Бибылты Анатоли: «Цæгат Кавказы хæххон-металлургион институты рауагъдонты ‘хсæн ис бирæ зындгонд адæймæгтæ»

РХИ-йы Президент Бибылты Анатоли хайад райста Цæгат Кавказы хæххон-металлургион институты бонты сæраппонд цытджын мадзалы, кæцы уагъд æрцыд горæт Цхинвалы кино-концертон зал «Чермен»-ы.

Уый раарфæ кодта æрæмбырдуæвджытæн æмæ баны-сан кодта, зæгъгæ, ацы традици æхсызгон у скъолаты рауагъдонтæ, ныййарджытæ æмæ республикæйы разамынадæн.

«Алы сывæллон дæр хъуамæ йæ фидæны професси равзара йæхæдæг æмæ мæ тынг фæнды, цæмæй уæ алчи дæр æууæнда йæ сомбоныл», – загъта Президент æмæ залы уæвджытæн, уæлдайдæр та рауагъдонтæн йæ цæст бауарзта, цæмæй сæ фæндтæ æххæст кæной. Банысан кодта, Цæгат Кавказы хæххон-металлургион институты рауагъдонтæй кæй ис бирæ зындгонд адæймæгтæ, кæцыты нымæцмæ, гæнæн ис, бахауат сымах дæр.

Паддзахады сæргълæууæг ма рауагъдонтæм бахатыд, цæмæй равзарой, Хуссар Ирыстонæн хъæуæг цы професситæ сты, ахæмтæ.

Дарддæр раныхас кодта республикæйы Ахуырад æмæ зонады министр Гасситы Натали.

Уый банысан кодта, зæгъгæ, нæ сывæллæттæй Цæгат Кавказы хæххон-металлургион институт чи фæвæййы, уыдон Хуссар Ирыстоны вæййынц хъæуæг. «Махæн æхсызгон у ахæм информаци фехъусын, зæгъгæ, хуссарирыстойнаг скъолаты рауагъдонтæ аккагæй æвдисынц нæ ахуырады системæ», – загъта уый æмæ бакаст уæлдæр ахуырадон уагдоны адресыл арфæйы фыстæг, бирæ азты дæргъы Республикæ Хуссар Ирыстонæн бæрзонд квалификациджын кадртæ кæй цæттæ кæнынц, уый тыххæй.

Ахуырадон уагдоны ректор Юри Дмитрак, æрæмбырдуæвджытæн раарфæ кæнгæйæ, радзырдта йæ куысты æмæ уагдоны историйы тыххæй.

«Махыл цæуы 87 азы æмæ уый та дзурæг у цæттæдзинадыл, традицитыл, зонадон скъола кæй стæм, ууыл  æмæ бирæ æндæр цæуылдæрты. Цæгат Кавказы хæххон-металлургион институт у бæстæйы иууыл егъаудæр хæххон-металлургион уæлдæр ахуыргæнæндон», – загъта уый.

Юри Дмитракы ныхæстæм гæсгæ уæлдæр ахуыргæнæндоны ис дæсныйæдты æнæхъæн блок.

«Цæттæдзинады здæхты фæдыл уæ фæндæттæ сæххæст кæндзыстæм. Махмæ ис дыууæ тыхджын II – факультеты. Уагдоны ис бирæнацион коллектив. Сымах стут уыдонæй, кæцытæ райсдзысты уæлдæр ахуырад æнæаргъæй», – банысан кодта, уый.

Уымæй дарддæр ма Уæрæсейы Федерацийы Хъахъхъæнынады министрад райста уынаффæ Цæгат Кавказы хæххон-металлургион институты æфсæддон кафедрæ бакæныны тыххæй», – йæ ныхасмæ бафтыдта ректор.

Уый фæстæ уыд хорзæхтæ дæттыны церемони. Цæгат Кавказы хæххон-металлургион институты Республикæ Хуссар Ирыстоны аккагæй кæй æвдисы, уый тыххæй уæлдæр ахуырадон уагдоны Кады грамотæ-йæ хорзæхджын æрцыд архитектурон-арæзтадон факультеты студент Чилæхсаты Сослан.

Дипломтæ æмæ зæрдылдарæн призтæй та хорзæхджын æрцыдысты æппæтуæрæсейон бирæпрофилон олимпиадæ «Звезда»-йы уæлахиздзаутæ æмæ призертæ, цыран хайад райстой Цæгат æмæ Хуссар Ирыстоны 2000 ахуырдзауы бæрц.