Нæ горæты Сывæллæтты сфæлдыстады галуаны уагъд цыд конкурс «Аргъæутты дуне», зæгъгæ. Конкурсы хайад райстой 16 сабидоны коллективтæ. Ацы конкурс æрвылаз дæр уагъд æрцæуы РХИ-йы Ахуырад æмæ зонады министрады хъæппæрисæй. Фыццаг этапы сывæллæтты спектакльтæ æвдыст æрцыдысты сабидæт-ты. Жюрийы уæнгтæ бакастысты сывæллæтты ралæудтытæм æмæ дзы равзæрстой фондз хуыздæр куысты конкурсы финалæн.

Ацы бонты Сывæллæтты сфæлдыстады галуаны уагъд æрцыд конкурсы финал. Конкурсы жюрийы скондмæ Сывæллæтты сфæлдыстады галуаны директор Джиоты Арянæйы сæрдариуæгадæй бацыдысты паддзахадон драмон театры артисттæ Мамиты Григори æмæ Кокойты Нинæ, Галуаны режиссер Дзигойты Маринæ. Уыцы бон Галуаны залмæ æрбамбырд бирæ адæм. Æрæмбырдуæвджытæн æвдыст æрцыдысты 10, 11 æмæ 15-æм сабидæтты хъомылгæнинæгты сценкæтæ. 2 æмæ 5-æм сабидæтты хъомылгæнинæгты ралæудтытæ æвдыст æрцыдысты экраныл, уымæн æмæ се ‘нæниздзинадмæ гæсгæ сæ бон нæ бацис мадзалмæ бацæуын. «Лучшее музыкальное оформление»-йы  номинацийы уæлахиздзаутæ систы 15 сабидон «Хуры тын»-ы хъомылгæнинæгтæ, «Жюрийы сæрмагонд приз» фæцис 2-æм сабидон «Золотой ключик»-ы хъомылгæнинæгты, «Хуыздæр спектаклы тыххæй» схорзæхджын кодтой сабидон «Дюймовочка»-йы сабиты, хуыздæр æвæрд сценкæ равдыстой сабидон «Булæмæргъ»-ы сывæллæттæ æмæ «Хуыздæр актерон сконд»-ы та хорзæх райстой сабидон «Заря»-йы хъомылгæнинæгтæ. Уымæй дарддæр ма «Ирд ралæуд»-ы номинацийы дипломæй хорзæхджын æрцыд сабидон «Звездочка»-йы хъомылгæнинаг Джиоты Александр.

Хуссар Ирыстоны паддзахадон драмон театры артист Мамиты Григори банысан кодта: «Сывæллæттæ дыккаг этапы сæ спектакльтæ равдыстой ног сценæйыл, Сывæллæтты сфæлдыстадон галуаны сценæйыл. Фæлæ уымæ нæ кæсгæйæ уæддæр сарæхстысты. Фестиваль ауадзын у тынг хорз идейæ, бакусын ыл хъæуы ноджыдæр, сбæрæг кæнын хъæуы конкурсы нысæнттæ æмæ уæд мах фидæны фендзыстæм сывæллæтты спектаклты ноджы стырдæр æнтыстытæ. Уырны мæ, ацы сывæллæттæ фидæны, гæнæн ис, суой æцæг артисттæ». Уый ма бузныг загъта сабидæтты ахуыргæнджытæн, кæцытæ бацæттæ кодтой сывæллæтты.

Кокойты Нинæ банысан кодта, зæгъгæ, ахæм мадзæлттæ ахъаз кæнынц сывæллæтты сфæлдыстады потенциалы рæзтæн. «Кæй зæгъын æй хъæуы, сывæллæттæ тыхстысты, фæлæ, æгæрыстæмæй, профессионалон артисттæ дæр гастролты ног сценæйыл æндæргъуызон фæхъазынц. Конкурсы чысыл хайадисджытæ тынг хорз сарæхстысты. Тынг курдиатджын сывæллæттæ нæм ис», – загъта уый.

Уазджыты раз ралæууыд Сывæллæтты сфæлдыстады галуаны æвзонг сценæмæкæсæджы театр. Галуаны директор Джиоты Арянæ сертификаттæ радта конкурс «Аргъæутты дуне»-йы æппæт хайадисджытæн дæр.

КОКАЙТЫ Зæринæ

 

Comments are closed, but trackbacks and pingbacks are open.