæсгæ