Ӕвзонг техникты станцы радиотехникӕйы ахуыргӕнӕг Плиты Иналы ном бирæтæ зонынц нæ горæты. Уый ацы дӕсныйад йӕ чысылӕй фӕстӕмӕ бауарзта ӕмӕ скъоламӕ цӕуынхъом куы фӕци, уӕд уыцы иурӕстӕджы ацы станцы дӕр райдыдта ахуыр кӕнын. Йӕ ахуыргӕнӕг уыд Понарин Леонид, зӕрдиагӕй йын хъуыста ӕмӕ ӕххӕст кодта радиотехникӕйӕ йӕ амындтытӕ. Астӕуккаг ахуырад райсыны фӕстӕ йӕ ахуыр адарддӕр кодта Хуссар Ирыстоны паддзахадон пединституты физикон-математикон факультеты. Цӕвиттойнаг ӕмӕ ахуырмӕ ӕвзыгъд студент уӕлдӕр ахуыргӕнӕндон каст фӕци ӕнтысгӕйӕ ӕмӕ кусын райдыдта Дзауы астӕуккаг скъолайы математикӕйы ахуыргӕнӕгӕй. Фӕлӕ уӕддӕр Плийы фырты йæхимæ тынгдæр æлвæста радиотехникӕ ӕмӕ уыцы нысанӕн йӕ педагогон архайд райдыдта, хӕрзӕвзонгӕй йын радиотехникӕйы сусӕгдзинӕдтӕ кӕм амыдтой, уыцы ахуыргӕнӕн уагдоны. Райдианы ӕххӕст кодта методисты хӕстӕ, уыимӕ иумӕ 8 азы бакуыста директоры хӕдивӕгӕй ӕмӕ 6 азы та уыд йæ директор. Фӕлӕ зӕгъын хъӕуы, бӕрнон бынӕтты кусгӕйӕ дӕр йӕ зӕрдӕ никуы сивта радиотехникӕйы дӕсныйадыл. Иурӕстӕджы сывӕллӕттӕн амыдта спортивон пеленгаци дӕр. Радиотехникӕйы кружокы йӕм уыд дыууӕ къорды, алы къорды дӕр фӕйнӕ 10 сывæллоны ӕмӕ сын нӕ хӕлӕг кодта йӕ зонындзинӕдтӕ. Сывӕллӕттӕ та сӕхи рады ӕвдыстой се ‘взыгъддзинӕдтӕ, уарзтой ӕмӕ цайдагъ кодтой техникӕйы куыст ӕмӕ архайдимӕ.
Фӕлӕ техникӕ иу ран нӕ лӕууы, ӕдзухдӕр размӕ цырд темптӕй къахдзӕф кӕны ӕмӕ уымӕ гӕсгӕ хъӕуы йе ‘мдзу цӕуын. Уымӕ гӕсгӕ Ахуырад ӕмӕ зонады министрад сфӕнд кодта станцы робототехникӕ сывӕллӕттӕн амонын ӕмӕ ахуыргӕнӕндоны коллективимӕ аскъуыддзаг кодтой ацы ахсджиаг ӕмӕ ӕнӕмӕнгхъӕуӕг предмет Плиты Иналы бӕрны бакӕнын. Робот кусы удӕгас организмы принциптӕм гӕсгӕ, йӕ арӕзт та у автоматикон. Иугӕр куы скуса, уӕд йӕ разы развӕлгъау бацӕттӕгонд программӕмӕ гӕсгӕ ӕвӕры алыхуызон хӕстӕ ӕххӕст кӕнын.
Алы ногдзинадӕн дӕр йӕ райдиан ӕнцон никуы вӕййы, фӕлӕ фӕлтӕрд ӕмӕ йӕ хъуыддагыл ӕнувыд ахуыргӕнӕг йӕ разы ӕрӕвӕрдта хӕс, цӕмӕй кӕстӕрты фӕцайдагъ кӕна ацы ногдзинадыл. Уыдон сӕхӕдӕг дӕр тынг цымыдис кӕнынц роботы сусӕгдзинӕдтӕ рафӕлгъауынмӕ. Ис дзы дыууӕ къорды, алы къорды дӕр 8 ахуырдзауы, сӕ фылдӕр сты нӕ горӕты скъолаты ахуыргӕнинӕгтӕ. Ахуыртӕ сын райдыдтой ивгъуыд аз ноябры мӕйӕ, фӕлӕ ныридӕгӕн бӕрӕг у, хорз фӕстиуджытӕ сын кӕй уыдзӕн тагъд рӕстӕджы.
Плийы фырт куыд зæгъы, афтæмæй сӕ тыхтыл куы баууӕндой, уӕд сӕ ерыстӕм кӕндзӕн Дзӕуджыхъӕумӕ дӕр. Ныридӕгӕн дзы ис, ахуыртӕм зӕрдиагӕй чи цӕуы, ахуыргӕнӕджы амынддзинӕдтӕ тынг хорз чи ӕххӕст кӕны, ахӕмтӕ: Козаты Аслан, Кокойты Сослан, Зассеты Максим ӕмӕ ӕндӕртӕ.
Плийы фырт дзӕвгар ахуыргæнинæгтæн фæцамыдта йæ зонындзинæдтæ æмæ кæд сæрмагондæй уыцы фæндагыл нæ ацæуынц, уæддæр сын сæ зонындзинæдтæ царды рабæззынц.
Йӕ бирӕазон ӕмӕ ӕнӕзӕрдӕхудт куысты тыххӕй йын лӕвӕрд ӕрцыд «Уӕлӕмхас ахуырады цытджын кусӕджы ном».
Хуыбиаты Никъала
Comments are closed, but trackbacks and pingbacks are open.