Курортон горæт Кисловодскы рæхджы сæвæрдзысты кинохит «Чебурашка»-йы сæйраг хъайтары скульптурæ. Уый тыххæй фæндон бахаста горæты мэр Евгений Моисеев. Йæ ацы фæндон æмбарын кæны афтæ, зæгъгæ, æрæджы æгас дунейы чи спопулярон, уыцы кинойы фылдæр серитæ ист цыдысты Кисловодскы централон районы æмæ сæ фæнды сæнусон кæнын киноисæн рæстæг дæр æмæ Чебурашкайы дæр. Уымæй дарддæр ма ацы кино фæндаг бакодта æндæртæн дæр, Кисловодск кинотæ исынмæ цæттæ кæй у, фадæттæ æмæ дзы уавæртæ кæй ис, уый ныр бирæ режиссертæн фæцис хъуыдыйаг. Æмæ та, чизоны, ацы хæххон бæс-тæйы райгуыра диссаджы кино. Горæты сæргълæууæг ма банысан кодта, зæгъгæ, Кисловодскы алыварс алæмæттаг æрдз кæй ис æмæ йæ горæты историон архитектурæ хъахъхъæдгонд кæй æрцыд, уымæ гæсгæ цымыдисон историон кинотæ исынæн уаид тынг хорз бынат.
Уæдæ куыд рабæрæг, афтæмæй популярон артист Сергей Гармаш Генæйы фæлгондзы машинæйыл цыдис курортон горæты астæу, мингай апельсинтæ зæххыл кæм тылдысты, уыдон фæрсты. Ацы диссаджы кадртæ ист цыдысты Карл Марксы уынджы æмæ йæ ныр бынæттон адæм хъазынæн хонынц Чебурашкинская.
Бæрæг куыд у, афтæмæй кино «Чебурашка» фыццаг хатт прокаты рацыд ацы аз январы райдианы æмæ уæрæсейаг сце-нæмæкæсджытæн ссис иууыл уарзондæр æмæ популярондæр. Нымад цæуы куыд бинонты киноныв, афтæ æмæ ныридæгæн кассæты кæй æрæмбырд кодтой, уыцы суммæ хизы 6 миллиард сомæй фыл-дæрмæ. Афтæмæй «Чебурашка» уый фæстейæ фæуагъта, уый размæ рекордсментыл нымад чи уыдысты, уыцы «Аватар» æмæ «Холоп»-ы.
«Чебурашка»-йæн ахæм æнтыстджын фæстиуæг уыдзæн, уый æнхъæл ничи уыд æмæ ныр та режиссер Сарик Андреасян фæнд кæны нæ бæстæйы уарзондæр мультфильм «Простоквашино» рацаразын киномæ. Режиссерæн радтой бар, цæмæй «Дядя Федор, пес и кот» экранизаци æрцæуа.
Горæты арæзтадон советы уынаффæ-мæ гæсгæ Курортон бульвары, съемкæтæ кæм цыдысты, уыцы фенддаг бынаты хъуамæ сæвæрой Чебурашкайы скульптурæ. Кисловодскы разамынад æмæ цæрджытæ дæр сæрыстыр сты сæ уарзон горæт ахæм диссаджы кинойæн кæй ссис киноисæн фæзуат. Фæлæ ныртæккæ интернет æмæ социалон хызæгты дуг кæй у, адæмæй бирæтæ бындзæй дæр пыл куыд ацаразынц, афтæ ацы ног хабар фехъусгæйæ дæр, сæ æнæсæрфат ныхæстæй критикæ кæнын райдыдтой скульптурæ сæвæрыны хъуыддаг. Рæсугъддзинад саразынæй чи тæрсы æмæ йæ ныхмæ чи цæуы, уыдон нæ хъуыды кæнынц ацы историон цауыл, сомбон ацы цыртдзæвæн феныны тыххæй сæ горæтмæ фылдæр туристтæ кæй æрцæудзæн æмæ сын пайда кæй æрхæсдзæн, уымæн æппындæр ницы нысаниуæг дæттынц. Нырмæ дæр Кисловодскы цы бирæ скульптурæтæ æмæ цыртдзæвæнтæ уыдис, уыдон курортон горæтæн дæттынц йæхи стиль æмæ рæсугъддзинад. Кавказы курорттæй иууыл активонæй дæр адæм Кисловодскмæ улæфынмæ кæй æрцæуынц, уый бæрæг у, стæй канд уалдзæгæй фæззæгмæ нæ, фæлæ ма туристтæ се нæниздзинад сфидар кæныны тыххæй равзарынц зымæгон хæххон Кисловодск.
ЦХУЫРБАТЫ Ларисæ
Comments are closed, but trackbacks and pingbacks are open.