Диспансеризаци-иу цæрджыты ‘хсæн кæд Советон дуджы дæр уагъд цыд, уæддæр нæ республикæйы фæстаг 20 азы фæкъуылымпы ис, бæрæг аххосæгтæм гæсгæ.
Фæстаг дыууæ азы Æнæниздзинад хъахъхъæныны министрад диспансеризаци сног кодта, æмæ ивгъуыд аз иумæйаг ахуыргæнæн скъолаты дæр уагъд æрцыд. Йæ нысан профилактикæ кæй у æмæ афоныл низ сбæрæг кæнын, уымæ гæсгæ æнæзивæгæй фæцæуынц не ‘мбæстæгтæ ацы басгæрстытæм.
«Нырыккон диспансеризаци, раздæр чи уыд, уыимæ абаргæйæ ахадгæдæр у. Адæймаг æппæт дохтыртыл дæр æрзила, диспансеризаци канд уый нæ амоны. Махæн медицинон кусджытæн нæ сæйраг хæс у адæмæн сæ фылдæр цы низты аххосæй амæлынц, уыцы низтæ сæ райдианы сбæлвырд кæнын», – зæгъы горæты поликлиникæйы терапевт Цхуырбаты Азæ.
Медик ма куыд зæгъы, афтæмæй ахæм низтæм, сæйраджыдæр, хауынц зæрдæ æмæ тугдадзинты низтæ, онкологи, сæкæрниз, стæй бронхтæ æмæ рæуджыты низтæ.
Æнæниздзинад æмæ социалон райрæзты министрады нын куыд загътой, афтæмæй диспансеризаци нæ республикæйы цæрджыты ‘хсæн уагъд цæуы Уæрæсейы æнæниздзинад хъахъхъæныны министрады амындмæ гæсгæ. Уыдонæн сæ нысан у, бæстæйы куыстхъом адæмы æнæниздзинадмæ æркæсын, стæй зæрдæ æмæ онкологион низтæй рынчынтæ цас ис æмæ сæ уавæр куыд у, уый бæлвырдæй базонын. Уымæй дарддæр ма, канд низтæ сбæлвырд кæныныл нæ архайынц дохтыртæ, фæлæ сæ чи расайы, уыцы аххосæгтæ сбæлвырд кæныныл дæр. Уыдон та, бæрæг куыд у, афтæмæй сты тамако, карз нозт, физикон æгъдауæй куынæ змæла адæймаг æмæ æнæраст хæлцы хъуыддаг. Диспансеризацийы рæстæджы рабæрæг вæййынц æппæт уыцы низтæ æмæ рынчынæн бацамонынц, дарддæр æй цы кæнын хъæуы, уый.
Дохтыртæ куыд зæгъынц, афтæмæй диспансеризацийы хатдзæг уыд нæ республикæйы цæрджытæй йæхи дохтыртæн чи фенын кодта, уыдонæн се ‘мбисæй фылдæр æнæниз кæй не сты. Алы фæндзæм адæймагæн дæр рабæрæг вæййы сæкæрниз æмæ зæрдæдадзинты низтæ. Æмæ ацы хабар та адæймаг цас раздæр базона æмæ йæхи хъахъхъæнын цас раздæр райдайа, уыйбæрц ын инфаркт æмæ инсультæй уыдзæн къаддæр тæссаг. Ныртæккæ УЗИ æмæ цы алыгъуызон анализтæ арæзт цæуы, уый фæрцы сбæлвырдгонд онкологон низтæн се ‘рдæг разынынц, фыццаг кæнæ дыккаг стадийыл. Афтæмæй низы ныхмæ фæлæууын, кæннод та йæ сдзæбæх кæнын у æнцондæр.
Уæрæсейы диспансеризаци хаст цæуы «Æнæмæнг медицинон фæдзæхстадмæ», уымæ гæсгæ у лæвар æмæ йæ рацæуы алы адæймаг дæр. Махмæ дæр кæд афтæ нымад цæуы, уæддæр бирæтæ зивæг кæнынц, уыцы хъуыддагмæ. Ивгъуыд аз горæты поликлиникæ уынгтæм гæсгæ адих кодта æмæ сарæзта диспансеризацийы график. Фæлæ-иу поликлиникæйы фенæн уыд æрмæстдæр ацæргæ адæимæгтæн. Диспансеризаци рацæуыны нысанæн дохтырты къордтæ æрзылдысты районтыл дæр. Фæстаг рæстæджы та уыдысты Ленингоры районы. Иу кæнæ иннæ аххосæгтæм гæсгæ чидæртæ кæд сæхи нæ басгарын кодтой дохтыртæн, уæддæр хъуамæ зоной, Цæгат Ирыстоны уой æви Уæрæсейы искæцы къуымы, се ‘нæниздзинады уавæр базонынæн кæй хъуамæ бацæуой Æнæниздзинады центрмæ. Уыдон сты Уæрæсейы алырæтты, кæй зæгъын æй хъæуы, сты нæхи поликлиникæйы дæр. Уырдæм афæдз иу хатт алы адæймагæн дæр æмбæлы бацæуын æмæ йе ‘нæниздзинады уавæр лæварæй базонын. Дохтыртæн сæ зæрдæ истæмæ куы фехсайы, уæд адæймаджы цæрæн бынатмæ гæсгæ цы поликлиникæмæ хауы, уырдæм арвитынц.
Ивгъуыд аз диспансеризаци рацыдысты нæ горæты цалдæр скъолайы дæр. Уым ахуыргæнинæгты ‘хсæн, сæйраджыдæр, сбæрæг сты фады низтæ, скалиоз æмæ ахсæны низтæ. Уыдонæн дæр лæвæрд æрцыд медицинон амындтытæ. Ныййарджытæ куыд дзырдтой, афтæмæй уыдон нæ зыдтой, сæ сывæллæттæн ахæм низтæ кæй ис, уый.
Уазæгты Марфа
Comments are closed, but trackbacks and pingbacks are open.