Фæстаг дзæнгæрæг уӕлдай цины бӕрӕгбон свӕййы рауагъдонтӕн, уыдон хӕрзбон фӕзӕгъынц сӕ ахуыры азтӕн, сӕ иузӕрдион ӕмӕ ӕнувыд хъомылгӕнджытӕ – ахуыргӕнджытӕн ӕмӕ ӕрлӕууынц царды ног, уӕрӕхдӕр фӕндагыл. Семӕ фӕцин кӕнынц, уал азы дӕргъы сӕ зонындзинӕдтӕй чи хотыхджын кодта, раст фӕндагыл сӕ чи ӕфтыдта, уыцы ахуыргӕнджытӕ дӕр. Уыимӕ иумӕ сӕ иутӕ дӕр ӕмӕ иннӕтӕ дӕр февдисынц ӕнкъард цӕстӕнгас, уымӕн ӕмӕ хæрзбон фæзæгъынц кæрæдзийæн.
Скъолайы фӕстаг дзӕнгӕрӕджы зӕлтӕ айзӕлыдысты Цхинвалы районы Къостайы-хъӕуы астӕуккаг скъолайы дӕр. Бӕрӕгбонвӕлыст уыд скъола, хъуыстысты музыкӕйы зӕрдӕагайӕг зӕлтӕ, арфӕтӕ ӕмӕ хъӕлдзӕг ныхӕстӕ. Скъолайы рауагъдонтæн арфӕтӕ кӕнынмӕ ӕрбацыдысты се ‘мбӕлттӕ, ныййарджытӕ, уазджытӕ ӕмӕ ахуыргӕнджытӕ. Кӕй зӕгъын ӕй хъӕуы, алы скъоладзау дӕр фӕтырны, цӕмӕй ахуыры ӕмӕ уагахастæй дæр уа цӕвиттойнаг, ахуыры фӕстӕ ӕрлӕууа ног царды фӕндагыл.
Уӕлдӕр ахуыргӕнӕндон, кӕнӕ сабыр арвы бын зӕрдӕйы фӕндиаг фӕллой кӕнын – уыцы фӕндиӕгтӕ рауагъдонтӕн сӕ цӕст бауарзтой Цхинвалы районы администрацийы сӕргълӕууӕг Бибылты Валери, скъолайы директор Тыбылты Алекси, ахуыры хайы сӕргълӕууӕг Мӕргъиты Нелли, сӕ къласгӕс Тедеты Таирӕйӕн. Арфӕйы ныхӕстӕй ма сӕ бабуц кодтой 5-ӕм ӕмӕ 6-ӕм кълӕсты ахуыргӕнинӕгтӕ дӕр. Хъарм, бузныджы ныхӕстæ хъуыстысты рауагъдонтæн сæхицæй дæр сӕ зондамонджыты номыл.
Рауагъдонты бӕрӕгбон ноджыдӕр бахъӕлдзӕг, сӕ кӕстӕр ӕмбӕлттӕ сын кафт ӕмӕ зардӕй цы номыртӕ сӕххӕст кодтой, уыдонӕй. Зӕрдӕскъӕф уыдысты кӕфтытӕ «Ӕнӕнкъуысгӕ кафт» «Кӕсгон кафт», зарӕг «Куда уходит детство» ӕмӕ ӕндӕртӕ. Сӕхи рады фыццагкъласонтӕ дӕр бузныг загътой ахуыргӕнджытӕ- хъомылгӕнджытӕн сӕ аудындзинады тыххӕй. Уый фӕстӕ рауагъдонтӕн фӕстаг дзӕнгӕрӕг ныццагъта фыццагкъласон Мӕлдзыгаты Аделинӕ – уый та у царды рӕсугъд фидӕнмӕ хонӕг ӕмӕ йыл цӕуӕд ӕнтысгӕйӕ.
Хуыбиаты Никъала
Comments are closed, but trackbacks and pingbacks are open.