Газет «Северная Осетия»-йы сæрмагонд уацхæссæг Магкоты Мæдинæ ссис Æппæтуæрæсейон конкурс «Про Образование – 2021»-йы призер. Конкурсы организатор у Уæрæсейы Федерацийы Ахуырады министрад. 15-æм декабры уыд конкурсы уæлахиздзауты цытджын æгъдауæй схорзæхджын кæныны церемони. Конкурсы уыд 10 номинацийы. Магкоты Мæдинæ «Ученый – всегда мечтатель»-ы æрмæгимæ бацахста 3-аг бынат «Ахуырады зонад æмæ технологиты тыххæй хуыздæр æрмæджы» номинацийы. Цæгат Ирыстон-Аланийы Ахуырад æмæ зонады министр Алыбегты Эллæ раарфæ кодта журналистæн æмæ банысан кодта ахуырад æмæ зонады регионалон фарстытæ равдисыны дзыллон информацийы фæрæзты нысаниуæджы тыххæй. «Тынг æхсызгон нын у, УФ-йы Рухсады министрады конкурсы цæгатирыстойнаг журналисты куыстæн аккаг аргъ кæй скодтой, уый. Мах райгонд стæм регионалон дзыллон информацийы фæрæзты минæвæрттæй, кæцытæ уæрæхæй равдисынц ахуырад æмæ зонады фарстытæ, хайад райсынц профессионалон конкурсты, сæ куысты бæрзонд æмвæзад бафидар кæнгæйæ. Бузныг уын зæгъын, ахуыргæнæджы куыст популярон кæнынæн кæй æххуыс кæнут, уæ аудиторийæн æвзонг ахуыргæнджыты нæмттæ куыд гом кæнут, афтæ дзурут ветеранты тыххæй дæр, æвдисут ахуырады системæйы æнтыстытæ æмæ проблемæты тыххæй», – банысан кодта уый.
Конкурсмæ куырдиæттæ бадæттой Уæрæсейы 72 регионæй 827 адæймаджы. Уæлахиздзауты æмæ призерты ‘хсæн сты журналисттæ, блогертæ, ахуыргæнджытæ æмæ дзыллон информацийы фæрæзты æмæ социалон хызæгты ахуырады темæ чи æвдисы, уыдон се ‘ппæт дæр. Уыйбæрц хайадисджыты ‘хсæн ирон журналист конкурсы призер кæй ссис, уый у стыр æнтыст.
Æрмæг бацæттæ кодта
ГУЫЦМÆЗТЫ Евелинæ
Comments are closed, but trackbacks and pingbacks are open.