Тахынæгтæ æмæ деликатесты æрдæгфабрикаттæ уадзæг куыстуат «Растдон»-æн бындур æвæрд æрцыд 2015 азы. Арæзт фæцис 2017 азы æмæ уадзын райдыдта продукци. Бынæттон фермертæн фадат дæтта, цæмæй сæ фос фыдызгъæлæн афæдзы алы афон дæр реализацимæ дæттой заводмæ. Завод ифтонг уыд Уæрæсейы æмæ Европæйы уагъд нырыккон ифтонггæрзтæй. Æвæрд дзы æрцыдысты универсалон продукциуадзæн хæххытæ, кæцытыл рауадзæн уыд дзидзайы гъæдджын продукци куыд стуры, афтæ хуыйы æмæ фысы дзидзайæ дæр. Технологион процессы хъахъхъæд цыдысты æнæмæнгхъæуæг нырыккон процедурæтæ. Æргæвдыны фæстæ дзидза æвæрд цыд уазалгæнæнты. Куыстуат ифтонг уыд ветеринартæй дæр, æвæрд дзы æрцыд æппæтхъæуæг лабораторион ифтонггæрзтæ.
«Растдон» арæзт æрцыд микрорайон «Хурзæрин»-мæ хæстæг хæрзвадат бынаты. Йæ саразæг компани Евродон»-ы уæды генералон директор Уанеты Вадимæн ацы проект слæууыд 163 милуан сомы. Уыдонæй 16 милуан сомы уыдысты йæхи æхцатæ, иннæ 137 милуан сомы та райста кредит уæрæсейаг ООО «Инвестицион агентад»-æй. Уымæй уæлдай ма РХИ-йы хицауадæй дæр проект реализацийы тыххæй дæр æрцыд æххуыс 28 милуан сомæй.
Дзидзайы куыст кæнын æгас дунейы дæр у æфтиагджын, перспективон. Бынæттон амалиуæггæнджытæн дæр ацы куыстуат разæнгардгæнæн хос уыд – фылдæр кодтой сæ фос. Уымæн æмæ Хуссар Ирыстоны нæ уыд дзидзагуыстгæнæн завод. Райгонд уыд фæлхасгæнæг дæр, æлхæдта гарантигонд гъæдджын продукци. Æцæг куыстуат æрмæст бынæттон хомысæй нæ пайда кодта, фæлæ ма, æндæр регионтæй кæй ластой, ахæм фыдызгъæлæй дæр. Цы продукци уагъта, уый реализаци кодта куыд Хуссар Ирыстоны продуктуæйгæнæн магазинты, афтæ Уæрæсейы дæр. Куыста дзы 40 адæймаджы бæрц. Уыдон иууылдæр цæттæдзинад райстой «Евродон»-ы куыстуаты.
О, фæлæ 2020 азы августы мæйы ирон бизнесмен, Уæрæсейы егъау агросæудæджерадон холдинг «Евродон»-ы бындурæвæрæг фехъусын кодта тæрхондонæн, цæмæй йæ банымайой банкротыл. Амалиуæггæнæгæн йæ хæстæ ахызтысты 500 милуан сомæй. Бизнесмен уый адыл йæ куыст æрурæдта канд «Евродон»-ы нæ, фæлæ ма нæ республикæйы дæр.
Экономикон райрæзты министрады нын куыд бамбарын кодтой, афтæмæй Ростовы областы Арбитражон тæрхондон Уанеты Вадимы банымадтой банкротыл, йæ сæрмагонд исады та йын æрцахстой. Уымæ гæсгæ бизнесменæн нал ис кусыны бар. «Растдон»-ы цы продукци уагъта марка «нæртон»-ы бын, уырдæм Уæрæсейæ цы фыдызгъæл ласта, таможнæйы сæрты хизгæйæ, уым дæр фæзынд зындзинæдтæ. Бынæттон фыдызгъæл, куыстуат уыйбæрц нæ иста, цæмæй йæ бон уа æрмæстдæр уыцы продукцийæ кусын. Нæй специалисттæ, кæцытæн сæ бон уа фыдызгъæлæн микробактериалон æмæ химикон иртастытæ саразын. Æппæт ацы аххосæгтæм гæсгæ абон нæ кусы куыстуат «Растдон». Фылдæр акцитæ сты ООО «ТДА Тульский»-ы къухы. Уымæн æмæ уый Уæрæсейы ООО «Инвестицион агентад»-ы раз бафыста «Растдон»-ы хæстæ.
Экономикон райрæзты министрады ма зæгъынц, куыддæр Ростовы областы Арбитражон тæрхондон йæ куыст кæронмæ фæуа Уанеты Вадимы хъуыддаджы тыххæй, афтæ райдайдзæн исад уæй кæныны процедурæ. Уæд бар уыдзæн объект уæйкæнынæн дæр. Аукционы хайад райсыны бар уыдзæн РХИ-йы æмæ УФ-йы æмбæстæгтæн.
Ныртæккæ куыстуат «Растдон»-ы фылдæр акцитæ сты ООО «ТДА Тульский» къухы. Уымæн æмæ уый Уæрæсейы ООО «Инвестицион агентад»-ы раз бафыста йæ хæстæ 2021 азы æмæ бартæ сфидар кодта йæхиуыл. Экономикон райрæзты министрад архайы, цæмæй ООО «ТДА Тульский»-йæ райса, заводы арæзтады рæстæджы инфраструктурæйæн цы æхцайы фæрæзтæ бахардз кодта, уыдон. Стæй ма архайы, цæмæй ацы дзидзагуыстгæнæн куыстуаты хицау суа бынæттон амалиуæггæнджытæй исчи.
УАЗÆГТЫ Марфæ
