Цæрджыты диспансеризаци ацыд æнтысгæйæ

Республикæ Хуссар Ирыстоны Президент Бибылты Анатоли йæхимæ райста Уæрæсейы Федерацийы Федералон медико-биологон агентады специалистты, агентады къухдариуæггæнæг Владимир Уйбайы сæргълæудæй. Уыдон иу мæйы дæргъы уагътой Хуссар Ирыстоны цæрджыты диспансеризаци.

Фембæлды ма хайад райста РХИ-йы æнæниздзинад хъахъхъæныны æмæ социалон рæзты министр Тотчиты Георги.

Паддзахады сæргълæууæг бузныджы ныхæстæ загъта медиктæн, банысан кодта уыдоны куысты ахсджиагдзинад.

«Республикæйы æнæниздзинад хъахъхъæныны æмæ социалон рæзты министры докладмæ гæсгæ диспансеризаци рацыд Хуссар Ирыстоны цæрджыты цыппæрæм хай. Уый тынг хорз фæстиуæг у. Диспансеризаци ауадзын у ахсджиаг, уымæн æмæ йæ сæйраг нысаниуæг у развæлгъау низ сбæрæг кæнын æмæ рæстæгыл схос кæнын. Æмæ тынг ахсджиаг у, мах дохтыртæ сымахимæ кæй куыстой, уый. Ныфс мæ ис, дарддæр кæй кæндзæн æмгуыстад», – загъта Бибылты Анатоли.

Президент банысан кодта приоритеон здæхтытæ, кæцытæ æнæмæнгхъæуæг сты хуссарирыстойнаг специалистты квалификацийы æмвæзад фæбæрзонддæр кæнынæн.

«Махмæ ис реаниматологты, анестезиологты дефицит. Æмæ хатын сымахмæ, цæмæй баххуыс кæнат ацы фадгуыты не специалистты квалификаци фæбæрзонддæр кæныны хъуыддаджы», – загъта Президент.

Уымæй уæлдай ма Бибылты Анатоли банысан кодта техникон персоналы куыст, кæцытæ хайад райстой Хуссар Ирыстоны цæрджыты масштабон диспансеризацийы.

Йæ рады, Владимир Уйба банысан кодта, уæрæсейаг медикты куыст æххæст кæй цыд хуссарирыстойнаг паддзахады сæргълæууæджы инициативæ æмæ УФ-йы Президент Владимир Путины хæслæвæрдмæ гæсгæ.

«Басгæрст æрцыд 10 800 адæймаджы. Уый у егъау нымæц. Басгæрсты фæстиуджытæм гæсгæ 900 фылдæр адæймагæн рабæрæг зæрдæйы-тугдадзинты низтæ, афтæ ма къаддæр не сты невралогион патологитæ», – загъта уый.

Владимир Уйба ма фехъусын кодта, Хуссар Ирыстоны æнæниздзинад хъахъхъæныны министрадимæ иумæ кæй æвзарынц ахæм пациентты, кæцытæн æнæмæнг хъæуы специализацигонд æмæ бæрзондтехнологион æгъдауæй хос кæнын Уæрæсейы медицинон центрты.

Тотчиты Георгийы ныхæстæм гæсгæ, республикæйы æмбæстæгтæн дарддæр хос кæндзысты, РХИ-йы æнæниздзинад хъахъхъæныны æмæ социалон рæзты министрад æмæ УФ-йы æнæниздзинад хъахъхъæныны министрады æхсæн цы сразыдзинадыл æрфыстæуыд къухтæ, уый бындурыл.

Хуссар Ирыстоны УФ-йы Федералон медико-биологон агентады медицинон отряды хайад райстой 61 специалисты. Пациентты басгæрстой республикæйы алы районты дæр.

РХИ-йы Президенты Барамындмæ гæсгæ агентады къухдариуæггæнæг Владимир Уйбайæн лæвæрд æрцыд «Республикæ Хуссар Ирыстоны сгуыхт дохтыры» кадджын ном, бæрзонд медицинон технологиты Федералон клиникон центры генералон директорæн та лæвæрд æрцыд «Хуссар Ирыстоны адæмы Фыдыбæстæйон хæсты уæлахизы 10 азы сæраппонд» майданæй.

РХИ-йы Президенты æмæ

Хицауады пресс-службæ